ەلباسى نۇرسۇلتان ءابىش ۇلى نازاربايەۆ ءوز جولداۋلارىندا الەۋمەتتىڭ الەۋەتىن ارتتىرۋعا ايرىقشا باسىمدىق بەرۋمەن كەلەدى. ءتىپتى، 2020 جىلعا دەيىن رەسپۋبليكا تۇرعىندارىنىڭ 98 پايىزى ورتالىقتاندىرىلعان اۋىزسۋعا قولجەتكىزۋى قاجەتتىگىن باسا ايتقان تاپسىرماسى دا بۇگىندە جۇزەگە اسۋدا. وعان دالەل رەتىندە بيىل تاراز قالاسى ماڭىنداعى 7 بىردەي ەلدى مەكەننىڭ اۋىزسۋ جۇيەسىنە قوسىلاتىندىعىن ايتساق بولادى.

بۇل جايىندا وبلىس اكىمى اسقار مىرزاحمەتوۆتىڭ توراعالىعىمەن وتكەن جيىندا مالىمدەلدى. جانە  وبلىس اكىمدىگىنىڭ ەنەرگەتيكا جانە ءتۇرعىن-ۇي كوممۋنالدىق شارۋاشىلىق باسقارماسىنىڭ باسشىسى نۇرلان الدامجاروۆتىڭ سوزىنە سۇيەنسەك، ءقازىر جوبا بويىندا جوبالاۋ-سمەتالىق قۇجاتتار دايىندالۋ ۇستىندە ەكەن.  

جالپى رەسمي دەرەككە سۇيەنسەك،  بۇگىندە تاراز تۇرعىندارىنىڭ توقسان پايىزى تازا اۋىزسۋدى پايدالانىپ وتىر. جىل سوڭىنا دەيىن جوسپارلانعان جەتى ەلدى مەكەندەگى قۇرىلىس اياقتالسا، قالا تولىق تازا اۋىزسۋمەن قامتىلادى. وسى جۇمىستاردىڭ ناتيجەسىندە ءوڭىردىڭ رەيتينگىسىن  رەسپۋبليكا دەڭگەيىندە  كوتەرۋگە  مۇمكىندىك تۋماق.

وبلىستاعى اۋدان تۇرعىندارىنىڭ اۋىزسۋمەن قامتىلۋ دەڭگەيىنە توقتالساق، شۋ اۋدانى 60 پايىزبەن كوش باستاپ تۇر. بۇل ولكەدە قوسقۇدىق اۋىلىنىڭ  ماسەلە شەشىمىن تاپسا، اۋدان حالقىنىڭ 80 پايىزى ساپالى اۋىزسۋعا قول جەتكىزەتىن بولادى. اتالمىش ماسەلەنى ءوڭىر باسشىسى اسقار يسابەك ۇلى دا ءجىتى باقىلاۋىندا ۇستاپ، جۇمىستى ۇزاققا سوزباي شەشۋ كەرەكتىگىنە نازار اۋدارۋدا.

نەگىزى  باسقارما باسشىسى نۇرلان الدامجاروۆ بىلتىرعى جىلعى  بايانداماسىندا  2018 جىلدىڭ 1 قاڭتارىندا 4 قالا بويىنشا ورتالىقتاندىرىلعان اۋىزسۋمەن قامتۋ كورسەتكىشى 84،7  پايىزدى  قۇراعانىن ايتقان بولاتىن. جانە جىل اياعىنا دەيىن كورسەتكىش  86 پايىزعا جەتەتىنىن جەتكىزگەن-دى.  راس، بۇل مەجەنى ەڭسەرۋگە    تاراز قالاسىنىڭ «بۋرىل ا، ب، ۆ» تۇرعىن القابىنداعى سەرۆيستىك جەلىلەردىڭ قۇرىلىسىنا  رەسپۋبليكالىق جانە وبلىستىق بيۋدجەتتەن 334،6 ميلليون تەڭگە ءبولىنۋى كوپ سەپتىگىن تيگىزگەن-دى. ەندى مىنە، بيىل تاعى 7 ەلدى مەكەن تازا اۋىزسۋ جۇيەسىنە قوسىلىپ، قارا حالىقتى قۋانىشقا كەنەلتكەلى وتىر.

جالپى، وبلىس بويىنشا ورتالىقتاندىرىلعان اۋىزسۋمەن قامتىلعان 199 ەلدى مەكەن بار. ال ونداعى 130 مىڭ وتباسى ءالى دە سۋدى سىرتتان تاسىپ ىشەدى. اسقار يسابەك ۇلى  سالا ماماندارىمەن باس قوسقان جيىندا  تۇرعىنداردى 100 پايىز تولىعىمەن ورتالىقتاندىرىلعان اۋىزسۋ جۇيەسىنە قوسۋ كەرەكتىگىن  ايتىپ، ناقتى تاپسىرمالار جۇكتەدى.

بۇدان بولەك، باسقوسۋدا اۋىزسۋدى ساعاتتاپ كەستە بويىنشا تۇتىناتىن تۇرعىنداردىڭ دا ماسەلەسى مايشاممەن قارالىپ، جاۋاپتىلاردان جاۋاپ الىندى. 

ارينە، بارلىق ماسەلە بىردەن شەشىلمەيتىنى بەلگىلى. دەسە دە، بيىل 7 ەلدى مەكەننىڭ تۇرعىندارى ەندى تازا اۋىزسۋدى تاسىپ ىشپەيتىنى جانعا جىلۋ بەرەدى.

جايدار ازامات