ەنەرگەتيكا ءمينيسترى قانات بوزىمبايەۆ ۇيىندە ەلەكتر ەنەرگياسىن ۇنەمدەپ، قۋاتقا قىرۋار قارجى تولەمەيتىنىن ايتتى دەپ حابارلايدى Qamshy.kz اقپارات اگەنتتىگى استانا تەلەارناسىنا سىلتەمە جاساپ.

باس ەنەرگەتيك ازىرگە كوپقاباتتى ۇيدە تۇرادى. ەگەر جەر ۇيگە كوشسە، بالامالى قۋات كوزدەرىن پايدالانباق. ال ازىرشە پاتەرىندەگى جارىقتى مەيلىنشە از قوسۋعا تىرىسىپ ءجۇر. قازاقستاندا 5-10 جىلدا قۋات تاپشىلىعى تۋادى دەگەن بولجام بار.

"ەگەر ەلەكتر ەنەرگياسىنا كەلەر بولساق، بالالار تۇندە جاتاردا جارىقتى سوندىرۋگە داعدىلانعان. توقتى ۇنەمدەۋ مادەنيەتىن ەنگىزۋگە تىرىسامىز. پاتەردە تۇراتىندىقتان، بالامالى قۋات كوزى باتارەيالارىن ورناتقان جوقپىن. ءبىراق جوسپاردا بار"، - دەيدى بوزىمبايەۆ.

ءقازىر ەنەرگەتيكا مينيسترلىگى از ماسشتابتى قايتا جاڭعىرتىلاتىن قۋات كوزدەرىن قولداۋعا قاتىستى زاڭ جوباسىن دايارلاپ جاتىر. سول كەزدە تەك ەنەرگەتيكا ءمينيسترى ەمەس، قاراپايىم حالىق تا كۇن باتارەيالارىن وڭاي پايدالانا الادى.

"اقشانى بۇگىنگى ايتىلعاننان دا كوبىرەك ۇنەمدەۋگە بولادى. اتالعان سالانى سۋبسيديالاۋدىڭ دا وڭتايلى جولدارىن قاراستىرامىز"، - دەدى قانات بوزىمبايەۆ.

"ءبىز ارينە ءبارىن ۇنەمدەيمىز. ءتىپتى، شىعىنىمىز وتە از دەپ ايتۋعا بولادى. سەبەبى، مينيسترلىك ورنالاسقان عيماراتتى ۇلكەن دەپ ايتۋعا كەلمەيدى. ءقازىر، جۇمىس ۋاقتىلى اياقتالاتىنىن بىلەسىزدەر. ساعات 18-30 دان كەيىن قىزمەتكەرلەردىڭ كومپيۋتەرلەرى اۆتوماتتى تۇردە سونەدى"، - دەدى.