شقو التاي اۋدانى كۇمىسبۇلاق وڭىرىندە قمدب وسكەمەن ايماعى وكىلدىگىنىڭ ۇيىمداستىرۋىمەن «جاستار جىلىنا» وراي «دالا سەمينارى» ءبىر اپتالىق جوباسى ءجۇرىپ جاتىر. بۇل تۋرالى Qamshy.kz اقپارات اگەنتتىگى شىعىس قازاقستان وبلىستىق «حاليفا التاي» مەشىتىنىڭ باسپا ءسوز قىزمەتىنە سىلتەمە جاساپ حابارلايدى. 

ەلىمىزدىڭ بارلىق وبلىسىنان كەلگەن 80-گە تارتا جاس تازا اۋادا تابيعات اياسىندا باس قوسىپ، ماسەلە تالقىلاپ، سپورتتان، ونەردەن سايىسقا ءتۇسىپ، بالىق اۋلاپ، سۋعا ءجۇزىپ ءار كۇندى كوڭىلدى وتكىزۋدە.  

"جاستاردىڭ وتانشىلدىق سەزىمىن وياتۋ، ۇلتتىق قۇندىلىقتاردى دارىپتەۋدە بۇل شارانىڭ ورنى ەرەكشە. بولاشاقتا بۇل شارانى اكىمدىكتەر، باسقا دا وكىلدىكتەر قولعا الىپ ورىستەتسە قۇبا-قۇپ بولار ەدى"، - دەيدى، شاراعا قاتىسۋشىلار.  

سەميناردىڭ «تانىم، تاعىلىم» كۇندىگى اياسىندا وسكەمەندىك اقىن، جۋرناليست مۇراتحان كەنجەحان ۇلى، جاس اقىن داۋلەتبەردى جەكەي، «ەگەمەن قازاقستان» گازەتىنىڭ ءتىلشىسى، جۋرناليست ازامات قاسىمدار «دالا سەمينارىنا» قاتىسۋشى جاستارمەن كەزدەسىپ قايتتى. اقىندار جىر وقىپ، جاستارعا ومىرلىك تاجىريبەلەرىنەن ايتىپ بەردى.  

سونىمەن قاتار شاراعا قاتىسۋشى جاستار اراسىندا «قازاق كۇرەسىنەن» سايىس، ارقان تارتۋ قاتارلى ۇلتتىق ويىندار ويناتىلىپ، جەڭىمپازدار ماراپات، كۋبوك، سىيلىقتارمەن ماراپاتتالدى.  

"بۇل جوبا تىڭ باستاما بولعاندىقتان جاستار ءىس-شارالارعا اسا بەلسەندى قاتىسىپ جاتىر. ولارعا بارلىق قولايلى جاعداي جاسالدى. جاستارعا سپورتتان ارناۋلى جاتتىقتىرۋشى شاقىرىلدى. سونىمەن قاتار وبلىسقا تانىمال ونەرپازدار كەلىپ كونسەرت قويدى"، - دەدى، شىعىس قازاقستان وبلىستىق «حاليفا التاي» مەشىتىنىڭ ءبىرىنشى نايب يمامى داۋلەت قابيدولدين. 

بۇگىن جوبا اياسىنداعى «التاي تاريحى» ەتنوگرافيالىق ساياحات باستالدى.