ۋكراينانىڭ جاڭا پرەزيدەنتى ۆلاديمير زەلەنسكييدى ۇلىقتاۋ راسىمىنە 60 مەملەكەت شاقىرىلعان. ونىڭ اراسىندا قازاقستان جوق دەپ حابارلايدى Qamshy.kz اقپارات اگەنتتىگى tengrinews.kz سايتىنا سىلتەمە جاساپ.

بۇل تۋرالى ميد باسپا ءسوز حاتشىسى ەكاتەرينا زەلەنكو ءوزىنىڭ Twitter پاراقشاسىندا جازدى. "ۇلىقتاۋ راسىمىنە بەس ەلدىڭ: لاتۆيا، ليتۆا، ەستونيا، گرۋزيا، ۆەنگريا پرەزيدەنتىن؛ تۇركيانىڭ ۆيسە پرەزيدەنتىن، مولدوۆانىڭ پرەمەر-مينيسترىن؛ ازەربايجان پارلامەنت باسشىسىن؛  ءتورت ەلدىڭ: بەلارۋسيا، رۋمىنيا، سلوۆاكيا، بولگاريا ۆيسە-پرەمەرلەرىن؛ ءتورت ەلدىڭ: اقش-تان - ەنەرگەتيكا ءمينيسترى، كانادادان  - قورعانىس ءمينيسترى، فرانسيادان - ەۋروپا ساۋالدارى بويىنشا ءمينيستردى، پولشادان - ميد باسشىسىن كۇتەمىز. وعان قوسا، وزگە دە 40 جوعارى مارتەبەلىلەر بار"، - دەپ جازدى 18 مامىر كۇنى.

ۋكراينانىڭ "سترانا" پورتالىندا ۆلاديمير پۋتين كييەۆتەن شاقىرتۋ الماعان دەپ جازىلعان. "رەسەي فەدەراسياسى ۇلىقتاۋ راسىمىنە شاقىرىلمادى. ءبىز ۋكراينامەن تىعىز سەرىكتەستىك ورناتىپ، بەلسەندى قارىم-قاتىناس جاسايتىن مەملەكەتتەردى عانا شاقىردىق. ولار ءبىزدىڭ سەرىكتەس ءارى دوسىمىز"، - دەگەن زەلەنكونىڭ ءسوزىن باسا ايتتى. بەلارۋسيادان وكىل كەلە مە، ول جاعى ءالى بەلگىسىز. شاقىرىلعاندار ىشىندە قازاقستان وكىلدەرىنىڭ دە ەسىمى اتالماعان. 

"ۋكراينسكايا پراۆداداعى" دەرەككوزگە سەنسەك، رەسمي ۇلىقتاۋ راسىمىنە ۆيكتور يانۋكوۆيچتەن باسقا ۋكراينانىڭ بۇرىنعى بارلىق پرەزيدەنتتەرى شاقىرىلعان. 

ەسكە سالا كەتسەك، بۇگىن تاڭدا كييەۆتە ۆلاديمير زەلەنسكييدى ۇلىقتاۋ ءراسىمى وتەدى دەپ حابارلانعان بولاتىن.

ۇسىنعان: ماقپال سەمباي