24 تامىز سەنبى كۇنى، اتىراۋ وبلىسىنىڭ اكىمى Telegram-داعى "اتىراۋ وبلىسى اكىمدىگىنىڭ" چات-كانالىنا تۇرعىنداردان كەلىپ تۇسكەن ساۋالدار بويىنشا، قالانى ارالادى، – دەپ حابارلايدى اتىراۋ وبلىسىنىڭ وڭىرلىك كوممۋنيكاسيالار قىزمەتى.

بۇگىنگى كۇنگە دەيىن چات-كانالعا 10 مىڭنان استام تۇرعىن تىركەلىپ، چات اشىلعاننان بەرى 6500 سۇراق قويىلعان. تۇرعىندار قويعان ساۋالدارعا وبلىس اكىمىنىڭ ءوزى جانە بارلىق مەملەكەتتىك مەكەمەلەر باسشىلارى تىكەلەي جاۋاپ بەرۋدە.

ارالاۋ بارىسىندا نۇرلان نوعايەۆ تۇرعىنداردىڭ چات-كانالدا اپاتتى جاعدايداعى ۇيلەردىڭ ماسەلەسى بويىنشا قويعان ساۋالدارىنا بايلانىستى ازاتتىق كوشەسىندەگى اپاتتى ۇيلەرگە باردى. قالالىق تكش ءبولىمى ماماندارىنىڭ ايتۋىنشا، بۇل ۇيلەر اپاتتى ۇيلەردىڭ تىزىمىنە ەنگەن. كەزەك بويىنشا اپاتتى ۇيلەر قيراتىلىپ، تۇرعىندارعا جاڭادان ۇيلەر بەرىلەتىن بولادى.

ايتا كەتەيىك، بۇگىنگى تاڭدا اتىراۋ قالاسى بويىنشا اپاتتى جاعدايدا 71 ءتۇرعىن-ۇي مەن 12 جاتاقحانا بار. وسى ماسەلەنى شەشۋ باعىتىندا قازىرگى تاڭدا "نۋرسايا" جانە "بەرەكە" ىقشاماۋداندارىندا كوپقاباتتى تۇرعىن-ۇيلەردىڭ قۇرىلىسى ءجۇرىپ جاتىر. مۇندا ەڭ ءبىرىنشى 12 جاتاقحانانىڭ تۇرعىندارى كوشىرىلەتىن بولادى.

سونىمەن قاتار، Telegram-چاتقا كەلىپ تۇسكەن ساۋالداردىڭ ءبىرى ەسكى بۋلاۋ-تازالاۋ ستانسياسىنا بايلانىستى. ساۋالدى جولداعان اتىراۋ قالاسىنىڭ تۇرعىنى تانات نۇرىموۆ. تۇرعىننىڭ ايتۋىنشا، كەزىندە ۆاگون سيستەرنا ىشىندەگى مۇناي قالدىقتارىن تازالايتىن بۇل ستانسيانىڭ جۇمىسى 2006 جىلى سوتتىڭ شەشىمىمەن توقتاتىلعان. دەگەنمەن، جۇمىس توقتاتىلعاننان كەيىن، بۇل جەردەگى مۇناي قالدىقتارى تولىق جينالماعان. وسى ماسەلەگە قاتىستى وبلىس اكىمى نۇرلان نوعايەۆ ءوزى سول جەرگە جەكە بارىپ، بۇل ءىستىڭ قاداعالانۋىن پروكۋرورعا تاپسىردى.

– بارلىق مەملەكەتتىك مەكەمەلەر باسشىلارى الەۋمەتتىك جەلىدەگى تۇرعىنداردىڭ ساۋالدارى بويىنشا بەلسەندى تۇردە جۇمىس جاساۋلارى قاجەت، – دەيدى نۇرلان نوعايەۆ. – مەملەكەت باسشىسى حالىقپەن بايلانىس ورناتۋ ءۇشىن ناقتى تاپسىرمالار بەردى. سول تاپسىرمالاردى ورىنداۋ ءۇشىن بىزدە بارلىق جاعداي قاراستىرىلعان.

وبلىس اكىمى ارالاعان كەلەسى نىسان "ايالا" الەۋمەتتىك وڭالتۋ ورتالىعى. بۇل ورتالىق قالاداعى دامۋىندا ءتۇرلى بۇزىلىستارى بار جانە تاعى دا باسقا اۋىتقۋى بار بالالارعا ارنالعان. ورتالىقتىڭ باسشىسىنىڭ ايتۋىنشا، جىلىنا 500-دەي بالانى قابىلداي الاتىن بۇل ورتالىقتا تۇزدى ساۋنا، باسسەين، ماسساج سىندى بارلىق جاعدايلار جاسالاتىن بولماق. ايماق باسشىسى بۇل ورتالىقتىڭ قالامىزعا كاجەتتى نىسان ەكەنىن ايتىپ، جۇمىستارىنا ساتتىلىك تىلەدى.