وبلىستىق ءبىلىم بەرۋ باسقارماسى باسشىسىنىڭ م.ا. جانسۇلۋ تورەمۇراتوۆانىڭ مالىمەتى بويىنشا، بۇگىندە وبلىستا 47 237 ءسابيدى قامتيتىن 325 مەكتەپكە دەيىنگى ءبىلىم بەرۋ ۇيىمى قىزمەت ەتەدى. 2018-2019 وقۋ جىلى 7 بالاباقشا ىسكە قوسىلعان. جاڭا وقۋ جىلى قارساڭىندا 1744 ورىنعا ەسەپتەلگەن 5 مەكتەپتىڭ قۇرىلىسى اياقتالىپ، ىسكە قوسىلادى. 4190 ورىندىق تاعى 11 مەكتەپتىڭ قۇرىلىسى جۇرۋدە.

– پەداگوگ كادرلارىمەن قامتاماسىز ەتۋ ءالى دە وزەكتى ماسەلە بولىپ تۇر. بۇگىندە وبلىس مەكتەپتەرىندە 472 ءمۇعالىم جەتىسپەيدى. جاراتىلىستانۋ-ماتەماتيكالىق سيكلىنىڭ پەداگوگتارى، باستاۋىش كلاسستاردىڭ مۇعالىمدەرى جانە ورىس تىلىندە وقىتاتىن مەكتەپتەرگە ورىس ءتىلى مەن ادەبيەتى ءپانىنىڭ وقىتۋشىلارى كەرەك. سوڭعى ءۇش جىلدا وبلىس اكىمدىگى ءبىلىم بەرۋ گرانتتارىن، سونىڭ ىشىندە، پەداگوگيكالىق ماماندىقتار بويىنشا گرانتتار ءبولىپ كەلەدى. وكىنىشكە وراي، ورىس ءتىلى مەن ادەبيەتى جانە باستاۋىش كلاسس ءمۇعالىمى ماماندىقتارى بويىنشا وقۋعا نيەت بىلدىرۋشىلەر بولماي تۇر، – دەدى جانسۇلۋ تورەمۇراتوۆا.

ءبىلىم بەرۋ باسقارماسىنىڭ باسشىسى، سونداي-اق، ينكليۋزيۆتى ءبىلىم بەرۋدى ەنگىزۋ، وقۋشىلاردى كاسىبي ءبىلىم الۋعا تارتۋ جۇمىستارى تۋرالى باياندادى، ءبىلىم بەرۋ سالاسىنىڭ پروبلەمالارى جانە ولاردى شەشۋ جولدارى تۋرالى ايتتى. ماسەلەن، جاڭا وبەكتىلەردىڭ قۇرىلىسى مەكتەپتەردەگى ءۇش اۋىسىمدىق وقىتۋ ماسەلەسىن شەشۋگە جانە بالاباقشالارعا كەزەكتى ازايتۋعا مۇمكىندىك بەرەدى.

اتىراۋ وبلىسىنىڭ اكىمى نۇرلان نوعايەۆ ءوڭىردىڭ پەداگوگتار قاۋىمداستىعىنا جاڭا وقۋ جىلىندا ساتتىلىك تىلەپ، وبلىستىڭ ءبىلىم بەرۋ سالاسىنىڭ جەتىستىكتەرى مەن پروبلەمالارى تۋرالى ءوز ويىن ايتتى. 

–  ادام بالالىق شاعىنان باستاپ، بالاباقشادا، مەكتەپتە، ورتا جانە جوعارى وقۋ ورىندارىندا العان ءبىلىمىنىڭ ارقاسىندا قوعامعا يكەمدەلىپ، ءوز ورنىن تابادى. سوندىقتان سىزدەردىڭ قىزمەتىڭىز، پەداگوگتىڭ ەڭبەگى ءاربىر ادام ءۇشىن، بۇكىل مەملەكەت ءۇشىن ماڭىزدى، – دەدى ن.نوعايەۆ. – لايىقتى ءبىلىم الۋ ادام ءۇشىن وتە ماڭىزدى ەكەنى انىق. ونى يگى ماقساتقا قولدانا ءبىلۋ دە ماڭىزدى. سوڭعى ون جىلدا ءبىلىم بەرۋدىڭ مازمۇنىندا ساپالىق وزگەرىستەر بولدى. وقىتۋدىڭ جاڭا تەحنولوگيالارى، تۇرلەرى پايدا بولدى. سوندىقتان، اعا بۋىننىڭ تاجىريبەسىن پايدالانا وتىرىپ، وقىتۋ ۇدەرىسىنە جاڭا، زاماناۋي تاسىلدەردى ەنگىزۋ قاجەت.

