جاڭا باسپانانى اتىراۋدىڭ جاناشىر تۇرعىندارى ءۇش اي ىشىندە سالىپ ءبىتىردى. بۇل ءۇي مەيرامگۇل امىرعالييەۆا مەن ونىڭ ءتورت بالاسىنا ارنالعان. ءۇيدىڭ جالپى اۋماعى – 105 شارشى مەتر.

«باسپانانى جىلدىڭ باسىندا – اقپان ايىندا تۇرعىزا باستادىق. كوپبالالى اناعا كومەك رەتىندە اقشا جيناۋعا تەك اتىراۋ ءوڭىرى عانا ەمەس، قازاقستاننىڭ باسقا دا ايماقتارىنىڭ حالقى زور ۇلەس قوستى. قۇرىلىس ماتەريالدارىن الۋعا جەرگىلىكتى كاسىپكەرلەر كومەكتەستى. ءۇي تولىعىمەن وتاندىق قۇرىلىس ماتەريالدارىنان سالىنعان. ءۇيدىڭ ءىشى كەڭ، جىلى، جارىق، بارلىق ينجەنەرلىك كوممۋنيكاسيا جەتكىزىلگەن، قۇجاتتارى بار. ءبىز، سونىمەن قاتار، قاجەتتى جيھاز بەن تۇرمىستىق تەحنيكانى دا ساتىپ اپەردىك. ەندى تەك ءۇيدىڭ اينالاسىن قورشاۋ عانا قالدى. قازىرگى تاڭدا اقشا جيناۋدى توقتاتتىق»، – دەيدى جەرگىلىكتى كاسىپكەر اسحات باعىت.

وسى ۋاقىتقا دەيىن مەيرامگۇل بالالارىمەن بىرگە جالدامالى شاعىن ۇيدە تۇرىپ كەلدى.

«جۇمىسقا شىعا المايمىن، ويتكەنى ۇلكەن ۇلىم مۇگەدەك. كىشكەنتاي كۇنىندە سال اۋرۋىنا شالدىققان. وعان جان-جاقتى كۇتىم كەرەك. ودان كىشى بالالارىم مەكتەپتە وقيدى. مۇگەدەك بالانى قاراپ وتىرعانىم ءۇشىن مەملەكەتتەن جاردەماقى الامىن، سونداي-اق، كوپبالالى انا رەتىندە الاتىن جاردەماقىم بار – بارلىعىن قوسقاندا تابىسىم 80 مىڭ تەڭگەدەن اسپايدى. بۇرىنعى كۇيەۋىم اۋرۋ، بىزگە كومەكتەسەتىن شاماسى جوق. اقشا جيناپ، جاڭا ءۇي تۇرعىزۋعا ۇلەس قوسقان بارشا جاندارعا العىسىم شەكسىز»، – دەيدى مەيرامگۇل امىرعالييەۆا.

اتىراۋ اكىمىنىڭ ورىنباسارى ۇلىقبەك تىنالييەۆتىڭ سوزىنشە، بۇگىندە ايماقتا كوپبالالى انالارعا مەملەكەت قانا ەمەس، جالپى، قوعام وكىلدەرى – مەسەناتتار، ۆولونتەرلەر جانە كاسىپكەرلەر دە ەرەكشە كوڭىل ءبولىپ وتىر. اتىراۋدىڭ جاناشىر تۇرعىندارى كوپبالالى اناعا ءۇي سالىپ بەردى اتىراۋدا 1088 – «التىن القا»، 1559 – «كۇمىس القا» يەگەرى تۇرادى. جالپى، وڭىردە ءتورت بالادان ارتىق پەرزەنت تاربيەلەپ وتىرعان 5296 انا بار.