قاسىم-جومارت توقايەۆ Exit Poll ناتيجەلەرى جاريالانعاننان كەيىن العاشقى مالىمدەمەسىن جاسادى دەپ حابارلايدى Qamshy.kz اقپارات اگەنتتىگى. بۇل تۋرالى مالىمەت «Nur Otan» پارتياسىنىڭ رەسمي سايتىندا جاريالاندى.

ساۋالناما ناتيجەسىندە قاسىم-جومارت توقايەۆ سايلاۋشىلاردىڭ 70،13 پايىز داۋسىن جينادى. حالىقتىڭ سايلاۋعا كەلۋ كورسەتكىشى 77،4 پايىزدى قۇراپ، 9 ميلليوننان استام قازاقستاندىق ءوز تاڭداۋىن جاسادى.

الدىن الا مالىمەتتەر جاريالانعاننان كەيىن قاسىم-جومارت توقايەۆ وزىنە سەنىم بىلدىرگەن بارشا وتانداستارىنا العىسىن ءبىلدىردى.

"سايلاۋالدى ناۋقان وركەنيەتتى ءارى جۇيەلى تۇردە جۇرگىزىلدى. شىن مانىندە بۇل ناۋقان باعدارلامالاردىڭ باسەكەسى بولدى. حالىق بىزگە سەنىم ارتىپ، ءوز تاڭداۋىن جاسادى. سوندىقتان الدىمىزدا اۋقىمدى جۇمىستار كۇتىپ تۇر"، – دەدى قاسىم-جومارت توقايەۆ.

ول ۇگىت-ناسيحات كەزەڭىنە قاتىسقان رەسپۋبليكالىق قوعامدىق شتابتىڭ مۇشەلەرىنە، بارلىق بەلسەندى ازاماتتارعا جانە پارتيا جاقتاستارىنا اتقارعان جۇمىستارى ءۇشىن العىسىن ءبىلدىرىپ، ەلەكتورالدى ناۋقاننىڭ اۋقىمى مەن تەحنولوگيالىق مۇمكىندىگىن اتاپ ءوتتى.

"بۇكىل الەمدەگى سياقتى ءبىزدىڭ ەلىمىزدە دە جاعدايدىڭ وزگەرگەنىن كورىپ وتىرسىزدار. الەمدىك قاۋىمداستىقتىڭ ءبىر بولشەگى بولعاندىقتان قازاقستانعا جاھاندىق وقيعالاردىڭ دا ىقپالى بولارى ءسوزسىز. سوندىقتان ءبىز ەلىمىزدىڭ جارقىن بولاشاعى ءۇشىن جۇدىرىقتاي جۇمىلۋىمىز كەرەك"، – دەدى ق.توقايەۆ.