دراما تەاتردى قالپىنا كەلتىرۋ جۇمىستارى ورتتەن كەيىن جەدەل تۇردە باستالدى. ءقازىر نىساندا 22 كومپانيا جۇمىس ىستەپ جاتىر، ولار تەاتردى ءوز قاراجاتتارىنا قالپىنا كەلتىرىپ بەرۋگە باستاما كوتەرگەن.

– ءقازىر تەاتر عيماراتىنىڭ شاتىرى، ەلەكتر جەلىلەرى مەن سىرتقى قاسبەتىن قالپىنا كەلتىرۋ، ىشكى ارلەۋ جۇمىستارى ءجۇرىپ جاتىر، – دەيدى اتىراۋ وبلىستىق قۇرىلىس باسقارماسىنىڭ باسشىسى مالىك امانوۆ. 

– سونىمەن قاتار، 12 بىرلىك ارنايى تەحنيكا تارتىلىپ، 200-دەن استام ادام جۇمىس ىستەۋدە. تەاتر ۇجىمى دا تىس قالماي، قالپىنا كەلتىرۋ جۇمىستارىنا بەلسەندى اتسالىسۋدا.

تەاتر عيماراتىن ارالاپ شىققان ايماق باسشىسى نۇرلان نوعايەۆ ورتكە سەبەپكەر بولعان ەلەكتر تۇستامانى كۇردەلى جوندەۋ جۇرگىزىلگەن كەزدە جاڭارتپاعان تەاتر باسشىلىعىن سىنعا الدى. وبلىس اكىمى جاعدايدى جان-جاقتى سارالاپ، كىنالىلەرگە شارا قولدانۋدى تاپسىردى.

تەاتر عيماراتى جاڭارتىلىپ، بيىل مامىر ايىندا اشىلعان بولاتىن. قالپىنا كەلتىرۋ جۇمىستارى بارىسىندا ساحنا جوندەلىپ، كرەسلولار مەن اكۋستيكالىق جابىندى الماستىرىلدى، كورەرمەن زالىن جارىقتاندىرۋ تەحنيكاسى جاڭارتىلدى.

– بۇل بارلىق وبلىس تۇرعىندارى ءۇشىن ۇلكەن سىن بولدى، ءبىراق ادامداردىڭ نەمقۇرايلى قاراماعاندىقتارىنىڭ ارقاسىندا قالپىنا كەلتىرۋ جۇمىستارى ورتتەن كەيىن ءبىراز ساعاتتان سوڭ باستالدى، – دەدى نۇرلان نوعايەۆ. – كوپ جۇمىس ىستەۋ كەرەك، اسىعىستىققا جول بەرۋگە دە بولمايدى، قىس تۇسكەنشە ۋاقىتىمىز بار. مامانداردىڭ باعالاۋىنشا، ءۇش اي ىشىندە قالپىنا كەلتىرۋ جۇمىستارىن تولىعىمەن اياقتايمىز.