شەرەمەتيەۆو اۋەجايىنداعى ۇشاق اپاتىنان قايتىس بولعان 41 ادامنىڭ قاتارىندا قازاق جىگىتى دە بولعان دەپ جازادى Qamshy.kz اقپارات اگەنتتىگى. 

23 جاستاعى ناۆرۋز يسكەندەروۆ داعىستاندىق جولاۋشىلاردى قۇتقارامىن دەپ قايتىس بولدى. كۋاگەرلەردىڭ سوزىنە سۇيەنسەك، ناۆرۋزدىڭ امان قالۋعا مۇمكىندىگى بولعان. الايدا ول جولاۋشىلاردى ءقاۋىپسىز جەرگە شىعارۋعا كومەكتەسكەن. 

اۆياكومپانيا ءوز كەزەگىندە ۇشاق اپاتىنان قايتىس بولعانداردىڭ تۋعان-تۋىستارىنا 5 ملن رۋبل بەرەتىنىن مالىمدەدى. سونداي اق داعىستاننىڭ باسشىسى دا ناۆرۋز يسكەندەروۆتىڭ وتباسىنا قارجىلاي كومەكتەسەتىنىن ايتتى. 

الايدا ناۆرۋزدىڭ اتا-اناسى دا، تۋعان باۋىر-قارىنداستارى دا جوق. ونىڭ اكەسى بالا كەزىندە قايتىس بولعان، ال اناسى بىرنەشە جىل بۇرىن ونكولوگيالىق دەرتتەن كوز جۇمعان. 

ناۆرۋزدىڭ اكەسى – قازاق، اناسى – قۇمىق. اكەسىنىڭ كوزى تىرىسىندە ول قازاقستاندا تۇرعان. كەيىن اناسىنىڭ وتانى داعىستانعا قونىس اۋدارادى. 

سونىمەن بىرگە، ۇشاقتىڭ ىشىندەگى جانتۇرشىگەرلىك ۆيدەونى دا ناۆرۋز تۇسىرگەن. ونىڭ دوستارى ناۆرۋزدى داۋىسىنان تانىعان. 

"بۇل ۆيدەودا بىرەۋ "بارلىعىڭ سىرتقا شىعىڭدار" دەگەن وفيسەرلىك داۋىسپەن ايعايلايدى. بۇل – انىق ناۆرۋزدىڭ داۋىسى. ول تەڭىز فلوتىندا وفيسەر بولعان"، - دەيدى ناۆرۋزدىڭ دوسى شاميل. 

اپاتقا دەيىن ناۆرۋز يسكاندەروۆ قازاقستانعا كەلىپ ۇلگەرگەن. قازاقستانعا كەلىپ مۇرنىنا وپەراسيا جاساتقان، ءتىسىن ەمدەتكەن. 

"ناۆرۋز ازىلدەسكەندى جاقسى كورەتىن. سونداي-اق سەندىرە بىلەتىن. كەيدە ونىڭ ازىلدەرىنە سەنىپ قالاتىنبىز. كەيىن ءوزى كەشىورىم سۇرايتىن"، - دەپ ەسكە الدى دوسىن شاميل. 

اپات كەزىندە ناۆرۋزدىڭ امان قالۋىنا مۇمكىندىك بولعان. سەبەبى ول ۇشاقتىڭ الدىڭعى قاتارىندا وتىرىپتى. ءبىراق شاميل ناۆرۋزدىڭ بۇل مۇيكىندىكتەن ءوز ەركىمەن باس تارتقانىنا سەنىمدى. 

"ول قيىندىققا دۋشار بولىپ، ءولىم مەن ءومىردىڭ ورتاسىندا جاتقان ادامداردى تاستاپ كەتە المايتىن ەدى"، - دەيدى شاميل. 

ەسكە سالا كەتسەك، 5 مامىردا ماسكەۋدەن ۇشىپ شىققان Sukhoi Superjet - 100 ۇشاعى اپاتقا ۇشىراپ، شەرەمەتيەۆو اۋەجايىنا قوندى. اتالمىش ۇشاقتا 78 ادام بولعان. ولاردىڭ 41ء-ى قايتىس بولدى. 

اۋدارعان: اسەل بولات قىزى