«قاراپايىم زاتتار ەكونوميكاسى» باعدارلاماسىن دامىتۋ اياسىندا ماڭعىستاۋ وبلىسى بويىنشا 40 تان استام جوبا ۇسىنىلدى. بۇل تۋرالى وڭىرلىك كوممۋنيكاسيالار قىزمەتى الاڭىندا وتكەن بريفينگتە ماڭعىستاۋ وبلىسىنىڭ يندۋستريالىق –يننوۆاسيالىق دامۋ باسقارماسىنىڭ ءبولىم باسشىسى امانگۇل بەگييەۆا مالىمدەدى.
بۇل باعدارلاما اياسىندا ۇكىمەت وڭدەۋ ونەركاسىبى جانە اگروونەركاسىپ كەشەنى سالاسىنداعى باسىم جوبالاردى 2018-2020 جىلدار ارالىعىندا قولداۋ باعىتىندا 600 ملرد تەنگە قاراستىرىپ وتىر. سونىڭ ىشىندە وڭدەۋ ونەركاسىبىن دامىتۋعا 400 ملرد تەڭگە بولىنگەن. بۇل نەسيەلەۋ باعدارلاماسىنا نەگىزىنەن جەڭىل ونەركاسىپ، جيھاز ونەركاسىبى، تاماق جانە قايتا وڭدەۋ ونەركاسىبى سونداي-اق، قۇرىلىس ماتەريالدارىن وندىرەتىن جانە تۋريزم، ءبىلىم سالاسى، كولىك جانە لوگيستيكا سالاسىنداعى قىزمەت تۇرلەرىن قامتيتىن جوبالارمەن بارلىق بيزنەس سۋبەكتىلەرى قاتىسا الادى. جوبا اتالعان سالالاردى دامىتۋ ماسەلەسىنە قاتىستى، سونىڭ ىشىندە جۇيەلىك دەڭگەيدەگى، ورتالىق جانە جەرگىلىكتى دەڭگەيدەگى ءبىرقاتار ءىس-شارالاردى قامتيتىن 9 تاراۋدان تۇرادى. «قاراپايىم زاتتار ەكونوميكاسىن» دامىتۋ جونىندەگى ۇكىمەت تاپسىرماسىنا سايكەس وبلىس اكىمدىگى مەن «اتامەكەن» وڭىرلىك كاسىپكەرلەر پالاتاسى نەگىزىندە قۇرىلعان جوبالىق كەڭسەدە ءتيىستى ءىس-شارالار جوسپارى جاساقتالىپ، جۇمىس جۇرگىزىلۋدە.
بۇگىنگى تاڭدا ەكىنشى دەڭگەيدەگى بانكتەرمەن جالپى سوماسى 3،0 ملرد.تەڭگەگە 9 جوبا، ونىڭ ىشىندە 2،46 ملرد. تەڭگە بولاتىن 7 جوبانى «دامۋ» قورى ماقۇلداپ وتىر. «دامۋ» كاسىپكەرلىكتى قولداۋ قورىنىڭ ماڭعىستاۋ وبلىستىق فيليالىنىڭ ديرەكتورى گۇلجان قالىمبەتوۆانىڭ ايتۋىنشا، جالپى سوماسى 2،20 ملرد.تەڭگە قۇرايتىن 5 جوبانى سۋبسيديالاۋ تۋرالى كەلىسىمگە قول قويىلعان جانە دە 20 ملن.تەڭگە سوماسىندا نەسيە بويىنشا 1 جوبا، 10 ملن.تەڭگە نەمەسە نەسيەنىڭ 50%-ىنا كەپىلدەمە العان. سونىڭ ىشىندە، وڭىرىمىزدەگى وڭدەۋ ونەركاسىبىندەگى ازوتتى مينەرالدى تىڭايتقىشتار وندىرەتىن ءىرى كاسىپورىن «كازازوت» اق - دا وسى باعدارلاما اياسىندا نەسيە الۋعا قولداۋ تاپقان. اتالعان سالالاردا بيزنەستەرىن باستاۋعا نيەتتى ازاماتتار تولىق اقپاراتتى «اتامەكەن» كاسىپكەرلەر پالاتاسىنان، «دامۋ» كاسىپكەرلىكتى قولداۋ قورىنان جانە ەكىنشى دەڭگەيلى بانكتەردەن الا الادى.
ايتا كەتەتىن ءبىر ءجايت، وسى جوبانىڭ ارقاسىندا كاسىبي سپورتشىلاردى دايىندايتىن سپورت-ساۋىقتىرۋ كەشەنى اشىلاتىن بولدى. كاسىپكەردىڭ قۇنى 100 ملن تەڭگە تۇراتىن ۇسىنىسىن «FORTE BANK» ماقۇلداپ، كەشەن 2020 جىلدىڭ مامىر ايىندا اشىلادى دەپ جوسپارلانۋدا.
«بۇل دەگەنىمىز، كاسىبي سپورتشىلار ءۇشىن تاپتىرماس مۇمكىندىك. ويتكەنى، ولار جاتتىعۋ ءۇشىن شەتەل اسپاي، ءوز ەلىمىزدە دايىندالىپ، وليمپيادا ويىندارىنا قاتىسا الادى» ، - دەدى «FORTE BANK» اق مو بويىنشا فيليال ديرەكتورى اببات ورىسبايەۆ.
ال، ەندى «قاراپايىم زاتتار ەكونوميكاسىنىڭ» باسقا جوبالاردىڭ ارتىقشىلىعىنا توقتالساق. بىرىنشىدەن، كاسىپكەر قانداي سومادا نەسيە الام دەسە دە شەكتەۋ جوق. ەكىنشىدەن، نەسيەنىڭ 50 پايىزىن «دامۋ» كاسىپكەرلىكتى قولداۋ قورى سۋبسيديالاپ، 5 ملرد تەڭگەگە دەيىن نەسيەگە كەپىل بولا الادى. مامانداردىڭ ايتۋىنشا، اتالعان جوبانى قۇرۋدا قازاقستاننىڭ ۇتاتىن تۇسى كوپ. ويتكەنى، بىزدە وزىمىزدەن شىعاتىن ساپالى ءارى ارزان شيكىزات مول جانە ەلىمىزدىڭ ەنەرگيا قورى بار. سونداي-اق، باسقا ەلدەرمەن سالىستىرعاندا بىزدە ارزان جۇمىس كۇشى دە جوق ەمەس. كيەر كيىم، جاتار ورىن، ىشەر تاماق. مىنە وسىلار وزىمىزدە وندىرىلسە، تابىسى دا پايداسى دا وزىمىزگە. قاراپايىم زاتتار ەكونوميكاسى دەگەنىمىز وسى. تۇپتەپ كەلگەندە بۇل ۇلتتىق قاۋىپسىزدىك ءۇشىن قاجەت.
پىكىر قالدىرۋ