الماتى پوليسياسى Tengrinews.kz ءتىلشىسى شوقان الحابايەۆقا جاسالعان شابۋىلعا قاتىستى قىزمەتتىك تەرگەۋ باستادى دەپ حابارلايدى Qamshy.kz اقپارات اگەنتتىگى  Tengrinews.kz  باسپا ءسوز قىزمەتىنە سىلتەمە جاساپ.

"الماتى پوليسياسى دەپارتامەنتى ەشقالاي دا جاۋاپكەرشىلىكتەن قاشپايدى جانە وسى جاعدايدى وبەكتيۆ تەكسەرۋگە كەپىل بەرەدى. سونىمەن قاتار، جاپپاي تارتىپسىزدىك پەن ميتينگتەر كەزىندە ب ا ق وكىلدەرىنىڭ قاۋىپسىزدىگى جايلى ەرەجە بار ەكەنىن ەسكەرۋ كەرەك. ول ەرەجەلەر ءبىرىنشى كەزەكتە جۋرناليستەردىڭ وزدەرىنىڭ قاۋىپسىزدىگىنە ارنالعان. بۇل تۋرالى وسىعان دەيىن ءىىم باسشىلىعى بىرنەشە رەت ايتقان بولاتىن.

بۇل جاعدايدا جۋرناليست شوقان الحابايەۆتا ارنايى جيلەت بولعان جوق. سونداي-اق، قوعامدىق ءتارتىپ بۇزۋشىلاردىڭ ىشىندە كوپتەگەن ارانداتۋشىلاردىڭ بولعانىن ايتۋ كەرەك. ولاردىڭ ارەكەتتەرى ءبىرىنشى كەزەكتە ازاماتتاردىڭ ءومىرى مەن دەنساۋلىعىنا جانە قوعامدىق قاۋىپسىزدىككە ءقاۋىپ ءتوندىردى. سوندىقتان ىشكى ىستەر مينيسترلىگى بەرەتىن تاپسىرامالار حالىقتىڭ قاۋىپسىزدىگىن قامتاماسىز ەتۋگە باعىتتالادى"، - دەدى الماتى قالالىق پوليسيانىڭ باسپا ءسوز قىزمەتىندەگىلەر.

ەسكە سالايىق، مۇنىڭ الدىندا الماتىدا پوليسەيلەردىڭ Tengrinews ءتىلشىسىن سوققىعا جىققانى حابارلانعان بولاتىن. ءتىلشى شوقان الحابايەۆ 10 ماۋسىمدا تۇندە سايران ماڭىندا (اۋەزوۆ اۋدانى) پوليسەيلەردىڭ كوشەگە شىققانداردى ۇستاپ جاتقان جاعدايىن ۆيدەوعا تۇسىرگەن.

كەيبىر مالىمەتتەر بويىنشا، پوليسيا زاڭسىز ميتينگىگە شىققانداردا سۋىق قارۋ بار دەگەن حاباردان كەيىن تەكسەرىس شارالارىن جۇرگىزگەن. جۋرناليسكە جاسالعان شابۋىلدىڭ الدىندا تۇسىرىلگەن ۆيدەو:

"پوليسەيلەر كوشەدەگىلەردى ۇستاپ جاتقانىن ءتۇسىرىپ الۋ ءۇشىن جاقىنداعانمىن. ولاردىڭ ءبىرى "نەگە ءتۇسىرىپ تۇرسىڭ؟" دەدى. مەن جۋرناليست ەكەنىمدى ايتتىم. ول تۇسىرمەۋىمدى سۇرادى. سوسىن باسقا پوليسەي كەلىپ، مەنى ۇستاۋعا بۇيرىق بەردى. تەلەفونىمدى الىپ قويدى. قايتارۋىن سۇرادىم. كەيىن تاعى بىرنەشە پوليسەي كەلدى. قولىمدى بۇراپ، جەرگە قۇلاتتى. تەبە باستادى. بەتىمنەن، ىشىمنەن تەپتى"، - دەدى ول.

ءجۋرناليستىڭ كيىمى جىرتىلعان: