مەملەكەت باسشىسى ءماسليحات دەپۋتاتتارىمەن، قوعامدىق كەڭەس مۇشەلەرىمەن، زيالىق قاۋىم، ارداگەرلەر، كاسىپوداقتار مەن جاستار ۇيىمدارىنىڭ وكىلدەرىمەن، مەملەكەتتىك قىزمەتشىلەرمەن كەزدەستى.

– اتىراۋ وبلىسى – مادەني جانە ادام الەۋەتى مول ايماق. ءوڭىردىڭ جەتىستىكتەرى جەرگىلىكتى حالىقتىڭ ءومىر ءسۇرۋ ساپاسى مەن تابىسىنىڭ وسۋىنە ىقپال ەتۋى ءتيىس. اكىمدىك، ۇكىمەت، بيزنەس – ءبارىمىز وسىعان باسا نازار اۋدارۋىمىز كەرەك، – دەدى قازاقستان پرەزيدەنتى.

مەملەكەت باسشىسى ءوڭىر حالقىنىڭ ءال-اۋقاتىن ارتتىرۋدى قامتاماسىز ەتۋگە، وتاندىق وندىرۋشىلەردى دامىتۋ ءۇشىن مۇناي-گاز سەكتورىنىڭ الەۋەتىن بارىنشا پايدالانۋعا كوڭىل ءبولدى. قاسىم-جومارت توقايەۆ ۇكىمەتكە ءۇش ءىرى جوبا اياسىندا ونىمدەردى ساتىپ الۋ جانە قىزمەت كورسەتۋ ىسىندەگى وتاندىق تاۋارلار مەن جەرگىلىكتى مامانداردىڭ ۇلەسىن كوبەيتۋ، شەتەلدىك جانە وتاندىق جۇمىسشىلاردى بىردەي ەڭبەكاقىمەن قامتاماسىز ەتۋ جونىندە جۇيەلى جۇمىس جۇرگىزۋگە تاپسىرما بەردى.

– ازاماتتارىمىز ساپالى ءبىلىم الىپ، جالاقىسى جوعارى جۇمىسقا ورنالاسۋى ءۇشىن بارلىق جاعدايدى جاساۋىمىز كەرەك. وتاندىق كاسىپكەرلەرگە دە ايتارىم بار. مەملەكەتتىڭ جانە كەز-كەلگەن كومپانيانىڭ ەڭ باستى بايلىعى ادام ەكەنىن ۇمىتپاڭىزدار. باستىسى – جاڭا جۇمىس ورىندارىن اشۋ، جۇمىسشىلاردىڭ جالاقىسىن ارتتىرۋ، – دەدى قاسىم-جومارت توقايەۆ.

قازاقستان پرەزيدەنتى ەكونوميكا سالاسىن ءارتاراپتاندىرۋ، سونىڭ ىشىندە پوليەتيلەن، پوليپروپيلەن ءوندىرۋ جانە بالىق شارۋاشىلىعىن دامىتۋ جونىندەگى جوبالاردى جۇزەگە اسىرۋ ماسەلەلەرىنە توقتالدى.

– جەرگىلىكتى ەكونوميكانىڭ مۇناي-گاز جانە مۇناي-حيميا كەشەندەرىنەن باسقا دا سالالارىن دامىتۋ قاجەت. ءوڭىردىڭ بالىق ونەركاسىبىن قالپىنا كەلتىرۋ جانە وسى سەكتورعا ينۆەستورلار تارتۋ كەرەك. قابىلدانعان شارالاردىڭ ناتيجە بەرمەي جاتقانىن كورىپ وتىرمىز. ءبىزدىڭ ازاماتتار ناقتى ىستەر كۇتەدى. اۋىل شارۋاشىلىعى مينيسترلىگى جانە اكىمدىك بۇل ماسەلەگە باسا نازار اۋدارۋى كەرەك، – دەدى مەملەكەت باسشىسى.

قاسىم-جومارت توقايەۆ تۇرعىن ءۇي، ەكولوگيا جانە كولىك ينفراقۇرىلىمى ماسەلەلەرىن شەشۋگە ەرەكشە توقتالدى.

– ناعىز ساپالى جول قانداي بولۋى كەرەك؟ ەڭ الدىمەن، سول جولدى پايدالاناتىن تۇرعىنداردى دىتتەگەن جەرىنە جىلدام جەتكىزەتىن ءقاۋىپسىز جول بولۋى ءتيىس. جوندەلگەن جولدىڭ سانى ەمەس، ساپاسى ماڭىزدى! اكىمدىكتەردىڭ جۇمىسىن وسى تالاپقا ساي باعالايتىن بولامىن. مىسالى، ءقازىر يندەر مەن ميالىنىڭ اراسىنداعى 120 شاقىرىمدى ءجۇرىپ ءوتۋ ءۇشىن 5 ساعات كەرەك. ال جوندەۋدەن كەيىن بۇل ارالىقتى 1،5 – 2 ساعاتتىڭ ىشىندە ءجۇرىپ وتۋگە بولادى، – دەدى قازاقستان پرەزيدەنتى.

مەملەكەت باسشىسى ەل بيۋدجەتىن جوسپارلاۋ كەزىندە ترانسفەرلەردىڭ ءادىل ءبولىنۋى مەن جەمقورلىققا قارسى جۇمىستاردى كۇشەيتۋ تۋرالى دا ايتتى.

كەزدەسۋ سوڭىندا قازاقستان پرەزيدەنتى قاتىسۋشىلاردى قازاقستان رەسپۋبليكاسىنىڭ مەملەكەتتىك رامىزدەرى كۇنىمەن جانە قاسيەتتى رامازان ايىنىڭ اياقتالۋىمەن قۇتتىقتاپ، تابىس پەن باق-بەرەكە تىلەدى.

مەملەكەت باسشىسى اتقارعان ءمىنسىز ەڭبەكتەرى ءۇشىن ءبىرقاتار ازاماتتى العىس حاتپەن ماراپاتتادى. ولاردىڭ اراسىندا اتىراۋ وبلىستىق اۋرۋحاناسىنىڭ حيرۋرگيالىق ءبولىمنىڭ مەڭگەرۋشىسى ا.ءدۇسىپوۆ، «بولاشاق ك» قوعامدىق بىرلەستىگىنىڭ مەنەدجەرى گ.جۇمابايەۆا، مۇناي جانە گاز وڭدەۋ سەحىنىڭ وپەراتورى ن.ەرعالييەۆ، «امانگەلدى اتىنداعى» بالىق شارۋاشىلىعى وندىرىستىك كووپەراتيۆىنىڭ جەتەكشىسى ۋ.ەسالييەۆ جانە اتىراۋ قالالىق №17 ورتا مەكتەپ ليسەيىنىڭ ماتەماتيكا ءپانىنىڭ وقىتۋشىسى س.ەروشەنكو بار.