اقمولا وبلىسىندا سپورتتىق باسەكە بارىسىندا كوكشەتاۋ قالاسىنان كەلگەن 15 جاسار بالا قايتىس بولدى. دارىگەرلەردىڭ ايتۋىنشا، ونىڭ قازاسىنا جۇرەك تالماسى سەبەپ بولعان دەپ حابارلايدى Qamshy.kz اقپارات اگەنتتىگى وبلىستىق ءبىلىم باسقارماسىنا سىلتەمە جاساپ.

قايعىلى وقيعا "الاۋ" اسكەري-سپورتتىق ويىندارى وتكىزىلىپ جاتقان "زۆەزدنىي" بالالاردى ساۋىقتىرۋ ورتالىعىنىڭ اۋماعىندا ورىن العان. ەستافەتا كەزىندە №4 مەكتەپتىڭ توعىزىنشى سىنىپ وقۋشىسى مارەگە جەتە الماي قۇلاعان.

وبلىستىق دەنە شىنىقتىرۋ ديسپانسەرىنىڭ دارىگەرى قانات قۇسايىنوۆ بالاعا العاشقى مەديسينالىق كومەك كورسەتتى. ءبىلىم باسقارماسىنىڭ مالىمەتىنە سۇيەنسەك، بالا جەدەل تۇردە ششۋچينسك قالاسىنداعى اۋداندىق اۋرۋحاناعا جەتكىزىلىپ، سول جەردە ەسىن جيناي الماعان كۇيى دۇنيەدەن وتكەن.

"100 مەتر قاشىقتىققا جۇگىرگەن سپورتشىلاردىڭ ءبىرىنىڭ قۇلاپ قالعانىن كورگەن بويدا وعان العاشقى مەديسينالىق كومەك كورسەتتىم. جۇرەك تۇسىن ۋقالاپ، جاساندى دەپ بەردىم. ارتىنشا ارنايى كولىكپەن اۋداندىق اۋرۋحاناعا جەتكىزدىك. جول بويى راەنيماسيالىق شارالاردى كورسەتىپ باردىم"، - دەيدى قانات قۇسايىنوۆ.

وبلىستىق دەنساۋلىق ساقتاۋ باسقارماسى بالانىڭ ولىمىنە جۇرەك تالماسى سەبەپ بولعان دەپ مالىمدەمە جاسادى. ال ءىىم قىزمەتكەرلەرى اتالعان وقيعا بويىنشا تەرگەۋ جۇمىستارىن جانە مەديسينالىق ساراپتاما جۇرگىزىپ جاتىر.

بىزگە بەلگىلى دەرەكتەرگە سۇيەنسەك، №4 مەكتەپتىڭ جارىسقا باراتىن كومانداسىندا العاشىندا باسقا بالا بولىپتى. باسەكە بولاتىن كۇنى ول بەلگىلى ءبىر سەبەپتەرمەن دوداعا كەلە الماي قالادى. قازا تاپقان بالا سول وقۋشىنىڭ ورنىنا قاتىسقان ەكەن. سونداي-اق، №4 مەكتەپتىڭ اسكەري جەتەكشىسى بۇل جارىسقا كەلمەي، ونىڭ ورىنىنا كوكشەتاۋلىق باسقا مەكتەپتەن جاس ءمۇعالىم وقۋشىلاردى جارىسقا الىپ كەلىپتى.

اۋدارعان: ادىلەت مادەنيەت