ۇستىمىزدەگى جىلدىڭ 26ء-ساۋىر كۇنى الماتى وبلىسى ەسكەلدى اۋدانىنا قاراستى قاينارلى اۋىلىندا ايتىپ جەتكىزۋگە كەلمەيتىن سۇمدىق وقيعا ورىن العان بولاتىن. وسى جاعداي بويىنشا Qamshy.kz اقپارات اگەنتتىگى تولىق اقپاراتتى وزدەرىڭىزگە ۇسىنباق.

اۋىل مولداسى ءقادىر امبيە ۇلى ءوزىنىڭ وتباسىلىق دوسى، ءدىن جولىنداعى جاماعاتى ەسحات اينەكبەك ۇلىنىڭ ايەلى، ءۇش بالانىڭ اناسى نۇرعيزا ازاتحانقىزىنا زورلىق-زومبىلىق قىلىپ، زينا جاساعان بولاتىن. اردىڭ اۋىرلىعىن كوتەرە الماي، بەس ۋاقىت ناماز وقيتىن مارقۇم نۇرعيزا ازاتحان قىزى وز-وزىنە قول سالعان. ەسحات اينەبەك ۇلى قازاقستان رەسپۋبليكاسىنىڭ پرەزيدەنتى قاسىم-جومارت توقايەۆقا، ىشكى ىستەر ءمينيسترى ەرلان تۇرعىمبايەۆقا، ق ر باس پروكۋرورى عيزات نۇرداۋلەتكە ۆيدەو ارقىلى اشىق حات جولداعان. ول ايەلىنىڭ ولىمىنە سەبەپكەر بولعان الماتى وبلىسى ەسكەلدى اۋدانى قاينارلى اۋىلىنىڭ مولداسىن جازاعا تارتۋىن سۇراعان. تولىق مالىمەتتى وسى جەردەن وقىڭىز: قاينارلىداعى قايعىلى وقيعا: مولدانى قانداي جازا كۇتپەك؟ (فوتورەپورتاج)

قازىرگى ۋاقىتتا ءقادىر امبيەۇلىنا قاتىستى تەرگەۋ ءىسى تالدىقورعان قالالىق ىىد-دە ءجۇرىپ جاتىر. ەسحات اينەكبەك ۇلى:

«ءقازىر ءىس قوزعالىپ جاتىر. قالالىق ءىىد قىزمەتكەرى نۇرمۇحانوۆ مۇرات جالەل ۇلى ءوز قولىنا الىپ، ءىستى تولىق زەرتتەپ جاتىر. وسى كەزدە ساراپتاما ءجۇرىپ جاتىر دەپ وتىر. قاي كەزدە بىتەرى بەلگىسىز. ءبىر جارىم ايدىڭ ىشىندە ءبىراز باردىم. تاۋدان اۋىلعا تۇسكەن كۇنى مىندەتتى تۇردە كىرىپ-شىعامىن، ايتەۋىر. جاقىن ارادا شەشىلسە دۇرىس بولار ەدى. كەشە عانا مارقۇم جارىمنىڭ قىرقىن بەردىم»،- دەدى تىلشىسىنە بەرگەن سۇحباتىندا.

بالالارىنىڭ جاعدايى جايلى سۇراعانىمىزدا:

«بالالار ءقازىر جازعى دەمالىسقا شىقتى. قارىنداسىم قارايتىن بولار دەپ ويلاپ ەدىم. جاعدايى كەلمەيتىن بولىپ تۇر. جەڭگەمە تاپسىرايىن دەسەم، ول كىسى دە اۋىرىپ ءجۇر. جاقىندا عانا قىتايدان اكە-شەشەم كەلىپ كەتتى. ءبىراق ولاردان نە پايدا؟ شەكارانىڭ كەسىرىنەن ارتقا قايتۋعا ءماجبۇر بولدى. بالالارىمدى وزىممەن تاۋعا الىپ كەتۋدەن باسقا امال جوق»،- دەيدى.

ءوزىنىڭ دوسى، ۇيىپ ناماز وقىعان مولداسى، قازىرگى جەك كورەتىن ادامى بولىپ كەتكەن ءقادىر امبيەۇلىنا قاتىستى:

«ءجۇر عوي ول وسى ماڭدا. كۇندىز تەرگەۋدە بولادى، كەشكىسىن قايتادان قايتادى. سوتتالاتىن ادامعا مۇلدە ۇقسامايدى.»،- دەپ اشىنادى نۇرعيزا ازاتحان قىزىنىڭ كۇيەۋى.

قاينارلى اۋىلىنىڭ تۇرعىندارىنىڭ باسىم كوپشىلىگى قىتايدان قونىس اۋدارعان. 2010 جىلدان باستاپ ەكى-ۇش وتباسى بولىپ، شەكارادان ءوتىپ وتىرعان. قارا جامىلعان اۋلەتتە شەكارانى 2015 جىلى باسىپ وتكەن.

ىسكە قاتىستى تالدىقورعان قالالىق ىىد-ىنە حات جولداندى. شاريعات ۇكىمىن ءبىلۋ ءۇشىن قمدب-نىڭ جاۋابىن الداعى ۋاقىتتا الامىز. حاتتىڭ جاۋابى كەلىسىمەن بىردەن وزدەرىڭىزبەن بولىسەمىز.