ۋكراينا پرەزيدەنتى ۆلاديمير زەلەنسكيي ءوزىنىڭ قۇتتىقتاۋ حاتىندا قاسىم-جومارت توقايەۆقا تابىس، ال دوستاس قازاقستان حالقىنا بەيبىتشىلىك پەن باق-بەرەكە تىلەدى دەپ حابارلايدى Qamshy.kz اقپارات اگەنتتىگى اقورداعا سىلتەمە جاساپ. 

"سايلاۋشىلاردىڭ سىزگە ارتقان سەنىمى ءسىزدىڭ بەدەلىڭىزدىڭ جوعارى جانە قازاقستان حالقىنا قىزمەت ەتۋگە ادال ەكەنىڭىزدى دالەلدەيدى. كۇش-جىگەرىمىزدى ءوزارا بىرىكتىرە وتىرىپ، ەلدەرىمىز اراسىنداعى كونسترۋكتيۆتى ىنتىماقتاستىقتى نىعايتا الامىز. كييەۆ پەن نۇر-سۇلتان اراسىنداعى قاتىناستاردى دامىتۋعا تىڭ سەرپىن بەرۋ ءۇشىن ءسىزدى ۋكرايناعا ساپارمەن كەلۋگە شاقىرامىن"، – دەلىنگەن جەدەلحاتتا.

قازاقستان پرەزيدەنتى بولىپ سايلانۋىنا وراي قاسىم-جومارت توقايەۆتىڭ اتىنا قۇتتىقتاۋ حاتتار مەن جەدەلحاتتار كەلىپ تۇسۋدە.

سونىمەن قاتار، بۇۇ باس حاتشىسى انتونيۋ گۋتەرريش قۇتتىقتاۋ حاتىندا قازاقستاننىڭ كوپجاقتىلىق ديالوگتى ىلگەرىلەتۋ جانە بۇۇ قۇندىلىقتارىن قورعاۋ ىسىندەگى ماڭىزدى ءرولىن اتاپ وتكەن.

"ءسىزدىڭ كوشباسشىلىعىڭىز بەن مول تاجىريبەڭىزدىڭ، سونىڭ ىشىندە بىرىككەن ۇلتتار ۇيىمىنداعى جۇمىسىڭىزدىڭ ارقاسىندا قازاقستان حالىقارالىق ىنتىماقتاستىق مودەلىنە قىزمەت ەتۋدى جالعاستىرا بەرەتىنىنە كۇمانىم جوق. ورتالىق ازيا مەن ەلدەرىڭىزدە جۇمىس ىستەيتىن بۇۇ بارلىق بولىمشەلەرى جەتەكشىلەرىنىڭ كەڭەسى ءۇشىن پريەۆەنتيۆتى ديپلوماتيا جونىندەگى بۇۇ وڭىرلىك ورتالىعى قىزمەتىنىڭ اياسىندا سىزبەن تىعىز جۇمىس ىستەۋدى اسىعا كۇتەمىن"، – دەلىنگەن قۇتتىقتاۋ حاتتا.

بەلارۋس رەسپۋبليكاسىنىڭ پرەزيدەنتى الەكساندر لۋكاشەنكو قاسىم-جومارت توقايەۆتى پرەزيدەنت سايلاۋىنداعى جەڭىسىمەن قۇتتىقتاپ، جاقىن ارادا قازاقستانعا رەسمي ساپارمەن كەلۋگە نيەتتى ەكەنىن حابارلادى.

"ءوزارا سەنىم مەن ستراتەگيالىق ارىپتەستىك قاعيداتتارىنا نەگىزدەلگەن قازاق-بەلارۋس ىنتىماقتاستىعىنىڭ دايەكتى كەڭەيۋى حالىقتارىمىزدىڭ مۇددەسىنە جاۋاپ بەرەدى"، – دەلىنگەن قۇتتىقتاۋ حاتتا.

اۋعانستان يسلام رەسپۋبليكاسىنىڭ پرەزيدەنتى مۇحاممەد اشراف عاني دوستىق قارىم-قاتىناستاردى دامىتىپ، ىنتىماقتاستىعىمىزدى كەڭەيتۋ ءۇشىن اۋعانستان مەن قازاقستاننىڭ الەۋەتى زور ەكەنىن اتاپ وتكەن.

"اۋعانستان ۇكىمەتى حالىقتارىمىز اراسىنداعى قارىم-قاتىناستاردى ودان ءارى نىعايتۋ ءۇشىن بار كۇش-جىگەرىن جۇمساۋعا ءازىر. ءسىزدى وتكەن پرەزيدەنت سايلاۋىنداعى جەڭىسىڭىزبەن قۇتتىقتايمىن جانە ەلدەرىمىزدىڭ ورتاق مۇددەلەرى ءۇشىن تابىستى سەرىكتەستىگىمىز جالعاسا بەرەتىنىنە سەنىم بىلدىرەمىن"، – دەلىنگەن جەدەلحاتتا.

سونىمەن قاتار، قاسىم-جومارت توقايەۆتىڭ اتىنا ءوز قۇتتىقتاۋلارىن ومان سۇلتانى قابۋس بەن سايد، شۆەسيا كورولى كارل XVI گۋستاۆ، ارمەنيا پرەزيدەنتى ارمەن ساركيسيان، ارمەنيانىڭ پرەمەر-مينيسترى نيكول پاشينيان، پارلامەنتارالىق وداقتىڭ ءتوراعاسى گابريەلا كۋيەۆاس باررون، رەسەي فەدەراسياسى مەملەكەتتىك دۋماسىنىڭ ءتوراعاسى ۆياچەسلاۆ ۆولودين، يتاليانىڭ حالىقارالىق ۇيىمدار اسسوسياسياسىنىڭ پرەزيدەنتى فرانكو فراتتيني جولدادى.