"Nur Otan" پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ قوعامنىڭ بارلىق وكىلدەرىن ديالوگقا شاقىرىپ، بىرىگىپ ارەكەت ەتسەك قانا ماقساتتارىمىزعا قول جەتكىزەتىنىمىزدى قاداپ ايتتى دەپ حابارلايدى Qamshy.kz اقپارات اگەنتتىگى.

اشىمبايەۆ بۇل تۋرالى  دەموكراتيالىق كۇشتەردىڭ "قازاقستان-2050" جالپىۇلتتىق كواليسياسىنىڭ وتىرىسىندا ايتتى.

اتالعان ءىس-شارادا كواليسيا مۇشەلەرى قازاقستان پرەزيدەنتى قاسىم-جومارت توقايەۆ انىقتاپ بەرگەن ەل دامۋىنىڭ ناقتى باعىتتارى مەن الدىمىزعا قويعان جاڭا مىندەتتەرىنە قولداۋ ءبىلدىردى.

ماۋلەن اشىمبايەۆ الدىمەن قازاقستاننىڭ دامۋدىڭ جاڭا داۋىرىنە قادام باسقانىن ايتتى. سونداي-اق ول ەلىمىزدە بولىپ جاتقان ساياسي وزگەرىستەردىڭ زاڭعا سايكەس ەكەنىنە نازار اۋداردى.

– سايلاۋدا قازاقستاندىقتاردىڭ باسىم بولىگى ءوز داۋىستارىن قاسىم-جومارت كەمەل ۇلى توقايەۆقا بەرىپ، ەلباسىمىزدىڭ ستراتەگيالىق ساياساتىنىڭ ساباقتاستىعى مەن ەلىمىزدىڭ تۇراقتى دامۋىن تاڭدادى. سونىڭ ناتيجەسىندە قازاقستاندا جوعارى بيلىكتىڭ اۋىسۋى ەلىمىزدىڭ بارلىق زاڭىنا سايكەس جۇرگىزىلدى. بۇل – قازاقستاننىڭ ىشكى تۇراقتىلىعىن قامتاماسىز ەتەتىن نەگىزگى فاكتور، – دەدى ول.

سونىمەن قاتار "Nur Otan" پارتياسى ءتوراعاسىنىڭ ءبىرىنشى ورىنباسارى ۇلىقتاۋ راسىمىندە قازاقستان پرەزيدەنتى قاسىم-جومارت توقايەۆ اتاپ كورسەتكەن بيلىك پەن ازاماتتىق قوعام اراسىنداعى ديالوگتى دامىتۋ ماسەلەسىنە نازار اۋداردى.

– ەلىمىزدە پرەزيدەنت جارلىعىمەن ۇلتتىق قوعامدىق سەنىم كەڭەسى قۇرىلدى. بۇل – قازاقستاندا ازاماتتىق قوعامدى دامىتۋ جولىندا جاسالعان ناقتى قادام. مەملەكەت باسشىسى اتاپ وتكەندەي، ءبىرتۇتاس ۇلت بولىپ قالۋ – ءبىزدىڭ باستى باعدارىمىز. سوندىقتان جۇدىرىقتاي جۇمىلىپ، قوعامنىڭ بارلىق وكىلدەرىن، سونىڭ ىشىندە جاستاردى دا ديالوگقا شاقىرىپ، بىرىگىپ ارەكەت ەتسەك قانا كوزدەگەن ماقساتتارىمىزعا قول جەتكىزەمىز، – دەدى ول.

وتىرىسقا ەلدەگى جەتەكشى پارتيالاردىڭ باسشىلارى، پارلامەنت دەپۋتاتتارى، قازاقستان حالقى اسسامبلەياسىنىڭ، كاسىبي جانە قوعامدىق بىرلەستىكتەردىڭ وكىلدەرى قاتىسىپ، ءوز پىكىرلەرىن ءبىلدىردى. ءىس-شارا سوڭىندا بارشا قازاقستاندىقتار مەن قوعامدىق-ساياسي كۇشتەردى سايلاۋدان كەيىنگى كەزەڭدە ەلىمىزدىڭ ستراتەگيالىق ماقساتتارى جولىندا بىرىگۋگە، قازاقستان پرەزيدەنتىنىڭ ەل دامۋىنىڭ وزەكتى ماسەلەلەرىنە قاتىستى بيلىك پەن ازاماتتىق قوعام اراسىندا تۇراقتى جانە كونسترۋكتيۆتى ديالوگ قۇرۋ باستاماسىن قولداۋعا شاقىرعان ۇندەۋ قابىلداندى.