كوكشەتاۋ قالاسىندا كوپبالالى، تولىق ەمەس، الەۋمەتتىك جاعىنان از قامتىلعان وتباسىلار مەن جەتىمدەرگە 70 پاتەردىڭ كىلتى تاپسىرىلدى دەپ حابارلايدى Qamshy.kz اقپارات اگەنتتىگى.
«سارىارقا» شاعىن اۋدانىندا وتكەن شاراعا اقمولا وبلىسى اكىمى ەرمەك مارجىقپايەۆ قاتىسىپ، تۇرعىندارعا جاڭا پاتەر كىلتىن تاپسىردى. اتالعان ءتۇرعىن ءۇي مەملەكەتتىك «نۇرلى جەر» باعدارلاماسى بويىنشا سالىنىپ وتىر. كوپقاباتتى جاڭا تۇرعىن ۇيدەن باسپانالى بولىپ وتىرعاندار اراسىندا كوپبالالى جانە الەۋمەتتىك جاعىنان از قامتىلعان وتباسىلار، جەتىمدەر بار.
«وڭىردە تۇرعىنداردى باسپانامەن قامتاماسىز ەتۋ ماسەلەسى ەرەكشە نازاردا. مەملەكەت باسشىسىنىڭ باستاماسىمەن قولعا الىنعان «نۇرلى جەر» باعدارلاماسى اقمولا وبلىسىندا ويداعىداي جۇزەگە اسىرىلۋدا. مۇنىڭ ءبارى تۇرعىنداردىڭ مۇددەسى ءۇشىن. وتكەن جىلى بۇل باعىتتا قىرۋار شارۋا اتقارىلدى. بيىل دا سول كورسەتكىشتەرگە قول جەتكىزەتىن بولامىز. بۇگىن مىنە، العاشقى 70 پاتەردىڭ كىلتىن تاپسىرىپ وتىرمىز»، - دەدى ەرمەك مارجىقپايەۆ جاڭا پاتەر يەلەرىن قۇتتىقتاۋ سوزىندە.
پاتەر الىپ قۋانىشقا كەلگەندەردىڭ ءبىرى، «التىن القا» يەگەرى، 10 بالا تاربيەلەپ وسىرگەن سۆەتلانا ءسادۋاقاسوۆا قازاقپارات تىلشىسىنە ءوزىڭنىڭ قۋانىشىمەن ءبولىستى.
«پاتەر كەزەگىندە تۇرعانىما بيىل 14 جىل بولادى. 10 بالا تاربيەلەپ ءوسىردىم. وسىعان دەيىن پاتەر جالداپ تۇردىم. ارينە، قيىندىقتار بولدى. اقشاسىن تولەسەڭدە بىرەۋدىڭ قاس-قاباعىنا قاراپ ءجۇرۋ وڭاي ەمەس. پاتەر جالداپ جۇرگەن كەز بەن قازىرگى جاعدايىمدى سالىستىرۋعا بولمايدى. قۋانىشىمدا شەك جوق. انا رەتىندە بارشا قازاقتاندىقتارعا باسپانا باقىتىن تىلەيمىن»،- دەدى باتىر انا سۆەتلانا ءسادۋاقاسوۆا. سونىمەن قاتار، باسپانالى بولعانداردىڭ اراسىندا بالالار ءۇيىنىڭ تاربيەلەنۋشىلەرى دە بار. «مەن بالالار ۇيىنەن 2010 جىلى شىقتىم. سودان بەرى پاتەر كەزەگىندە تۇرمىن. ءقازىر ءوز وتباسىم بار، ەكى بالانىڭ اكەسىمىن. ءوزىمدى باقىتتى سەزىنەمىن. ءبىراق بۇگىنگە دەيىن ءوز ءۇيىم بولعان جوق. بۇگىن ماعان ەكى بولمەلى پاتەر بەردى. وسىنداي يگى ىستەرگە قول ۇشىن سوزىپ وتىرعان ازاماتتارعا ۇلكەن العىسىمدى بىلدىرەمىن»،- دەدى جاڭا پاتەر يەسى رومان چەپ.
ايتا كەتەيىك، بۇگىنگى كۇنى كوكشەتاۋ قالاسىندا 2 مىڭنان استام كوپ بالالى وتباسى بولسا، ونىڭ 400 جۋىعى پاتەر كەزەگىندە تۇر. سونىدقتان، بيىلعى جىلى بارلىعى 470 پاتەر كىلتىن تاپسىرۋ جوسپارلانعان. ونىڭ ءبىرازى تۇرعىن ءۇي قۇرىلىس جيناق بانكى ارقىلى شەشىمىن تاپپاقشى.
پىكىر قالدىرۋ