قازاقستان رەسپۋبليكاسى پرەزيدەنتىنە ەكس-كانديدات، جۋرناليست ءامىرجان قوسانوۆ نۇرسۇلتان قۇرماننىڭ Youtube ارناسىندا سۇحبات بەردى دەپ جازادى Qamshy.kz اقپارات اگەنتتىگى. 

نۇرسۇلتان قۇرمان ءامىرجان قوسانوۆپەن سۇحباتتى بىر-ەكى اپتا بۇرىن وتكىزبەك بولعان ەكەن. ەكس-كانديداتتىڭ دەنساۋلىعىنا بايلانىستى سۇحبات 21-ماۋسىم كۇنى بولدى.

ءسوز اراسىندا ءامىرجان مىرزا:

«ءار ساياساتكەردىڭ ءوز شەشىمى بولادى. بۇل مەنىڭ قازاقتىڭ قارا بالاسى، جۋرناليست، ساياساتكەر ءامىرجان قوسانوۆتىڭ شەشىمى. بۇل ساتقىندىق ەمەس.  سايلاۋدىڭ وزىندە تاكتيكا، ستراتەگيا بولادى. الدىمەن بۇكىل مەنى قولداعان 1،5 ميلليون قازاقستاندىقتارعا العىسىمدى ايتامىن. ولار مەنى قولداعان جوق. مەن ۇسىنعان جوبالاردى، باعدارلامانى، مەنىڭ وزگەرىس تالاپ ەتكەنىمدى قولدادى. بيلىكتەن شارشاعان ازاماتتار، مەن ارقىلى بيلىككە نارازىلىعىن ءبىلدىردى دەپ بىلەمىن. ەكىنشىدەن مەن ءبىر تيىن اقشاسىز ۇگىتتەۋ جۇرگىزگەن، اۆتوشەرۋ جاساعان ازاماتتارعا العىسىمدى ايتامىن. ۇشىنشىدەن، ارينە العىسىم باقىلاۋشىلارعا. تاعى دا قايتالاپ ايتامىن، ولار ءامىرجاننىڭ باقىلاۋشىلارى ەمەس، ءارتۇرلى ۇيىمداردان كەلگەن باقىلاۋشىلار. ولار قوعامدى وياتتى. سايلاۋدىڭ فەنومەنى – باقىلۋشىلار دەسەم دە بولادى. ولار قوسانوۆتىڭ ەمەس، سايلاۋدىڭ قالاي وتكەنىن باقىلايتىن باقىلاۋشىلار. ءبىز 30-40 پايىز توڭىرەگىندە قولداۋدى سەزىندىك. بارلاعىنا دا العىس...»،- دەدى.

سايلاۋدان باسقا دا اڭگىمە قوزعاعان نۇرسۇلتان قۇرماننىڭ قوناعى ەلىمىزدەگى ءبىراز جايتتى دا تالقىلادى. وپپوزيسيا جايلى پىكىرىن ءبىلدىردى.