الماتىدا ازاماتتاردىڭ سىرتىنان نەسيە راسىمدەگەن الاياق ىزدەستىرىلۋدە! جاسى شامامەن 45-50-لەردەگى ەر ادام جۇرتتىڭ جوعالتقان كۋالىكتەرىمەن بانكتەرگە بارىپ، قارىز الىپ وتىرعان. ال نەسيەنى تاراتقان بانك مەنەدجەرلەرى وزدەرىنىڭ دە الاياققا الدانعاندارىن ايتىپ اقتالىپ وتىر دەپ جازادى Qamshy.kz اقپارات اگەنتتىگى كتك ارناسىنا سىلتەمە بەرە وتىرىپ.
تاسپاعا ءتۇسىپ قالاتىنىن بىلە تۇرا، باتىلى جەتىپ جۇرتتىڭ سىرتىنان نەسيە العان ادام وسى. ال قارىزدى ول ءبىر ەمەس، ءۇش بىردەي بانكتە راسىمدەگەن. انشەيىندە اقشاعا كەلگەندە ەسەبى مىقتى مەكەمەلەردىڭ قىزمەتكەرلەرى كەلگەن كليەنتكە، قولىنداعىنىڭ بوتەن قۇجات ەكەنىن بايقاماي، 2 ميلليون تەڭگەدەن استام قارىزدى ۇستاتا سالعان.
سالتانات ازىربەك، الماتى قالاسى پوليسيا دەپارتامەنتى رەسمي وكىلى:
«بانكتەرگە بارىپ نەسيە العان. تاۋار نەسيەلەرىن دە العان. مىندەتتى تۇردە بۇل ازامات ۇستالىپ، قىلمىستىق جاۋاپكەرشىلىككە تارتىلاتىن بولادى.»،- دەيدى.
الاياقتىڭ ءاتى-جونى ازىرگە بەلگىسىز. دەگەنمەن، باتىس قازاقستان تۇرعىنى دەگەن بولجام بار. ويتكەنى اينالدىرعان ءبىر كۇننىڭ ىشىندە سول وڭىردەن بىرنەشە ادام وعان الدانعاندارىن ايتىپ قوڭىراۋ شالىپتى. بۇل وقيعا بويىنشا بانك قىزمەتكەرلەرىنەن دە جاۋاپ الىنعان. ءبىراق ءبارى دە سۋدان تازا، سۇتتەن اق بوپ شىعىپتى. ال الگىندەي جاعداي مارات ءابدىراحمانوۆتىڭ دا باسىنان وتكەن. الدەبىرەۋلەر بەس جىل بۇرىن جوعالتقان كۋالىگى ارقىلى بانكتەن جارتى ميلليونعا جۋىق نەسيە الىپتى. ول تۋرالى الماتىلىق جارتى جىلدان سوڭ ءبىر-اق بىلگەن. مارات ءابدىراحمانوۆ:
«اۆتوسالوننان نەسيەگە كولىك الماق بولدىم. ءبىراق، بانك ماعان نەسيە بەرۋدەن باس تارتتى. ماعان جارتى جىل تولەنبەگەن قارىزىمنىڭ بارىن ايتقاندا، قايتەرىمدى بىلمەي قالدىم. نەسيە الماعانىمدى دالەلدەۋ ءۇشىن كوپ قينالدىم.»
مارات ءادبىراحمانوۆ بوپ قارىز العاندار سول ۇستاتپاي كەتكەن. ءبىر قىزىعى، جىگىتتىڭ وسىنشاما ۇستەماقىسى وسە تۇرا، بانك ونى ىزدەمەگەن. ءتىپتى شوتىن دا بۇعاتتاماعان. سول سەبەپتى، بىلمەي جۇرە بەرگەن. كەيىن تاسپادان بەلگىلى بولعانداي، اقشانى وعان مۇلدەم ۇقسامايتىن ادام العان. ال بانكتەگىلەر بۇلاي بولۋى مۇمكىن ەمەس دەپ وتىر. ءلاززات ەسمۇرزايەۆا، بانك وكىلى:
«كليەنتتىڭ ءوزى كەلمەي ءبىز نەسيە بەرمەيمىز. ونداي جاعداي مۇمكىن ەمەس. قارىزعا اقشا بەرمەس بۇرىن بارلىق مالىمەتتى تالاپ ەتەمىز. تۋىستارىنىڭ نومىرلەرى الىنادى. جۇمىس ورنى تۋرالى اقپارات. ودان بولەك، ءوزىن دە سۋرەتكە تۇسىرەمىز.»
الاياقتاردان ساقتانۋدىڭ ءبىر جولى بار. ول سمس-حابارلاما. ءبىراق ول ءۇشىن اي سايىن 200 تەڭگە تولەپ تۇرۋ كەرەك. ينديرا قارلىبايەۆا، كرەديتتىك بيۋرو قىزمەتكەرى:
«سىزگە حابارلاما كەلەدى. ياعني، ونداي حابارلاما كەلگەن كەزدە ءسىز بانكتىڭ وزىنە بارىپ، مەن ەشقانداي نەسيە راسىمدەپ وتىرعان جوقپىن دەپ ايتۋىڭىزعا، ءوتىنىش جازۋىڭىزعا قۇقىعىڭىز بار.»
ال وسى كەزگە دەيىن تۇرعىندارلدىڭ جۇيكەسىنە تيەتىن مۇنداي ارەكەتتەرى ءۇشىن ەشقانداي بانك جاۋاپقا تارتىلماعان. جالپى، الماتىدا جىل باسىنان بەرى وسىنداي الاياقتىققا قاتىستى 17 ادام ۇستالعان. ولار 60 ادامنىڭ ۇستىنەن نەسيە الىپ، كەيبىرىنىڭ ءتىپتى بانك كارتالارىنا دەيىن قول سالعان.
دايىنداعان: بەك بايتاس
پىكىر قالدىرۋ