رينات زايتوۆ سايلاۋ الدىنداعى قورىتىندى ءسوزىن جاريالادى دەپ حابارلايدى Qamshy.kz اقپارات اگەنتتىگى.
"اسسالاماعالەيكۋم، ارداقتى وتانداستار، ءقادىرلى باۋىرلار، اعايىن، تۋىسقاندار، قارعا تامىرلى قازاق! مىنەكي، ساناۋلى ساعاتتاردان كەيىن، بۇيىرسا، سايلاۋدىڭ ۇگىت-ناسيحاتىن جۇرگىزۋ توقتاتىلادى. سونىڭ الدىندا سىزدەرگە ايتار ءبىر-اق اۋىز ءسوزىم بار. وزدەرىڭىز اينالاعا ويلانىپ قاراڭىزدار. قايسى سايلاۋدا بيلىكتىڭ كانديداتىنا قارسى كانديداتقا وسىنداي اۆتوشەرۋلەر ۇيىمداستىردى؟ قاي سايلاۋدا بيلىكتىڭ كانديداتىنا قارسى كانديداتقا قولداۋ جاساپ، ءدال سول بيلىكتىڭ كانديداتىنىڭ جيىنىندا ءبىزدىڭ اق جاۋلىقتى اجەلەرىمىز سويلەپ، ستۋدەنتتەرىمىز تايسالماي، كەۋدەلەرىنە وزدەرىنىڭ قالاۋلارىن جازىپ الىپ شىقتى؟ ەندى ويلاناتىن كەز جەتتى، اعايىندار.
ەرتەڭ بارلىعىمىز سايلاۋعا بارىپ، بارلىعىمىز باقىلاۋشى بولىپ، بارلىعىمىز ءوزىمىزدىڭ ەرتەڭىمىز ءۇشىن كۇرەسپەسەك، ءبىز ءۇشىن ەشكىم كۇرەسپەيدى.
ال قولدان سايلاۋ جاساپ وتىرعان سايلاۋ ۋچاسكەلەرىنىڭ باسشىلارى، اكىم قارالار، بارلىقتارىڭىزعا ايتارىم ءبىر-اق اۋىز ءسوز. كۇنى كەشە عانا قازاقستان ءبىلىم مينيسترلىگىنىڭ ورىنباسارى قاماۋعا الىندى. ونىڭ الدىندا نە بولدى؟ ەكى پرەمەر-مينيستر سوتتالدى، قانشاما اكىم، باستىق، گەنەرال سوتتالدى؟ دەمەك، بۇل قازىرگى بيلىكتىڭ جۇيەسى ءوزىنىڭ دە، وزگەنىڭ دە ادامدارىن ايامايدى. سوندىقتان وزدەرىڭىزدىڭ بولاشاقتارىڭىز ءۇشىن، ەرتەڭ ۇرپاقتىڭ الدىندا قارابەت بولما ءۇشىن ەشكىمگە داۋىس بەرمەسەڭىزدەر دە، مەيلى، قالاعان، كانديداتتارىڭىزعا داۋىس بەرىڭىزدەر. ءبىراق سايلاۋدى ادىلەستكىز وتكىزەمىز دەپ ىقپال جاساماڭىزدار. بۇل ەلدىڭ بولاشاعى بارلىعىمىزدىڭ قولىمىزدا. سوندىقتان، بارلىعىمىز ەرتەڭ سايلاۋدا بەت جىرتىسپايتىنداي، بارلىعىمىز ءبىر اعايىن، تۋىستاي بولىپ، ادىلەتتى سايلاۋدىڭ بولۋىنا اتسالىسىڭىزدار، قۇرمەتتى اعايىندار.
بۇل— ءبىزدىڭ تاڭداۋىمىز. بۇل —ءبىزدىڭ بولاشاعىمىز.
اناۋ بولدى، مىناۋ بولدى كەزىندە،
دەپ ايتۋمەن بولا بەرمەس توزۋگە.
سايلاۋعا كەل، ەي، اعايىن،
ەرتەڭ-اق...
ءوز ەرتەڭىڭ... ءوز ەرتەڭىڭ وزىڭدە...
ءوز ەرتەڭىمىزدى ءوزىمىز قالايىق، اعايىن!"
پىكىر قالدىرۋ