تالدىقورعاندا  2-قاباتتان قۇلاپ، كوماعا تۇسكەن ءبۇلدىرشىن ساۋىقتى دەپ حابارلايدى Qamshy.kz اقپارات اگەنتتىگى ەۋرازيا ءبىرىنشى ارناسىنا سىلتەمە جاساپ. 

ەكى اپتا بويى ءومىر ءۇشىن ارپالىسقان دارىگەرلەردىڭ ارقاسىندا 2 جاستاعى قىز بالا ساۋىعىپ، اۋرۋحانادان شىعارىلدى. دارىگەرلەر دەنساۋلىعىنىڭ جاقسارعانىن، اتا-اناسىن تانيتىنىن ايتادى. ال، كىشكەنتاي قىزدى تەرەزەگە شىعارىپ قويىپ، وسىنداي جاعدايعا جەتكىزگەن تاربيەشىگە جازا تاعايىندالدى ما؟ 
 
ارۋنا قۋانىش قىزى 15 مامىردا №19 مەكتەپ-گيمنازياسىنا قاراستى شاعىن ورتالىقتىڭ 2- قاباتىنان قۇلاپ كەتكەن. ونىڭ بالاباقشاعا بارىپ جۇرگەنىنە نەبارى 2-اق كۇن بولعان ەكەن. ال، اتالعان ورتالىق اشىلعالى جۇمىس ىستەپ كەلە جاتقان تاربيەشى ءدال سول كۇنى 2 بىردەي ءبۇلدىرشىندى اشىق تۇرعان تەرەزەگە تۇرعىزىپ قويعان. زارداپ شەككەن ءبۇلدىرشىن ءقازىر اتا-اناسىنىڭ جىلى قۇشاعىندا. دارىگەرلەر "ءومىر مەن ءولىم اراسىندا ارپالىسقان قىزدىڭ قازىرگى جاعدايى جاقسى" دەيدى.

دەگەنمەن، ءالى دە اق حالاتتىلاردىڭ باقىلاۋىندا بولادى ەكەن. 

"بالا سويلەيدى، اكە-شەشەسىن تانيدى، تاماق ىشەدى، ۇلكەن دارەتى جاقسى. ەشكىم ۇستاماي ءوزى جۇرەدى. ءبىراق، ءبارى ءبىتتى دەپ ايتۋعا بولمايدى. 2-3 ايدا كەلىپ قارالىپ تۇرادى. 6 ايدان كەيىن باسىنا تاعى دا كومپيۋتەر توموگرافياسىن جاساپ كورەمىز"، - دەيدى كوپسالالى وبلىستىق بالالار اۋرۋحاناسىنىڭ ديرەكتورى مارات دوسقالاييەۆ.

تاربيەشىنىڭ سالعىرتتىعىنان قيىن جاعدايعا تاپ بولعان ءسابيدىڭ اتا-اناسى مەكتەپتە ءمۇعالىم ەكەن. اكەسى دەنە شىنىقتىرۋ ءپانىنىنىڭ، ال اناسى - باستاۋىش سىنىپ وقىتۋشىسى. بولعان جايتقا قاتىستى ازىرگە سۇقبات بەرۋگە دايىن ەمەسپىز دەپ وتىر. ال، وقيعا بولعان بالاباقشادا 2 اپتا بۇرىن قىزىلشا اۋرۋىنىڭ الدىن الۋ ماقساتىندا كارانتين جاريالانىپتى. جۇمىس ىستەپ تۇرعان ورتالىققا ەشكىمدى كىرگىزبەيدى.

10 جىل بويى بالا قاراپ، ولقىلىققا جول بەرگەن تاربيەشىگە قاتىستى تەرگەۋ امالى باستالىپ كەتكەن ەكەن. ءقازىر ىسكە قاتىستى ءتيىستى ساراپتامالار تاعايىندالعان.

"وسى دەرەككە قاتىستى ق ر قىلمىستىق كودەكسىنىڭ 141-بابىنا سايكەس، قىلمىستىق ءىس قوزعالدى. ءبۇلدىرشىن اۋرۋحانادان شىقتى. وسىعان وراي بارلىق مەديسينالىق قۇجاتتار تالاپ ەتىلدى. وسى قۇجاتتار نەگىزىندە سوت-مەديسينالىق ساراپتاما تاعايىندالدى" - دەدى الماتى وبلىستىق پوليسيا دەپارتامەنتىنىڭ رەسمي وكىلى سەرىك ۇپييەۆ.

پوليسەيلەردىڭ سوزىنشە، پروسەسستىك شەشىم شىققان سوڭ عانا تاربيەشىگە قاتىستى ناقتى جازا تاعايىندالۋى مۇمكىن. ءقازىر ول جۇمىستان شەتتەتىلگەن.