ىشكى ىستەر ءمينيسترى ەرلان تۇرعىمبايەۆ قازاقستاندا ميتينگ كەزىندە 4 مىڭعا جۋىق ادام ۇستالعانىن ايتتى دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ. 

"ماۋسىمنىڭ 9، 10، 11، 12 جانە 13ء-ى - بەس تاۋلىك ىشىندە باس پروكۋراتۋرا مەن ءىىم-نىڭ بىرنەشە رەت ەسكەرتۋلەرىنە قاراماستان، قازاقستان قالالارىندا رۇقسات ەتىلمەگەن ميتينگتەر وتكىزىلدى. ميتينگىگە شىققان ازاماتتار "ميتينگىلەر، شەرۋلەر جانە دەمونستراسيالار تۋرالى" زاڭدى بۇزعان. زاڭدا مۇنداي اكسيالاردى وتكىزبەس بۇرىن قاتىسۋشىلار جەرگىلىكتى اتقارۋشى ورگاندارعا ءوتىنىش بەرۋى ءتيىس ەكەنى انىق جازىلعان. تەك جاو-نىڭ رۇقساتىمەن عانا ميتينگتەر وتكىزىلۋگە ءتيىس"، - دەدى تۇرعىنبايەۆ ۇكىمەت وتىرىسىنان كەيىن جۋرناليستەردىڭ سۇراقتارىنا جاۋاپ بەرە وتىرىپ.

ول پوليسيا قىزمەتكەرلەرىنە ارنايى قۇرالداردى قولدانباۋعا كوماندا بەرىلگەنىن اتاپ ءوتتى.

"بۇكىل پوليسيا تارتىپسىزدىكتەردىڭ جولىن كەسۋ ءۇشىن ارنايى قۇرال-جابدىقتارمەن قامتاماسىز ەتىلگەن. بۇل گاز باللوندارى، دۋبينكالار، ولار قولدانىلعان جوق. بۇل قاقتىعىستاردى وقشاۋلاۋ ءۇشىن تەك فيزيكالىق كۇش قولدانىلدى. 4 مىڭعا جۋىق ازامات ۇستالدى"، - دەدى مينيستر.

ءمينيستردىڭ ايتۋىنشا، 3 مىڭ ازامات "قاماۋعا الىنىپ، بوساتىلدى". 677 ادام سوت ارقىلى اكىمشىلىك قاماۋعا، 305 ادامعا اكىمشىلىك ايىپپۇل سالىندى.