اتىراۋ قالاسىنداعى «جايىق» مادەني-سپورت كەشەنىندە  قازاق حالقىنىڭ باتىرلارى يساتاي تايمان ۇلى مەن ماحامبەت وتەمىس ۇلىنىڭ رۋحتارىنا ارنالعان بوكستان ەرلەر اراسىندا حالىقارالىق تۋرنير بولىپ ءوتتى.

مۇنايلى وڭىردە وسىمەن ون ءبىرىنشى رەت وتكىزىلىپ وتىرعان بىلعارى قولعاپ دوداسىنا  بيىلعى جىلى  ءازىربايجان، وزبەكستان، قىرعىزستان، تاجىكستان، قازاقستان ۇلتتىق قۇرامالارى جانە ەلىمىزدىڭ وزگە وبلىستارىنان 100-گە جۋىق سپورتشى كەلدى. شارشى الاڭداعى قىزىققا ءارى تارتىسقا تولى كەزدەسۋلەر بەس كۇنگە سوزىلىپ، وسى سايىسقا قاتىسقان جەرلەستەرىمىز سادىق ماسساليموۆ (49 كگ)، ولجاس باينيازوۆ (52 كگ)، رايس نۇرقانات (75 كگ)،  جارىس بارىسىندا قارسىلاستارىنان  وزىق شىعىپ، تۋرنير جەڭىمپازى اتانسا، ەلامان راحمەتوللا (64 كگ) قولا مەدالدى ەنشىلەدى.

ال وزگە سالاماقتاردا ايدوس اراپوۆ (قوستاناي وبلىسى، 56 كگ)، رۋستام رۋستاموۆ  (الماتى وبلىسى، 60 كگ)، باحادۋر ۋسمانوۆ (تاجىكستان، 64 كگ)، ابىلايحان ءجۇسىپوۆ (قازاقستان قۇراماسى، 69 كگ)، ءابىلحان امانقۇل (قازاقستان قۇراماسى، 81 كگ)، ابزال قۇتتىبەكوۆ  (تۇركىستان وبلىسى، 90 كگ)، نۇرلان ساپارباي (قازاقستان قۇراماسى، 90+ كگ) الدىنا جان سالماي، التىن مەدال يەلەندى.

جارىستىڭ سالتاناتتى جابىلۋىندا جيىلعاندارعا قازاقتىڭ قوس باتىرىنىڭ  ءور تۇلعاسىن بەينەلەيتىن قويىلىم كورسەتىلىپ، رينگ تورىندە ماحامبەتتىڭ وتتى جىرلارى ناقىشىنا كەلتىرىلىپ ورىندالدى. وسىدان سوڭ، وبلىستىق دەنە شىنىقتىرۋ جانە سپورت باسقارماسىنىڭ باسشىسى رينات يبراگيموۆ ءسوز الىپ، بارلىق قاتىسۋشىلارعا جارىس بارىسىندا تاماشا ويىن ورنەگىن كورسەتكەندەرى ءۇشىن العىس ايتا كەلە:  

-قانشا جىلدار مەن عاسىرلار وتسە دە، قازاق باتىرلارىنىڭ ەرلىگى ەشقاشان ۇمىتىلمايتىنى انىق. سوندىقتان، بارشا الەمگە قازاق ۇلتىن تانىتىپ، ناسيحاتتاۋدا بۇل ءتۋرنيردىڭ ماڭىزى وتە زور. ءبىز بولاشاق ۇرپاققا رۋح بەرەر وسىنداي تۋرنيرلەردى كوپتەپ وتكىزۋدى ماقسات قىلىپ وتىرمىز، – دەدى.

سونداي-اق، بۇل تۋرنيرگە قۇرمەتتى قوناق رەتىندە بوكستان وليمپيادانىڭ ەكى دۇركىن كۇمىس جۇلدەگەرى، الەم چەمپيوناتىندا ەكى مارتە كۇمىس مەدال يەلەنگەن ادىلبەك نيازىمبەتوۆ قاتىستى.