قازاقستاننىڭ اقپارات جانە قوعامدىق دامۋ ءمينيسترى داۋرەن ابايەۆ جاڭا پرەزيدەنت قاسىم-جومارت توقايەۆتىڭ مينيسترلەر كابينەتىندە جاساعان تاعايىنداۋلارىنا قاتىستى پىكىر ءبىلدىردى دەپ حابارلايدى Qamshy.kz اقپارات اگەنتتىگى sputniknews.kz سايتىنا سىلتەمە جاساپ.

"وتكرىتىي ديالوگ" باعدارلاماسىنىڭ جۇرگىزۋشىسى قويعان "سوڭعى تاعايىنداۋلاردى ەل بيلىگىندەگى ءىرى وزگەرىستەردىڭ باسى دەپ ساناۋعا بولا ما؟" دەگەن سۇراققا مينيستر بىلاي دەپ جاۋاپ بەردى:

"ءيا، جاڭا پرەزيدەنت ءبىرقاتار كادرلىق تاعايىنداۋ جاسادى. ءبىراق ءبارى ۇيلەستىرىلگەن. سول سەبەپتى بۇل  قاسىم-جومارت كەمەل ۇلى ۇلىقتاۋ راسىمىندە اتاپ كورسەتكەن ون تاپسىرمانى ورىنداۋعا اتقارۋشى بيلىكتى باعىتتاۋ ءۇشىن جاسالعان باسقارۋشىلىق قادام بولدى".

مينيستر اتاپ وتكەندەي، پرەزيدەنتتىڭ ۇلىقتاۋ راسىمىندە ايتقان ءسوزى جاي عانا ءالعىسوز ەمەس، ساياسي دەكلاراسيامەن تەڭ. اسىرەسە، جاڭا پرەزيدەنت سايلانعاندا ونىڭ ماڭىزى زور.

"رەسمي تۇردە راسىمگە قاتىسقاندارعا ايتىلعانىمەن، شىن مانىسىندە بۇكىل حالىققا، ديپلوماتيالىق كورپۋسقا جانە ءبىر جاعىنان الەمدىك قاۋىمداستىققا جاسالعان ۇندەۋ"، - دەدى مينيستر.

ابايەۆتىڭ ايتۋىنشا، پرەزيدەنتتىڭ ءسوزى ەلباسىنىڭ باعىتىن ءارى قاراي جالعاستىرىپ، وزگەرىستەرگە بەت الۋ قاجەتتىگىن بىلدىرەدى. ءاربىر پۋنكت پەن ءاربىر تاپسىرما قاراپايىم حالىقتىڭ مۇڭ-مۇقتاجى مەن تالاپ-تىلەكتەرى نەگىزىندە ايشىقتالدى، دەپ سانايدى مينيستر.

"ۇلىقتاۋ راسىمىندە ايتقان ءسوزى توقايەۆتىڭ وزىندىك ءبىر مەسسەدجى سياقتى بولدى: "حالىقتىڭ مۇڭ-مۇقتاجىن ەستىدىك، ەندى ىسكە كوشەيىك"، - دەدى ابايەۆ.

ەسكە سالا كەتسەك، قاسىم-جومارت توقايەۆ ۇلىقتاۋ راسىمىنەن كەيىن قازاقستاندا ءبىرقاتار تاعايىنداۋ جاسادى. بۇدان بولەك، كەيبىر ۆەدومستۆولار قايتا ۇيىمداستىرىلىپ، ساۋدا جانە ينتەگراسيا، يننوۆاسيالار جانە سيفرلىق دامۋ، سونداي-اق ەكولوگيا، گەولوگيا جانە تابيعي رەسۋرستار مينيسترلىكتەرى قۇرىلدى.