مەملەكەت ءبىلىم بەرۋگە زور كوڭىل ءبولىپ وتىرعانىن ءوڭىر باسشىسى اتاپ ءوتتى. اتىراۋ وبلىسىندا تەك بيىلعى جىلى 12 مەكتەپ، 4 بالاباقشا، 3 كوللەدج، 4 مەكتەپكە دەيىنگى شاعىن ورتالىقتى كۇردەلى جوندەۋگە 2،5 ملرد. تەڭگەدەن استام قاراجات ءبولىندى.

بۇگىنگى كۇنى وبلىستا 11 مەكتەپتىڭ جانە 11 بالاباقشانىڭ قۇرىلىسى جۇرگىزىلۋدە. ءمجا اياسىندا تاعى 9 بالاباقشا سالۋ جوسپارلانعان.

– بۇنىڭ بارلىعى ساپالى ءبىلىم بەرۋگە قول جەتكىزۋگە باعىتتالعان. جاس بۋىن ساپالى ءبىلىم الىپ، باسەكەگە قابىلەتتى بولۋى ءتيىس. ءقازىر ءبىزدىڭ وقۋشىلارىمىز حالىقارالىق جانە رەسپۋبليكالىق وليمپيادالاردا لاۋرەات اتانىپ، جەڭىمپاز بولىپ جۇرگەنىنە كۋامىز. بۇل الدىمەن، سىزدەردىڭ ەڭبەكتەرىڭىز، قۇرمەتتى ۇستازدار. جاعداي جاساۋدى قاجەت ەتەتىن تاعى ءبىر باعىت – ينكليۋزيۆتى ءبىلىم بەرۋ. بۇگىنگى تاڭدا وبلىستىڭ وقۋ ورىندارىندا ءبىلىم الىپ جاتقان 700 بالادان باسقا، تاعى 6 مىڭنان استام ەرەكشە بالالارعا ءبىلىم الۋ ءۇشىن جاعداي جاساۋ قاجەت. وسى بويىنشا جۇمىس جاسايمىز، – دەپ اتاپ ءوتتى نۇرلان نوعايەۆ. 

وبلىس اكىمى مەكتەپ اسحانالارىنداعى تاماقتاندىرۋ ماسەلەسىنە دە توقتاپ ءوتتى.

– ۇسىنىلاتىن تاماقتىڭ ساپاسى بويىنشا اتا-انالار تاراپىنان كوپ كىنارات قويىلادى. بۇرىن دا ايتىلعانداي، بۇل ماسەلەنى شەشۋ ءۇشىن قوعامدى، ۇكىمەتتىك ەمەس ۇيىمداردى، اتا-انالاردىڭ وزدەرىن تارتۋ قاجەت، ياعني قوعامدىق باقىلاۋ كەرەك. كەز كەلگەن ۋاقىتتا ولار تاماقتاندىرۋ قىزمەتىن ۇسىنىپ وتىرعان كاسىپكەردى تەكسەرە الادى، ءبىز وعان قارسى ەمەسپىز. سەبەبى، مەملەكەت ايتارلىقتاي قاراجات ءبولىپ وتىر، سوندىقتان، بيۋدجەت قاراجاتىنىڭ ءتيىمدى پايدالانىلۋىنا باقىلاۋ جۇرگىزۋ قاجەت، – دەگەن پىكىر ءبىلدىردى ن.نوعايەۆ.

ۋاقىت توقتاۋسىز جىلجىپ، ءومىر ۇدايى وزگەرىپ وتىراتىنىن ايتقان وبلىس اكىمى، پەداگوگتاردى سوعان سايكەس بىلىكتىلىگىن ارتىرىپ، جاڭا بيىكتەرگە ۇمتىلۋعا شاقىردى.