7 ماۋسىمدا قازاقستانداعىادام قۇقىقتارى جونىندەگى حالىقارالىق بيۋرونىڭ باسپا ءسوز ورتالىعىندا «الماتى ۇلگىسىندە قازاقستانداعى كوپبالالى انالاردىڭ شىنايى پروبلەمالارى» تاقىرىبىندا باسپا ءسوز جيىنى ءوتۋى ءتيىس بولاتىن.

شارا بولاردان بىرەر كۇن بۇرىن ۇيىمداستىرۋشىلار ب ا ق وكىلدەرىنە ارنايى شاقىرتۋ تاراتقان بولاتىن. باسپا ءسوز رەليزىندە ولار بيلىككە قويعان اقىلعا قونىمسىز تالاپتارىن دا كورسەتىپتى. قالاداعى بۇكىل كوپبالالى انالاردىڭ اتىنان سويلەگەن شاعىن عانا توپ ءتۇرلى جەڭىلدىكتەر ءۇشىن جەرگىلىكتى بيۋدجەتتەن قاراجات ءبولۋدى سۇراعان. تالاپتارى راسىندا دا ساۋ ادامنىڭ اقىلىنا قونبايدى: جاڭا اۆتوكولىك ساتىپ الاردا ءاربىر بالا ءۇشىن جەڭىلدىك جاساۋ، شەتەلدە جەڭىلدىكپەن دەمالۋ، كەزەكسىز جەر تەلىمدەرىن بەرۋ، ءوزى قالاعان تۇرعىن ءۇي كەشەنىنەن پاتەردى ەڭ تومەنگى پايىزبەن نەسيەگە بەرۋ جانە تاعى باسقالارى.

الايدا، باسپا ءسوز ءماجىلىسى بولادى دەگەن كۇنى سپيكەر رەتىندە تىركەلگەن كوپبالالى 7 انانىڭ تەك ەكەۋى عانا جيىنعا كەلدى، ولار – جانسايا جاڭابايەۆا مەن اقمارال مۇحيت قىزى. ءبىراق، باسقوسۋعا كۇتپەگەن جەردەن كەلگەن شىنايى كوپبالالى انالار ۇيىمداستىرۋشىلاردىڭ جوسپارىن كۇل-تالقان ەتتى.

ءتورت بالانىڭ اناسى ايدا بۋكايەۆا دا ۇيىمداستىرۋشىلاردىڭ ارەكەتىنە نارازى. ول انالار مەن بالالاردى ساياساتتىڭ لاس ويىندارىنا ارالاستىرۋدى توقتاتۋ قاجەت دەپ تالاپ قويدى.

«ءبىزدىڭ ەلدە سوڭعى جىلدارى كوپبالالى انالار ءۇشىن تالاي جاقسىلىق جاسالدى. مەملەكەت تاراپىنان كورسەتىلىپ جاتقان كومەكتەردى ايتپاعان كۇننىڭ وزىندە، دەمەۋشىلەر دە قول ۇشىن سوزىپ، ءقازىر بالالارىمىز لاگەرلەردە دەمالىپ جاتىر. كەدەيلىكتىڭ شەگىندە ءومىر ءسۇرىپ جاتقان وتباسىلارعا كومەك كورسەتىلدى، ءقازىر جاعداي رەتتەلىپ قالدى. مەنىڭ اشۋىمدى تۋعىزعانى – تۋرا سايلاۋ بولاتىن كەزدە بەلگىسىز ادامدار ەلدىڭ تىنىشتىعىن بۇزباقشى. ولارعا ايتارىم: انا مەن بالادان قولدارىڭدى تارتىڭدار!» - دەيدى ايدا بۋكايەۆا.

