2019 جىلدىڭ 1 ماۋسىمىندا ساعات 12.00-دە «بارىس ارەنا» سپورت سارايىندا (تۇران داڭعىلى، 75/1) XIV حالىقارالىق «جۇلدىزاي» بالالار شىعارماشىلىعى فەستيۆالىنىڭ گالا-كونسەرتى ءوتتى دەپ حابارلايدى Qamshy.kz اقپارات اگەنتتىگى BI Juldyzai قورىنىڭ باسپا ءسوز قىزمەتىنىڭ اقپاراتىن نەگىزگە الا وتىرىپ.
فەستيۆال 10 اقپاندا باستالىپ، ەلىمىزدىڭ بارلىق وڭىرلەرىن قامتىدى. بيىلعى جىلى شىعارماشىلىق بايقاۋعا قاتىسۋعا 7750 ءوتىنىم ءتۇستى. ەكىنشى حالىقارالىق كەزەڭ - 26-31 مامىر ارالىعىندا نۇر-Cۇلتان قالاسىندا ءوتتى. وعان 255 بالا قاتىسىپ، ەڭ جارقىن نومىرلەر گالا-كونسەرت باعدارلاماسىنا ەنگىزىلدى.
بايقاۋعا قولداۋ بىلدىرگەن ەسترادا جۇلدىزدارى داۋلەت بولاتوۆ، بالجان بيداش، ايشا، نازىم ءابىلدينا جانە «گولوس. دەتي» جوباسىنىڭ جەڭىمپازى ماكسيم ەرجان قاتىسۋشىلارمەن بىرگە ساحنادا ونەر كورسەتتى.
فەستيۆالدىڭ ەرەكشە اسەر قالدىرعان ساتتەرىنىڭ ءبىرى، قوس زاعيپ بالانىڭ شىرقاعان ءانى. ولار – شىمكەنت قالاسىنان 9-جاستاعى ايبىن جۇمابەكوۆ جانە الماتى قالاسىنان 11-جاستاعى نادير مۇحاممەد ەسىمدى جىگىتتەر. كوزى كورمەسە دە، كوكىرەگى وياۋ بالالاردىڭ "ەلەستەر" ءانى حالىقتىڭ جۇرەگىنە بىردەن جول تاپتى. بۇل تۋرالى BI Group ينۆەستيسيالىق جانە قۇرىلىس حولدينگىنىڭ اكسيونەرى جانە ديرەكتورلار كەڭەسىنىڭ ءتوراعاسى ايدىن راحىمبايەۆ ءوز الەۋمەتتىك جەلىسىندە جازعان بولاتىن.
«وسى ولەڭدى تىڭداپ، ءاربىر ءسوزىن ۇعىنىپ، كوز جاسىمدى توقتاتا المادىم. مىڭداپ جينالعان كورەرمەندەر دە كوزىنە جاس الدى. وسىنداي ولەڭدى تاڭداپ، ورىنداعان شىمكەنت پەن الماتىنىڭ 9 جانە 12 جاسار بالالارىن كورگەندە، ەموسياسىز قالۋ مۇمكىن ەمەس...»،- دەلىنگەن جازبادا.
بالالاردىڭ تالانتىن بايقاعان جەلى قولدانۋشىلارى ولارعا ءتانتى بولىپ، جارىسا جاقسى تىلەكتەر جازۋدا.
«جۇلدىزاي» فەستيۆالى ءبىلىم جانە عىلىم مينيسترلىگىنىڭ قولداۋىمەن 2005 جىلدان بەرى وتكىزىلىپ كەلەدى. قازاقستاننىڭ تۇكپىر-تۇكپىرىنەن ەرەكشە بالالاردى بىرىكتىرەتىن بايقاۋدىڭ تانىمالدىعى جىل سايىن وسۋدە. ماسەلەن، ەگەر ءبىرىنشى جىلى وعان 76 بالا قاتىسسا، بيىل 7 750 بالا قاتىسۋعا نيەت ءبىلدىردى. وسى جىلى جيناقتالعان تاجىريبە مەن ينكليۋزيۆتى جوباعا دەگەن قىزىعۋشىلىقتى ەسكەرە وتىرىپ، قور ونى حالىقارالىق دەڭگەيگە شىعاردى. قاتىسۋعا ءوتىنىم بەرگەن ەلدەر اراسىندا ‒ گرۋزيا، بەلارۋسسيا، تۇركيا، رەسەي جانە فرانسيا بار. جاڭارتىلعان فەستيۆال ەرەكشە قاجەتتىلىكتەرى بار دارىندى بالالارعا ارنالعان «ترامپلين» بولادى، ولاردىڭ شىعارماشىلىق داعدىلارىن شىڭداۋعا جانە ونەرىن حالىقارالىق الاڭدا كورسەتۋگە مۇمكىندىك بەرەدى.
«BI-جۇلدىزاي» كورپوراتيۆتىك قايىرىمدىلىق قورى كوممەرسيالىق ەمەس ۇيىم بولا وتىرىپ، شىعارماشىلىق، ونەر جانە سپورت ارقىلى ەرەكشە قاجەتتىلىكتەرى بار بالالاردى الەۋمەتتىك بەيىمدەۋ جانە ىقپالداستىرۋ ماقساتىندا 14 جىل بويى بالالار شىعارماشىلىعىنىڭ رەسپۋبليكالىق فەستيۆالى مەن «جۇلدىزاي» سپارتاكياداسىن وتكىزەدى.
قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ XIV حالىقارالىق بالالار شىعارماشىلىعىنا ارنالعان «جۇلدىزاي» فەستيۆالىنىڭ گالا-كونسەرتىنە قاتىستى. حالىقارالىق بالالاردى قورعاۋ كۇنىندە مەرەكەلىك ساحنادا قازاقستاننىڭ تۇكپىر-تۇكپىرى مەن شەتەلدەردەن كەلگەن 255 ەرەكشە نازاردى قاجەت ەتەتىن دارىندى بالا ونەر كورسەتتى. جەتى مىڭنان استام كورەرمەن بالالاردىڭ ونەرىنە تامسانا كۋا بولدى. جاس تالانتتار «بارىس-ارەنا» سپورت كەشەنىنىڭ ساحنالىق الاڭىن ەستەن كەتپەس ەرەكشە اتموسفەراعا بولەپ، جينالعان قاۋىمعا مەرەكەلىك كوتەرىڭكى كوڭىل-كۇي سىيلادى. ولار وزدەرىنىڭ شەكسىز شىعارماشىلىق مۇمكىندىكتەرىن، ەرىك-جىگەرىن، ءور رۋحى مەن ەرتەڭگە دەگەن سەنىمدەرىن پاش ەتتى. «جۇلدىزاي» فەستيۆالى بارلىق تالانتتى جانە ءوز ماقساتتارىنا سەنىمدى، ارمانعا قانات قاققان بالالاردى ۇلكەن ءبىر وتباسىنا جينادى. ولاردىڭ وسىنداي ۇلكەن كومانداعا جينالۋىنا كۇش سالىپ، اتالمىش شىعارماشىلىق فەستيۆالدىڭ وتۋىنە تىكەلەي جەتەكشىلىك ەتكەن قايىرىمدىلىق قورىنىڭ ەڭبەگى. قاتىسۋشىلار تالانت پەن ارمانعا دەگەن قۇلشىنىس بار كەزدە ەشقانداي مۇمكىندىككە شەكتەۋ قويىلمايتىنىن بيىلعى جىلى تاعى ءبىر مارتە دالەلدەدى.
دايىنداعان: بەك بايتاس
پىكىر قالدىرۋ