قاراعاندىداعى بولىمدە بولعان اتىستان اماندىق قالييەۆتىڭ اياعى سەمىپ قالعان. وق تيگەن ەتى مەن تامىرلارىن دارىگەرلەر سىلىپ الىپتى. ەندى مۇگەدەكتىك الۋعا قۇجاتتىڭ ءتۇپنۇسقاسىنىڭ بولماۋى قولبايلاۋ. سەبەبى اسكەري بولىمدەگىلەر كوميسسياعا كەرەك دەرەكتەردى بەرمەك تۇگىلى، قارۋلى شابۋىل جايىندا ايتۋعا تىيىم سالدى دەيدى اماندىقتىڭ اناسى. ال وفيسەرلەر اتىسقا قاتىستى ۇكىمنىڭ ءالى كۇشىنە ەنبەگەنىن العا تارتتى دەپ حابارلايدى Qamshy.kz اقپارات اگەنتتىگى كتك تەلەارناسىنا سىلتەمە جاساي وتىرىپ.

21 جاستاعى اماندىق قالييەۆتىڭ وڭ اياعىنىڭ دىمى قالماعان. وق تيگەن ەتىن سىلىپ الىپ، قۋ سۇيەگى تۇر. سەگىز اي بۇرىن اسكەري بولىمدە بولعان اتىستان ءوزى قاتتى شوشىنعان. كۇيزەلىستەن ارەڭ شىعىپ، كوپشىلىكپەن سويلەسۋگە دە قۇلقى جوق. ساۋ بالاسىنىڭ اسكەردەن جارىمجان بولىپ ورالعانىنا اناسى كۇيىنەدى.

كۇلان قالييەۆا، ا. قالييەۆتىڭ اناسى:

"ءبىر جىلعا جىبەرگەنىمدە مىنە، بالامدى مۇگەدەك قىلىپ الىپ كەلدى. ەندى قايدا جۇمىس ىستەيدى؟ بۇكىل ءومىرى ويران بولدى."،- دەيدى.

بىلتىر قىركۇيەك ايىندا قاراعاندىداعى اسكەري بولىمدە ساربازداردىڭ ءبىرى قولىنا اۆتومات الىپ، ءتۇن جارىمىندا ءوز قاتارلاستارىنا وق جاۋدىرماق بولادى. وفيسەرلەرىن قۋالاپ ءجۇرىپ، ءولتىرۋدى كوزدەيدى. ءبىراق جاۋىنگەر اماندىق قالييەۆ ونىڭ قولىنا جابىسىپ، ساربازدان قارۋىن تارتىپ الماق بولعان. سول كەزدە ءوزىنىڭ اياعىنا وق ءتيىپ، قولى كۇيگەن. ال قالعان اسكەريلەر وقتان امان قالادى. ءبىراق ءبولىم باسشىلارى "اماندىق ابايسىزدا اياعىن اتىپ الدى" دەپ حابار تاراتىپ، "وقيعانى جاسىرماق بولعان" دەيدى ساربازدىڭ اناسى.

كۇلان قالييەۆا:

"تالابىم بالامنىڭ شىندىعىن ەلگە ايتسىن، قالاي بولعانىن. وفيسەرلەرىنىڭ بۇكىل ۆزۆودتىڭ جانىن قورعاپ قالعانىن ايتسىن. ءيا، راقمەتىن دە ايتقان جوق. ءيا، كەشىرىم دە سۇراعان جوق."

بىلتىر قاتارلاستارىنا قارۋ الا جۇگىرگەن سارباز سەگىز جىلعا سوتتالدى. ال اسكەري ءبولىم باسشىلارى سول وقيعاعا قاتىستى ءالى كۇنگە ءتىس جارعىسى جوق.

تالعات ءابدىروۆ، №52859 اسكەري ءبولىم كومانديرى:

"قالييەۆ ءبىزدىڭ اسكەري بولىمدە بورىشىن وتەدى. بىلتىرعى وقيعاعا قاتىستى سوتتىڭ ۇكىمى شىققانىمەن، ول كۇشىنە ەنگەن جوق. ودان بولەك ەكىنشى ساتىدا ءىس قارالاتىن بولادى. سوندىقتان ءبىز ەشتەڭە ايتا المايمىز."

ءقازىر اماندىق قالييەۆ مۇگەدەكتىككە قۇجات دايىنداپ ءجۇر. ءبىراق كوميسسيا ونى قابىلدار ەمەس. سەبەبى قاراعاندىداعى اسكەري ءبولىم ونىڭ قايدا ەم الىپ، اۋرۋحانادان قاشان شىققانى، جاراقاتىنا قاتىستى وزگە دە قۇجاتتاردىڭ ءتۇپنۇسقاسىن بەرمەي قويىپتى. اسكەريلەردىڭ مۇنداي قىلىعىنا ساربازدىڭ تۋىستارى اشىنىپ وتىر.

ۇسىنعان: بەك بايتاس