مەملەكەتتەن كومەك الىپ وتىرعان الماتىلىق كوپبالالى انالار ءبىرىن-بىرى جاقسى تانيدى. ولار بيلىكتەن ءزاۋلىم سارايلار مەن سۋ جاڭا اۆتوكولىكتەر نەمەسە شەتەلگە دەمالۋعا قاراجات سۇراعان ەمەس. ال، انالاردىڭ اتىنان سويلەپ، ءدال وسىنداي اقىلعا قونىمسىز تالاپ قويعان وزگە ايەلدەردى ءبىرىنشى رەت كورۋىمىز دەيدى. ال، ەڭ قىزىعى – ۇيىمداستىرۋشىلار قاتارىندا «اتاقتى» جۋرناليست سەرگەي دۋۆانوۆ تا ءجۇر. اتاقتى دەيتىن سەبەبىمىز، كەزىندە ول ءجاسوسپىرىمدى زورلاۋ ءىسى بويىنشا بۇكىل ەلگە تانىلعان بولاتىن. ەندى مىنە، بوستاندىققا شىعىپ، بۇرىنعى ىسىمەن قايتا اينالىسىپ جاتقان ءتارىزدى. ول ءتىپتى، بۇگىنگى جيىندا كوپبالالى انالار زالعا كىرگەن ساتتە ساسقالاقتاپ: «بۇل ءبىزدىڭ انالار ەمەس، باسقالارى، بۇلاردى زالدان شىعارىپ جىبەرىڭدەر» دەپ جانۇشىرا ايقايلادى.

بۇل باسپا ءسوز جيىنىنا كەلگەن كوپبالالى انالار – نەگىزىنەن ساۋ اقىلدى، ءوز ۇرپاعى مەن ولاردىڭ بولاشاعى ءۇشىن الاڭدايتىن ايەلدەر، ونى مويىنداۋ كەرەك. ولار شارانى ۇيىمداستىرۋشىلارعا حالىقتى ارانداتۋشىلىققا، ءوز مۇددەسى ءۇشىن بالالاردى لاس ويىنعا ارالاستىرۋعا جول بەرمەيتىندەرىن اشىپ ايتتى. سونداي-اق، انالار ءبىزدىڭ ەلدە ەشكىم دۇربەلەڭدى قالامايتىنىن، بولاشاق ۇرپاقتىڭ سانالى بوپ ءوسۋىن، ەل تاعدىرىن وزگەلەردىڭ شەشۋىنە جول بەرمەيتىندەرىن دە ءسوز ەتتى.

بۇل جايتقا قاتىستى پىكىرىن ەلىمىزدىڭ اقپارات جانە بايلانىس ءمينيسترى داۋرەن ابايەۆ تا جەتكىزدى.

«ءبىزدىڭ مەملەكەت ءوزىن الەۋمەتتىك باعىتتا ەكەنىن جاريالادى. سوندىقتان دا كوپبالالى انالارعا اتاۋلى الەۋمەتتىك كومەكتەر كورسەتىلىپ كەلەدى. ءقازىر ورتا ەسەپپەن ءبىر وتباسى 100 مىڭ تەڭگەدەي كومەك الادى. ودان بولەك، كوپبالالى وتباسى بالالارىنا مەكتەپتەردە تەگىن تاماق بەرىلەدى، جولاقىسىنا جەڭىلدىكتەر، وقۋعا تۇسەتىن كەزدە كۆوتا قاراستىرىلعان. جالپى، بارلىق جاۋاپكەرشىلىكتى وزىڭنەن الىپ تاستاپ، وتباسىڭنىڭ، بالالارىڭنىڭ تاعدىرىن مەملەكەتكە ارتىپ قويۋ قانشالىقتى دۇرىس؟ الاڭعا شىققاننىڭ بارىنە پاتەر تاراتىپ بەرۋ دەگەن وي ەشقانداي اقىلعا سىيمايدى. مەملەكەت كوپبالالى انالارعا كومەكتەسۋدەن باس تارتقان ەمەس، تەك ءار نارسەنىڭ بەلگىلى ءبىر شەگى بولادى»، - دەدى مينيستر.