ەلباسى اعىمداعى جىلعا «جاستار جىلى» دەپ ايدار تاققالى وڭىر-وڭىرلەردە اۋقىمدى ىستەر قولعا الىنۋدا. بۇل باعىتتا جامبىلدا دا جۇيەسىن تاپقان جۇمىستار جەتەرلىك. ونىڭ ءبىر انىق دالەلى رەتىندە «بولاشاققا باعدار» كوشپەلى اۆتوكەرۋەنىنىڭ جولعا شىققانىن ايتۋعا بولادى. بۇل ايماقتىق  جاستار ساياساتىن جۇرگىزۋدەگى ەل ەسىندە قالار ەلەۋلى ءىس بولعالى تۇر.

جالپى وبلىس اكىمدىگى جاستار ساياساتى ماسەلەلەرى باقارماسىنىڭ باسشىسى ءمادي ماتەننىڭ سوزىنە سۇيەنسەك، «بولاشاققا باعدار»  جوباسى اياسىندا  وبلىستىڭ ءاربىر اۋىل، ەلدى مەكەندەرىندەگى 14-29 جاس ارالىعىنداعى جۇمىسسىز، مۇمكىندىگى شەكتەۋلى، جەكە كاسىبىن اشاتىن نەمەسە كاسىبىن دامىتۋشىلار، الەۋمەتتىك جانە قۇقىقتىق كومەك قاجەت ەتەتىندەر، جوعارى جانە ارناۋلى ورتا وقۋ ورنىن بىتىرگەن ستۋدەنتتەر جانە مەكتەپ تۇلەكتەرى قامتىلماق ەكەن.  

سونداي-اق، ولارعا قاتىستى ماسەلەلەردى جەرگىلىكتى جەرلەردە كەڭ اۋقىمدى ءتۇسىندىرۋ جانە ناقتى ناتيجەگە باعىتتالعان ماسەلەلەرىن شەشۋ جۇمىستارىن جۇرگىزۋ، وبلىس تۇرعىندارىنىڭ سىبايلاس جەمقورلىققا قارسى مىنەز-قۇلىق ۇلگىسىن ودان ءارى دامىتۋ مەن جەمقورلىق ماسەلەسىن مەملەكەتتىك قىزمەت كورسەتۋ ساپاسىن ارتتىرۋ ارقىلى شەشۋ جولدارىن ۇعىندىرۋ مەن  مەملەكەتتىك ورگاندار قىزمەتىنىڭ اشىقتىعىن ايقىنداۋعا باسىمدىق بەرىلمەك.

- كەرۋەن ءار اۋداندا 2 كۇننەن استام ۋاقىت بولىپ، جالپى 44 ەلدى  مەكەندە جۇمىس جۇرگىزەدى. الاڭ جۇمىسىنا 300-گە جۋىق  اۋىل  جاستارىن قامتۋ كوزدەلۋدە. توپ قۇرامىنداعى سالالىق مەكەمە وكىلدەرى تەك كەڭەس بەرۋمەن شەكتەلمەي، كوتەرىلگەن ماسەلەلەردى ناقتى شەشۋگە ۇمتىلا وتىرىپ، ءوز سالاسى بويىنشا سول اۋدانداعى جاستار احۋالىنا تالداۋ جاسايدى. ال ءدىن ىستەرى باسقارماسى ءوز تاراپىنان اتا-انالاردىڭ، ۇستازداردىڭ، جاستاردىڭ قاتىسۋىمەن ارنايى كەزدەسۋلەر ۇيىمداستىرسا، جۇمىسپەن قامتۋ باسقارماسى اۋدان اكىمدەرىمەن بىرلەسىپ، بوس جۇمىس ورىندارى جارمەڭكەسىن

وتكىزەدى.

پروباسيا قىزمەتى ءار اۋداندا جەرگىلىكتى سالا وكىلدەرىمەن بىرگە  پروباسيا ەسەبىندە تۇرعان جاستارمەن جۇزدەسىپ،  مەملەكەتتىك قولداۋلار، ەڭبەكپەن قامتۋ سياقتى ماسەلەلەر بويىنشا ءتۇسىندىر جۇمىستارىن جۇرگىزەدى، - دەيدى ءمادي ماتەن.

ءيا، ءسوز جوق، بۇل باس بارماقپەن باعالاۋعا تۇرارلىق باستاما. سەبەبى جوعارىدا ايتىلعان جاستار جۇمىسسىزدىعى، جاس كاسىپكەرلەرگە مەملەكەتتىك قولداۋ كورسەتۋ، پروباسيا مەن جاستار قىلمىسى سىندى ماسەلەلەر بۇگىندە ءوز وزەكتىلىگىن جويماۋدا. سوندىقتان جاستار باسقارماسىنىڭ مۇرىندىق بولۋىمەن جاندانىپ وتىرعان جوباعا ءوڭىردىڭ بارلىق جاستارى مەن جەرگىلىكتى بيلىك قولداۋ بىلدىرگەنى ابزال.

ايتا كەتەيىك، اتالمىش جوبا ۇستىمىزدەگى جىلدىڭ مامىر-ماۋسىم ايلارىندا ءوز جۇمىسىن باستاپ، بارلىق اۋدانداردى قامتىپ شىعادى.

ەندەشە، «بولاشاققا باعدار» سالعان جوبانى اۋىلداعى اعايىن اسىعا كۇت! 

جايدار ازامات