ق ر تۇڭعىش پرەزيدەنتىنىڭ «بەس الەۋمەتتىك باستاماسىن»، ونىڭ ىشىندە ەلباسىنىڭ «ءاربىر وتباسى ءۇشىن تۇرعىن ءۇي ساتىپ الۋدىڭ جاڭا مۇمكىندىكتەرى» ءبىرىنشى باستاماسىن جۇزەگە اسىرۋ اياسىندا قاراعاندىنىڭ اقادىر كەنتىندە كوپبالالى وتباسىلار باسپانامەن قامتىلدى دەپ حابارلايدى Qamshy.kz اقپارات اگەنتتىگى.

كوپبالالى جانۇيالارعا بەرىلگەن ءاربىر جەر ۇيلەردىڭ تۇرعىن ءۇي اۋماعى 100 شارشى مەتردەن اسادى. ۇيلەر تۇرمىسقا قاجەتتى جيھازبەن جابدىقتالعان. تۇرعىن ۇيلەردى كوپبالالى وتباسىلارعا «استانا موتورس» كومپانياسى سىيعا تارتتى.   

باسپانا كىلتتەرىن تابىس ەتۋ راسىمىنە قاراعاندى وبلىسىنىڭ اكىمى ەرلان قوشانوۆ پەن «استانا موتورس» كومپانياسىنىڭ پرەزيدەنتى نۇرلان سماعۇلوۆ تا كەلدى. 

«ەلباسىنىڭ تاپسىرماسى بويىنشا وڭىردە كوپبالالى وتباسىلارعا ەرەكشە كوڭىل بولىنۋدە. بۇل جانۇيالاردىڭ ءارقايسىسى ءۇشىن ەڭ وزەكتى ماسەلە – ءوز باسپاناسىنىڭ بولماۋى. بۇل ماسەلەنى شەشۋگە كاسىپكەرلەر كومەكتەسۋدە. بيىل كەزەكتە تۇرعاندار قاتارىنان 700 وتباسى پاتەر كىلتتەرىن الادى. ولاردىڭ ۇشتەن ءبىرى بيزنەسمەندەردىڭ كومەگىمەن جاڭا باسپاناعا قونىستانادى. تاۋەلسىزدىگىمىز قالىپتاسا باستاعاننان بەرى مەملەكەت كاسىپكەرلەردى قولداپ كەلەدى. بۇگىن بيزنەس اياقتارىنا نىق تۇرىپ، مەملەكەتكە الەۋمەتتىك ماسەلەلەردى شەشۋگە كومەكتەسەتىن كەز كەلدى. بالالارىمىز بەن نەمەرەلەرىمىز وسىنداي ۇلى ادامداردى ۇلگىگە الا وتىرىپ، ءوسىپ-ونۋى ءتيىس. ءدال وسىنداي شارالار «تۋعان جەر» يدەياسىن - ءوزىنىڭ تۋعان جەرىنە، وتانىنا كومەك كورسەتۋ كەرەكتىگىن ناقتى مىسال رەتىندە كورسەتەدى»، - دەدى وبلىس اكىمى ەرلان قوشانوۆ. 

تۇرعىن ۇيلەر قونىستانۋشىلاردىڭ جاڭا ءومىر باستاپ، شارۋاشىلىقپەن اينالىسۋىنا ىڭعايلى ەتىپ جابدىقتالعان. جەكە جەر تەلىمى بار تۇرعىن جايلاردىڭ ەندىگى يەلەرى باۋ-باقشا ەگۋىلەرىنە مۇمكىندىكتەرى بار. 

