اتىراۋ وبلىسى قۇلسارى قالاسىنىڭ ورتا جانە شاعىن بيزنەس وكىلدەرى جىلىوي اۋداندىق اكىمدىگىنىڭ الدىنا جينالدى. ولاردىڭ باستى تالابى – بازارلار مەن ساۋدا ورتالىقتارىنىڭ اشىلۋى.
اتىراۋ وبلىسى اكىمى باسپا ءسوز قىزمەتىنىڭ حابارلاۋىنشا، جىلىوي اۋدانىنىڭ باس سانيتارلىق دارىگەرى ت.ءحابيبۋلليننىڭ قاۋلىسىمەن كارانتين جاعدايى 18 ماۋسىمعا دەيىن ۇزارتىلعان. قاۋلى ساۋدا نۇكتەلەرىنىڭ جۇمىسىن رەتتەيدى. ەپيدەميولوگيالىق جاعدايدىڭ تۇراقتى بولۋى ءۇشىن ساۋدا ورتالىقتارى مەن بازارلاردىڭ جۇمىس ىستەۋىنە رۇقسات جوق.
"بۇل شەشىم اۋدانىمىزدا كوروناۆيرۋس ىندەتىنىڭ تارالۋىنا بايلانىستى قابىلدانىپ وتىر. سوڭعى مالىمەتتەرگە سۇيەنەتىن بولساق، تەڭىز كەنتىندە 1013 ادامنان COVID-19 انىقتالعان. جىلىوي اۋدانىنىڭ ەلدى-مەكەندەرىندە 43 ادام تىركەلگەن. ونىڭ 33ء-ى قۇلسارى قالاسىندا. ەستەرىڭىزگە سالا كەتەتىن بولساق، جاقىن كۇندەرى عانا جىلىوي اۋدانىنان ەكى جاعداي انىقتالعان بولاتىن. قازىرگى تاڭدا قۇلسارىدا جەرگىلىكتى تۇرعىندارمەن كەزدەسۋ ۇيىمداستىرىلىپ، ءتۇسىندىرۋ جۇمىستارى جۇرگىزىلىپ جاتىر. كەزدەسۋگە جىلىوي اۋدانىنىڭ اكىمى مەن باس سانيتارلىق دارىگەرى قاتىسىپ جاتىر. وبلىس اكىمى ماحامبەت دوسمۇحامبەتوۆتىڭ تاپسىرماسىمەن جىلىوي اۋدانىنا وبلىس اكىمىنىڭ ءبىرىنشى ورىنباسارى نۇرلان تاۋبايەۆ بارا جاتىر" دەپ مالىمدەدى اتىراۋ وبلىسىنىڭ باسپا ءسوز قىزمەتى.
پىكىر قالدىرۋ