اتالعا ۆيدەوداعى جاعدايعا قاتىستى "اتىراۋ مۇناي وڭدەۋ زاۋىتى" ج ش س تۇسىنىكتەمە بەردى، دەپ حابارلايدى Qamshy.kz.
كاسىپورىن اتالعان وقيعانىڭ، كەشە، 26 اقپاندا جەرگىلىكتى ۋاقىت بويىنشا ساعات 18:30-دا ورىن العانىن ناقتىلادى.
"بۋتەندى وليگومەريزاسيالاۋ قوندىرعىسىندا قوندىرعىنى ىسكە قوسۋعا ارنالعان تىكەلەي ايدالاتىن بەنزين كوللەكتورىندا اقاۋ انىقتالدى. ءونىمدى تەز ىعىستىرۋ ءۇشىن بۇل جەلىگە 15 كگس/كۆ سم قىسىممەن سۋ جىبەرىلدى. قازىرگى ۋاقىتتا اقاۋلى اۋماقتى جويۋ بويىنشا جەدەل شارالار قابىلداندى. بارلىق تەحنولوگيالىق قوندىرعى قالىپتى جۇمىس ىستەپ تۇر، مۇناي ونىمدەرىن ءوندىرۋ جانە جونەلتۋ جوسپارعا سايكەس جۇرگىزىلۋدە"، دەپ حابارلادى باسپا ءسوز قىزمەتى.
باسپا ءسوز قىزمەتى قانشا بەنزين توگىلگەنى تۋرالى ايتپادى، تەك قىزمەتتىك تەرگەۋ ءجۇرىپ جاتقانى بەلگىلى.
ايتا كەتسەك، 2024 جىلى 16 اقپاندا "اتىراۋ مۇناي وڭدەۋ زاۋىتى" ج ش س باس ديرەكتورىنىڭ ورىنباسارى – باس ينجەنەر ادىلەت شوشانباسوۆ مەملەكەت باسشىسى قاسىم-جومارت توقايەۆقا جۇگىنىپ، ۇندەۋ جاريالادى. ول ءوز ۇندەۋىندە ءاموز-دىڭ باس ديرەكتورى عالىمجان جۋسانبايەۆتى ماسەلەنى شەشكەننىڭ ورنىنا ورىنسىز مىنەز-قۇلىق تانىتۋعا بەيىم دەپ ايىپتادى. زاۋىتتىڭ باس ديرەكتورى پرەزيدەنتكە حات جولداپ، ءوزى قابىلداعان جاڭاشىلدىقتارعا قول استىنداعىلار دايىن ەمەس ەكەنىن، سول سەبەپتى قىسىم كورىپ جاتقانىن ايتىپ اقتالدى. قوس باسشىنىڭ داۋ-دامايى ەكەۋىنىڭ دە قىزمەتتەن بوساتىلۋىمەن تىنعان ەدى. بۇل تۋرالى Qamshy.kz سايتىنداعى "پرەزيدەنت كەڭەسشىسى اتىراۋعا شۇعىل ۇشتى. مۇنايلى وڭىردە نە بولىپ جاتىر" اتتى ماقالادان كەڭىرەك ءبىلىپ-تانىسا الاسىزدار.
پىكىر قالدىرۋ