«جاسىم 32-دە. 4 بالانىڭ اناسىمىن. باسپانا كەزەگىندە 8 جىلداي تۇردىق. بۇگىن مىنە ءزاۋلىم سارايداي ءۇيدىڭ يەسى اتاندىق. قۋانىشىمىزدا شەك جوق. قاسيەتتى رامازان ايىندا باسپانالى بولىپ جاتىرمىز. اسىرەسە، بالالارىم ريزا. ءۇي ۇلكەن، جارىق. اۋلاسى دا كەڭ. بالالاردىڭ ويناۋىنا ىڭعايلى ەتىپ اباتتاندىرىلعان، ءۇيدىڭ ارتىندا باۋ-باقشاعا ارنالعان جەرى دە بار، وندا كوكونىس ەگىپ، شارۋاشىلىقپەن اينالىسۋعا بولادى. ءۇيىمىز ورتالىقتا ورنالاسقان، بالالاردىڭ مەكتەبىنە دە جاقىن. قاتتى قۋانىشتىمىز. كوپبالالى وتباسىلارعا كورسەتىلگەن قامقورلىقتارى ءۇشىن مەملەكەتكە، «استانا موتورس» كومپانياسىنىڭ باسشىلىعىنا العىسىم شەكسىز»، - دەيدى كوپبالالى انا ايزادا رىسپەكوۆا. 

«استانا موتورس» كومپانياسى كوپبالالى وتباسىلارعا قولداۋ كورسەتىپ عانا قويماي، جەرگىلىكتى مەكتەپتىڭ تالانتتى تۇلەكتەرىن ەلىمىزدىڭ ۇزدىك جوعارى وقۋ ورىندارىندا وقىتپاق. 

«اقادىر - مەنىڭ كىشى وتانىم. بۇل جەردە مەنىڭ اكەم ءوسىپ، بالالىق شاعىن وتكىزگەن. بۇل جەر مەنىڭ اتا-بابالارىم ءۇشىن ىستىق بولعان مەكەن. تابىسقا جەتكەن كەز كەلگەن ادام ءوزىنىڭ وتانى الدىنداعى قارىزىن قايتارۋى ءتيىس. مەن بۇگىن ءوز تۋىستارىما كومەكتەسىپ جاتقانىما قۋانىشتىمىن. ءبىزدىڭ كومپانيا قايىرىمدىلىقپەن بەلسەندى تۇردە اينالىسادى، ادامدارعا كومەكتەسەدى. بۇل ءبىزدىڭ تۇجىرىمدامامىز، ءبىزدىڭ ءومىر سالتىمىز جانە ءبىزدىڭ فيلوسوفيامىز»، - دەدى نۇرلان سماعۇلوۆ. 

كومپانيا اقادىر تۇرعىندارى ءۇشىن 2011 جىلى «استانا موتورس» بالالار مەن جاسوسپىرىمدەر سپورت مەكتەبىن سالعان. وندا بالالار باسسەينى مەن كۇرەس زالى بار. سپورتتىق نىساندا دزيۋدو، سامبو، قازاقشا كۇرەس، فۋتبول چەمپيوناتتارى وتەدى. 

قاراعاندى وبلىسى اكىمدىگىنىڭ مالىمەتىنشە، بيىل اقادىر كەنتىندە 70 پاتەرلى تۇرعىن ءۇي قالپىنا كەلتىرىلىپ، پايدالانۋعا بەرىلدى. قونىستانۋشىلار اراسىندا كوپبالالى وتباسىلار بولدى. ولاردىڭ بارلىعى تۇرعىن ءۇي الۋ كەزەگىندە تۇرعان. 

بيىل كەنتتە 32 پاتەرلى ءۇي سالىنادى. كەلەسى جىلى تاعى ەكى كوپقاباتتى ءۇي پايدالانۋعا بەرىلمەك. 

ەسكە سالايىق، بۇعان دەيىن ايماقتا 27 وتباسى ءوز پاتەرلەرىنە يە بولعان بولاتىن. 1 مامىر كۇنى وبلىستىڭ تەمىرتاۋ، بالقاش، ساران، قاراجال، اباي، پريوزەرسك، شاxتينسك قالالارىندا، بۇقار جىراۋ، قارقارالى، جاڭاارقا جانە نۇرا اۋداندارىنداعى كوپبالالى وتباسىلارعا دا پاتەر كىلتتەرى تابىس ەتىلگەن. 

سونداي-اق، مامىر ايىنىڭ سوڭىندا قاراعاندىلىق 86 كوپبالالى وتباسى قونىس تويىن تويلادى. 

قاراعاندى وبلىسى اكىمدىگىنىڭ مالىمەتىنشە، بيىل وبلىستا 560 كوپبالالى وتباسى باسپانالى بولماق.