اسىراۋشى سالانى الشاڭ باستىرۋ باعىتىندا بۇگىندە قولعا الىنىپ جاتقان مەملەكەتتىك باعدارلامالار از ەمەس. شاعىن جانە ورتا بيزنەس سۋبەكتىلەرىن سۋبسيديالاۋدىڭ ءوز جۇيەسى جاسالسا، ءتورت تۇلىكتىڭ تۇياعىن كوبەيتۋدە دە «قۇلان»، «اسىق»، «سىباعا» باعدارمالارىنىڭ بەرىپ جاتقان جەمىسى كوپ. ەندى مىنە، ەكولوگيالىق تازا مال ازىعىنا قاجەتتى قۇرىلىمداردىڭ قۇرىلىسى دا قولعا الىنىپ جاتىر.
وسى ورايدا، سوڭعى كەزدە ەل اراسىندا ءجيى ايتىلىپ جۇرگەن «گيدروپونيكا» ءادىسىن ايتۋعا بولادى. جالپى گيدروپونيكا جاڭا تەحنولوگيا بولعاندىقتان «قازگيدروپونيكا» جشس-گى فەرمەرلەردى مال ازىعىمەن قامتاماسىز ەتۋدىڭ يننوۆاسيالىق ءتاسىلىن ۇسىنىپ وتىر.
كۇنى كەشە اتالعان سەرىكتەستىكتىڭ سالتاناتتى اشىلۋ ءراسىمى ءوتتى. وعان جامبىل وبلىستىق اۋىل شارۋاشىلىعى باسقارماسىنىڭ باسشىسى بەرىك نىعماشيەۆ، اۋىل شارۋاشىلىعى سالاسىنىڭ ارداگەرلەرى امەنكەلدى كارەنتايەۆ، ساعىنحان امىرەقۇلوۆ جانە اۋداندىق اۋىل شارۋاشىلىعى ءبولىمىنىڭ باسشىلارى مەن شارۋا قوجالىق جەتەكشىلەرى قاتىستى.
«قازگيدروپونيكا» ءجشس-نىڭ لەنتاسىن سالا ارداگەرلەرى امانكەلدى كارەنتاي ۇلى مەن ساعىنحان امىرەقۇل ۇلى قيعاننان كەيىن، سەرىكتەستىكتىڭ اتقارۋشى ديرەكتورى دانيار اۋباكىروۆ كۇنىنە 400 كەلى گيدروپونيكالىق قوندىرعى وندىرەتىن سەح جۇمىسىمەن تانىستىردى.
– «گيدروپونيكا تەحنولوگياسىن پايدالانۋ ارقىلى ءبىر شارشى مەترىنەن ساۋىن سيىردى كۇنى بويى ازىقتاندىرۋعا جەتكىلىكتى 20-25 كەلى جاسىل جەلەك الا وتىرىپ، ءسۇت ونىمدىلىگىن 30-40 پايىزعا، ال مايلىلىعىن 3-4 پايىزعا دەيىن ارتتىرۋعا جانە ەت باعىتىنداعى ءىرى قارا مالدىڭ كۇندىگىنە 800-1500 گرامم قوسىمشا سالماق قوسۋىنا مۇمكىندىك تۋادى، – دەيدى سەرىكتەستىك باسشىسى دانيار وڭىلاسىن ۇلى.
تاراز قالاسىنداعى اۆتوبەكەت ماڭىندا ورنالاسقان سەح تولىعىمەن جاراقتاندىرىلعان جانە 12 ادام تۇراقتى جۇمىسپەن قامتىلعان. الداعى ۋاقىتتا سەرىكتەستىك گيدروپونيكا تەحنولوگياسىن قولدانا وتىرىپ، وبلىستاعى شارۋاشىلىقتاردى گيدروپوندى قۇرىلعىلارمەن جابدىقتاۋدى كوزدەپ وتىر. ناتيجەسىندە شارۋالار جاڭا تەحنولوگيانىڭ ارقاسىندا جەر جىرتىپ، مال ازىعى از دەپ الاڭدامايتىن كۇنگە جەتپەك.
اتقارۋشى ديرەكتوردىڭ ايتۋىنشا، گيدروپونيكا ءادىسى ارقىلى دايىندالعان ونىمدەر ارپا داقىلىنىڭ قۇنارلىعىمەن پارا-پار ەكەن. «جاسىل جەمدى پايدالانعان شارۋا ۆەتەرينارلىق اۋرۋلاردى دا ءبىرجولاتا ۇمىتادى»، - دەيدى ماماندار.
ءيا، بۇل ءسوز جوق، جانعا جىلۋ بەرەتىن جاڭالىق. قوجالىقتار ءتورت تۇلىگىنە قارجى ۇنەمدەپ، تازا، ءارى قۇنارلى جەممەن ازىقتاندىرا الاتىن مۇمكىندىككە يە بولىپ وتىر. بۇدان شارۋالاردىڭ شارۋاسى شالقيتىنى ءسوزسىز. جانە مۇنداي باستاما كەڭەستىك كەزەڭدەگى كورسەتكىشتى دىتتەپ، اۋليەاتا ءوڭىرىن ماڭىراعان مالعا تولتىرادى دەگەن ءۇمىت مول. ەندەشە تىرلىگىن ەندى تىكتەي باستاعان سەرىكتەستىكتىڭ جۇمىسىنا ساتتىلىك تىلەيىك. مەملەكەتتىك باعدارلامالاردىڭ شاراپاتى دەگەن وسى.
جايدار ازامات
