«ەل ەرتەڭى – جاستار». بۇگىندە بۇل ومىرشەڭدىگىن جويمايتىن قاعيداتقا اينالدى. ارينە، مەملەكەتىمىزدىڭ كەلەشەگى بۇگىنگى جاس بۋىن ەكەنى بەلگىلى. ەلباسى دا سوڭعى جولداۋىندا: «جاستار مەن وتباسى ينستيتۋتىن كەشەندى قولداۋ – مەملەكەتتىك ساياساتىنىڭ باسىمدىلىعىنا اينالۋى ءتيىس. جاستاردىڭ بارلىق ساناتىن قولداۋعا ارنالعان شارالاردى تولىق قامتيتىن الەۋمەتتىك ساتىنىڭ اۋقىمدى پلاتفورماسىن قالىپتاستىرۋ كەرەك»، - دەپ باسا ايتۋى دا تەكتەن-تەك ەمەس.
پرەزيدەنت جىل سايىنعى ءداستۇرلى جولداۋلارىندا جاستار ساياساتىن جەتىلدىرۋ بويىنشا ىرگەلى تاپسىرمالار بەرىپ جۇرگەنى بارشاعا ءمالىم. سەبەبى جاستار قوعامنىڭ ءبىر بولىگى رەتىندە مەملەكەتتە ماڭىزدى ءرول اتقارادى. جاستاردى جۇمىسپەن قامتۋ ماسەلەسى ەلىمىزدە باستى نازارداعى ەكەنى انىق. سول سەبەپتى وسى ماسەلەنى جويۋ ءۇشىن ەلىمىزدە «ديپلوممەن اۋىلعا»، «بيزنەستىڭ جول كارتاسى»، «جۇمىسپەن قامتۋ-2020»، «ءاربىر وتباسىنا «7-20-25» باعدارلاماسى اياسىندا باسپانا الۋدىڭ جاڭا مۇمكىندىكتەرىن بەرۋ»، «جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ، ستۋدەنت جاستاردىڭ جاتاقحاناداعى جاعدايىن جاقسارتۋ» سىندى باعدارلامالار قولعا الىنىپ، ەلىمىزدىڭ تۇكپىر-تۇكپىرىندە جۇزەگە اسىرىلىپ جاتقانى بارشاعا ايان.
سونىڭ دالەلى، بيىل جامبىل وبلىسىنىڭ ءاربىر اۋداندارىندا، جالىندى جاستاردىڭ كاسىپكەرلىگىن دامىتۋ، ولاردىڭ بيزنەس باستامالارىن قولداۋ ماقساتىندا جاستار جىلىنا وراي كاسىپ باستاپ، ءوزىنىڭ باعىتىن تاۋىپ تابىستى بولعىسى كەلەتىن ازاماتتارعا قولداۋ كورسەتۋدى قولعا الدى. بيىل اۋىلداعى جاستاردىڭ كاسىپكەرلىكپەن اينالىسۋىنا ءومىرى مەن جۇمىسىنا قولايلى جاعداي جاسالماق.
ءيا، اۋىل – مەملەكەتتىڭ تىرەگى، ۇلتجاندىلىق پەن رۋحاني كۇشتىڭ قاينار كوزى. جاس كاسىپكەرلەردى قولداۋ - ەل اۋقىمىندا تيىمدىلىگىن كورسەتكەن، تانىمال «باستاۋ» جوباسى اياسىندا 42 جاسقا 505 مىڭنان 21 ميلليون 210 مىڭ تەڭگە قايتارىمسىز گرانت جانە وبلىستىق بيۋدجەتتەن 303 ميلليون تەڭگەگە (ءار جاسقا 3 ملن-عا دەيىن) گرانت بولىنگەن بولاتىن، وسىعان وراي جەرگىلىكتى جەردە جوبانىڭ ماقساتتارىن، مىندەتتەرىن جانە قاتىسۋ شارتتارىن ءتۇسىندىرۋ اياسىندا ب.مومىش ۇلى اۋىلى اكىمى اپپاراتىنىڭ ءماجىلىس زالىندا «جاستار رەسۋرستىق ورتالىعى» مەكەمەسىنىڭ ۇيىمداستىرۋىمەن "جاس كاسىپكەر" اتتى جۋالى اۋداننىڭ 18-29 جاس ارالىعىنداعى جاستارىمەن كەزدەسۋى ءوتتى. اتالعان شاراعا اۋدان اكىمدىگى كاسىپكەرلىك ءبولىمىنىڭ باسشىسى ت.امىرالييەۆ، "جاستار رەسۋرستىق ورتالىعى" مەكەمەسىنىڭ ديرەكتورى ج.مىرزالييەۆ، ينوۆاسيا تارتۋ جانە ينۆەستورلارعا قىزمەت كورسەتۋ ورتالىعىنىڭ باسشىسى ن.مىرزاتايەۆ، اۋداندىق كاسىپكەرلەر پالاتاسىنىڭ "باستاۋ" كۋرسى بويىنشا ۇيلەستىرۋشى مامانى ر.ايتبايەۆ، "جۇمىسپەن قامتۋ ورتالىعى" مەكەمەسىنىڭ جاستارعا ارنالعان قايتارىمسىز گرانتتار بويىنشا جۇمىس جاسايتىن مامانى ە.سۇرامىسوۆ جانە كاسىپ اشۋعا نيەتتى جاستار قاتىستى. شارادا جاستارعا ارنالعان قايتارىمسىز 3 ميلليونعا دەيىن گرانتتار بويىنشا تولىققاندى ءتۇسىندىرۋ جۇمىستارى جۇرگىزىلىپ، جاستار كوكەيىندە جۇرگەن سۇراقتارىنا جاۋاپ بەرىلدى.
3 ميلليون تەڭگەگە دەيىنگى گرانت بويىنشا قۇجاتتاردى قابىلداۋ اۋداندىق كاسىپكەرلىك بولىمىندە جالعاسىن تاۋىپ، 6 ماۋسىمعا دەيىن ۋاقىت بەلگىلەنىپ وتىر.
42 جاسقا 505 مىڭنان قايتارىمسىز گرانت بويىنشا جۇمىسپەن قامتۋ ورتالىعىنا اعىمداعى جىلدىڭ قىركۇيەك ايىنا دەيىن جۇرگىزىلەتىن بولادى.
وسىلايشا جۋالىلىق جاستار مەملەكەتتىك قولداۋدىڭ شاراپاتىن كورىپ، قايتارىمسىز گرانتقا قول جەتكىزۋدە. بۇل قوس قولداپ قولداۋعا تۇرارلىق تىرلىك.
جايدار ازامات
