نۇر-Cۇلتاندا 4 ماۋسىمدا "نۇر وتان" پارتياسىنىڭ ورتالىق عيماراتىنا "سوت ۇكىمىنە نارازىمىز" دەگەن ادامدار جينالىپ، شاعىمدارىن جەتكىزدى دەپ جازادى Qamshy.kz اقپارات اگەنتتىگى “ازاتتىق راديوسىنا” سىلتەمە جاساپ.

بۇل جيىنعا سوت شەشىمىنە نارازى ونداعان ادام جينالعان. ولاردىڭ ىشىندە «زاڭسىز سوت شەشىمىنىڭ نەگىزىندە جالعىز باسپاناسىنان ايىرىلدىق»، «بالاسىنىڭ ءولىمىن دۇرىس تەرگەمەدى»، «جاقىنىن جازىقسىز تۇرمەگە وتىرعىزدى» دەپ كەلگەندەر بولعان. نارازىلار الماتى، كوكشەتاۋ، پەتروپاۆل مەن پاۆلودار قالالارىنان كەلگەن. “ازاتتىق” وسى جيىننان تىكەلەي ەفير تاراتۋدا.

“بىرنەشە كۇن بۇرىن «نۇر وتان» پارتياسىنىڭ اتىنان سايلاۋعا ءتۇسىپ جاتقان قاسىم-جومارت توقايەۆتىڭ بىزبەن كەزدەسۋىن سۇراپ، رەسمي شاقىرۋ جىبەرگەنبىز. بۇگىنگە دەيىن ەشقانداي جاۋاپ كەلگەن جوق. سوندىقتان ءوزىمىز كەلىپ، كەزدەسكىمىز كەلەدى. ءبىز – زاڭسىز سوت شەشىمىن قايتا قاراۋ ءۇشىن ارنايى كوميسسيا قۇرۋدى تالاپ ەتەمىز”، - دەيدى وسى جيىنعا قاتىسۋشى ساناۆار زاكيروۆا.

نۇر-سۇلتان قالاسىندا جۇرگەن الماتىلىق بەلسەندى ساناۆار زاكيروۆا اۋەلدە ءوزىن پوليسەيلەر تورۋىلداپ، «نۇر وتان» پارتياسىنىڭ عيماراتىنا بارۋىنا كەدەرگى كەلتىرگەنىن ايتادى.

جينالعاندار الدىنا "نۇر وتان" پارتياسىنىڭ رەسپۋبليكالىق قوعامدىق قابىلداۋى باسشىسىنىڭ ورىنباسارى ارىستانعالي سانسىزبايەۆ شىعىپ، شاعىمداردى تىڭدادى. ول جيىندا ايتىلعان ءوتىنىش، شاعىمداردىڭ ءتيىستى جەرىنە جەتكىزىلەتىنىن ايتتى.

ارىستانعالي سانسىزبايەۆ پرەزيدەنت توقايەۆتىڭ جۇمىس ساپارىمەن ەل ارالاپ جۇرگەنىن جانە وسى جيىن جايلى بىلمەيتىنىن ايتا كەلىپ، جينالعاندارمەن كەزدەسۋ مۇمكىندىگىن جوققا شىعاردى. بەلسەندى ساناۆار زاكيروۆا شاعىنعان ادامداردىڭ ارىزى بويىنشا كوميسسيا قۇرۋ تۋرالى

 "نۇر وتان" پارتياسىنا 15 مامىردا جانە 24 مامىردا ءوتىنىش تۇسىرگەنىن ايتتى. ول جينالعان ادامدار پرەزيدەنت توقايەۆپەن كەزدەسپەي تارقامايدى دەيدى. جينالعاندار تارقامعان سوڭ ولاردىڭ الدىنا "نۇر وتان" پارتياسى ورتالىق اپپاراتىنىڭ باسشىسى ءمادي وسپانوۆ تا شىعىپ، زاڭ ورىندارى وكىلدەرىمەن كەزدەسۋ ۇيىمداستىرىلاتىنىن ايتتى.

ۇسىنعان: يلدار اديلچەنوۆ