2019 جىلدىڭ 26 ءساۋىر كۇنى الماتى وبلىسى ەسكەلدى اۋدانى قاينارلى اۋىلدىق مەشىت يمامى ءقادىر امبيە ۇلىنىڭ زورلىق-زومبىلىعىنا شىداماي، وز-وزىنە قول سالعان نۇرعيزا ازاتحان قىزىنىڭ جۇبايى ەسحات اينەكبەك ۇلى پرەزيدەنتكە ۆيدەو جولدادى دەپ حابارلايدى Qamshy.kz اقپارات اگەنتتىگى.

"قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ مىرزاعا، ىشكى ىستەر ءمينيسترى ەرلان تۇرعىمبايەۆقا، ق ر باس پروكۋرورى عيزات نۇرداۋلەت مىرزاعا! مەن الماتى وبلىسى، ەسكەلدى اۋدانىنا قاراستى قاينارلى اۋىلىنىڭ تۇرعىنىمىن. ەسىم-سويىم - ەسحات اينەكبەك ۇلى. سىزدەرگە حات جولداپ وتىرعان سەبەبىم - 2019 جىلدىڭ 26-ساۋىرىندە مەنىڭ جارىم نۇرعيزا ازاتحان قىزى اۋىل مولداسى قادىر امبيە ۇلىنىڭ ءماجبۇرلى تۇردە جىنىستىق قاتىناسقا تارتىپ، ءتۇرلى حايۋاندىق ارەكەتتەر جاساعانىنا شىداماي، وز-وزىنە قول جۇمساۋى. زاڭدا شەكتەۋ قويىلعان ارەكەتتەرگە بارىپ، ءۇش بالامدى جەتىم قالدىرۋعا سەبەپكەر بولعان ءقادىر امبيەۇلىنا ءتيىستى جازا قولدانۋلارىڭىزدى سۇرايمىن"، - دەيدى اشىنعان اكە. 

زورلىق- زومبىلىققا شىداي الماي، ءوزىن قۇربان ەتكەن ايەلدىڭ ارتىندا كۇيەۋى جانە ءۇش بالاسى قالدى. ەسحات مىرزا زاڭدى قۇقىقتار اياسىندا وتباسىنىڭ قاۋىپسىزدىگىنىڭ قامتاماسىز ەتىلۋىن سۇرايدى. ەسحات اينەكبەك ۇلى "يمام ءقادىردىڭ ۇستىنەن قىلمىستىق ءىس قوزعالىپ، ول اباقتىعا جابىلسىن" دەيدى.

ۆيدەودا اۋىل يمامىمەن نۇرعيسا ازاتحان قىزىنىڭ اراسىنداعى ۇرىس-كەرىستىڭ دە ۇزىندىلەرى بار. اتالمىش بەينەماتەريالدا انىق ەستىلگەندەي، اۋىل مولداسى ءقادىر اينەكبەك ۇلىنىڭ ايەلىن ءسۇيىپ قالعانىن، ودان وزگە ەشكىمدى كورە المايتىنىن ايتقان. سايكەسىنشە، ءوز قالاۋىن، ءوز ايتقانىن قىلماسا، ولتىرەتىنىن جەتكىزگەن. 

ال نۇرعيزا ازاتحان قىزى ءوز كەزەگىندە كۇيەۋىنە قاستاندىق جاساي المايتىنىن، ونى الداۋعا ءداتى شىدامايتىنىن جەتكىزىپ، ءبىرجولا ولىمگە باس تىككەنىن جانە ءوزىنىڭ ولىمىنە ءقادىر امبيە ۇلىنىڭ كىنالى ەكەنىن ايتادى. 

"...مەن سىزگە ايتىپ كەلە جاتىرمىن عوي. مەن ەسحاتتى الداپ جۇرە المايمىن. ءسىز ەر-ازاماتسىز عوي. ءتۇسىنىپ، ءبىر شەشىم شىعارساڭىزشى"، - دەپ جالىنادى ايەل ۆيدەوداعى داۋىستىق حابارلاماسىندا. 

بۇعان جاۋاپ رەتىندە مولدا ءوزىنىڭ دە وتباسىنىڭ ويران بولعانىن، كەلىسىم بەرۋىن، كەلىسىم بەرمەسە بۇل نارسەگە توزە المايتىنىن جەتكىزىپ، قوقان-لوقى كورسەتەدى. 

"مەن ەشكىمگە جار بولماي-اق قويايىنشى. مەن ولەمىن. مەن وسىعان بەكىدىم. مەن باسقا شەشىم كورىپ تۇرعان جوقپىن. ە، اللا، ءبىر ءوزىڭ ەسحاتقا جار بولا گور! سەنىڭ حايۋاندىعىڭ مەنى وسى جەرگە دەيىن اپاردى"، - دەيدى ايەل شەشىمدى حاتىندا جىلاپ تۇرىپ. 

ازىرگە ىشكى ىستەر مينيسترلىگى دە، قمدب دا ەشقانداي رەسمي مالىمدەمە جاساعان جوق. جەلى قولدانۋشىلارى وقيعانىڭ سۇمدىق ەكەنىن، قىلمىس جاساعان تاراپ انىقتالىپ، زاڭ بويىنشا ەڭ قاتاڭ جازانى الۋى كەرەك دەپ جارىسا جازۋدا. 

وقي وتىرىڭىز: 

♦قاينارلىداعى قايعىلى وقيعا: مولدانى قانداي جازا كۇتپەك؟ (فوتورەپورتاج)

دايىنداعان: بەك بايتاس