12-ماۋسىم كۇنى وبلىس اكىمىنىڭ ورىنباسارى، وبلىستىق شتاب ءتوراعاسى الىبەك ناۋتييەۆتىڭ توراعالىعىمەن، اتىراۋ وبلىستىق اۋماقتىق ينسپەكسياسى ۇيىمداستىرعان، قۇرمانعازى اۋدانىنا قاراستى ماقاش اۋىلدىق وكرۋگىندە دالالىق شتاب وتىرىسى ءوتتى دەپ حابارلايدى Qamshy.kz اقپارات اگەنتتىگى اتىراۋ وبلىسىنىڭ وڭىرلىك كوممۋنيكاسيالار قىزمەتىنە سىلتەمە جاساي وتىرىپ. 

شتاب وتىرىسىنداعى قارالعان باستى ماسەلە، شەگىرتكە تەكتەس زيانكەستەرگە قارسى تۇرۋ. ياعني، ءۇيىرلى شەگىرتكەنىڭ بەلەڭ الىپ كەتپەۋىن قاداعالاۋ. وسى ورايدا ءۇيىرلى شەگىرتكەمەن كۇرەسۋ ءۇشىن حيميالىق وڭدەۋ جۇمىستارى جۇرگىزىلىپ كەلەدى.

"بيىل سۋدىڭ از كەلۋىنە بايلانىستى، شەگىرتكە تەكتەس زيانكەستەردىڭ شىعاتىن اۋماعى ۇلعايۋ ءقاۋپى بار. سول سەبەپتى بۇگىنگى شتاب وتىرىسىندا، وسى ماسەلەنىڭ الدىن الۋ ماقساتىندا بارلىعىمىز جينالىپ وتىرمىز. وڭىرىمىزدەگى مال شارۋاشىلىعى مەن ەگىن شارۋاشىلىعىنا زيان كەلمەۋ ءۇشىن،بىرلەسىپ جۇمىس اتقارۋىمىز كەرەك"- دەيدى اتىراۋ وبلىسى اكىمىنىڭ ورىنباسارى الىبەك ناۋتييەۆ.
اتىراۋ وبلىسىندا ءۇيىرلى شەگىرتكەنىڭ ازياتتىق شەگىرتكە جانە يتالياندىق پرۋس دەپ اتالاتىن ەكى ءتۇرى كەزدەسەدى. ازيات شەگىرتكەسى كولتاباندار مەن قامىستى القاپتاردا مەكەن ەتەتىن بولسا، يتاليان پرۋسى مال جايىلاتىن جايىلىمداردا مەكەندەيدى.

"جىلدا ءبىزدىڭ ينسپەكسيا ءوز جۇمىسىن اتقارىپ كەلەدى. بيىل رەسپۋبليكالىق بيۋدجەتتەن وبلىس بويىنشا، ءۇيىرلى شەگىرتكەلەرگە قارسى 8640 گەكتار جەرگە حيميالىق وڭدەۋ جۇمىستارى جۇرگىزىلمەك. جەر ءۇستى تاسىلىمەن جۇرگىزىلسە، قولايسىز كولىك بارا المايتىن جەرلەرگە جەڭىل دەلتالەت ارقىلى اۋە تاسىلىمەن وڭدەلەدى. سونداي-اق، جەرگىلىكتى بيۋدجەتتەن ساياق شەگىرتكەگە قارسى 3540 گەكتارعا حيميالىق وڭدەۋ جۇمىسى جۇرگىزىلەتىن بولاد"،- دەيدى ق ر اشم اوك ميك-نىڭ اتىراۋ وبلىستىق اۋماقتىق ينسپەكسيا باسشىسى ابات جانعالييەۆ.
شتاب وتىرىسىنا «روسسەلحوزسەنتر» فمبم استراحان وبلىسى فيليالىنىڭ باسشىسى ۆيكتور شلياحوۆ قاتىسىپ، بىرلەسىپ جۇمىس جاساۋدىڭ ماڭىزدىلىعىنا توقتالدى. 

"استراحان وبلىسى مەن اتىراۋ وبلىسى شەكارالاس ورنالاسقاننان كەيىن،بىرلەسىپ جۇمىس اتقارۋىمىز ماڭىزدى. سەبەبى، ءۇيىرلى شەگىرتكە ءبىر ورىننان ەكىنشى ورىنعا ۇشىپ-قونىپ جۇرەدى. 2017 جىلى داگەستان ايماعى جاعىنان ماراكاندىق ءۇيىرلى شەگىرتكە ۇشىپ كەلىپ، سوعان قارسى تۇرعان بولاتىنبىز. ول شەگىرتكەمەن كۇرەسۋ قيىن. سول سەبەپتى، بيىلعى جىلى دا سول ءۇيىرلى شەگىرتكەنىڭ كۇش الىپ كەتۋىن توقتاتۋ ماقساتىندا، استراحان وبلىسىندا ءبىرقاتار جۇمىستار اتقارىلىپ جاتىر"،- دەيدى ۆيكتور شلياحوۆ.

جيىن سوڭىندا وبلىستىق اۋماقتىق ينسپەكسياسى ءۇيىرلى شەگىرتكەگە قارسى تۇرۋ ءۇشىن وبلىس كولەمىنە بۇرىككىش تەحنيكالار قاجەت ەكەنىن ۇسىنىس رەتىندە ايتىپ، حاتتاماعا ەنگىزدى.