اتىراۋ وبلىسى اكىمى نۇرلان نوعايەۆ مەملەكەتتىك قىزمەتشىلەردى كاسىبي مەرەكەلەرىمەن قۇتتىقتادى.
سالتاناتتى شارادا سويلەگەن ايماق باسشىسى مەملەكەتتىك قىزمەتشى ەل تۇراقتىلىعىنىڭ نەگىزى ەكەنىن اتاپ ءوتتى. مەملەكەتتىك قىزمەتتىڭ مىندەتى- حالىققا قالتقىسىز قىزمەت ەتۋ جانە ۇلتتىق مۇددەنى قورعاۋ.
-ەلباسى نۇرسۇلتان ءابىش ۇلى نازاربايەۆ ايتقانداي، مەملەكەتتىك قىزمەتشىلەر الدىندا ماڭىزدى دا جاۋاپتى مىندەت تۇر، ول- حالىققا قىزمەت ەتۋ. قازاقستاننىڭ قازىرگى پرەزيدەنتى دە وسى باعىتتى ۇستانادى. مەملەكەت تۇراقتىلىقتى ساقتاۋ، الەۋمەتتىك قامسىزداندىرۋ، حالىقتىڭ از قامتىلعان توبىنا جاعداي جاساۋ، ەلىمىزدى دامىتۋ بويىنشا مىندەتتەمەلەرىن تولىعىمەن ورىنداپ وتىر. بۇل- بارلىق ارىپتەستەرىمىزدىڭ، سونىڭ ىشىندە ۇزاق جىلدار مەملەكەتتىك قىزمەتتە بولعان ارداگەرلەردىڭ ەڭبەگى. مەملەكەتتىك قىزمەت ارداگەرلەرىنە زور العىسىمىزدى ايتامىز،-دەدى نۇرلان نوعايەۆ.-ۋاقىتتىڭ ءوز تالابى بار. ادامدار اراسىنداعى قارىم-قاتىناستا دا، مەملەكەتتىك قىزمەت كورسەتۋدە دە وزگەرىستەر بولدى. كۇن ساناپ ەلەكتروندى تۇردە قىزمەت كورسەتۋدىڭ اۋقىمى كەڭەيىپ كەلەدى. بۇل بيۋروكراتيزمدى ازايتۋعا، حالىققا قىزمەت كورسەتۋ ساپاسىنىڭ جوعارىلاۋىنا مۇمكىندىك بەرەدى.
ءقازىر ايماقتا ءۇش مىڭنان استام مەملەكەتتىك قىزمەتشى بار. مەملەكەتتىك سەكتوردا جۇمىس ىستەۋگە جاستاردىڭ قۇلشىنىسى بارى قۋانتادى. مەملەكەت تە ولارعا قاجەت بارلىق جاعدايدى جاساۋدا.
-مەملەكەتتىك قىزمەتشىلەردى وقىتۋ، كاسىبي بىلىكتىلىكتەرىن كوتەرۋ ۋاقىت تالابىنا ساي بولۋعا بەيىمدەيدى. بۇل ۇلكەن ەڭبەك. ءار مەملەكەتتىك قىزمەتشى ونىڭ جۇمىسى مەن ادامدارمەن قارىم-قاتىناسى ارقىلى مەملەكەت تۋرالى پىكىر قالىپتاساتىنىن ءبىلۋى كەرەك،-دەپ اتاپ ءوتتى نۇرلان نوعايەۆ. تۇپتەپ كەلگەندە، بارلىق قازاقستاندىقتار مەملەكەتتىك قىزمەتشىلەر، ويتكەنى ءبارىمىزدى ءبىر ماقسات بىرىكتىرەدى، ول-ەلىمىزدىڭ دامۋى، وسىپ-وركەندەۋى.
وبلىستىق مەملەكەتتىك قىزمەت ىستەرى دەپارتامەنتىنىڭ باسشىسى توقتامىس جۇماعۇلوۆ تاۋەلسىزدىك جىلدارى زاماناۋي كاسىبي جوعارى مەملەكەتتىك اپپارات قالىپتاسقانىن، ەل دامۋى ءۇشىن مەملەكەتتىك باعدارلامالاردى تابىستى جۇزەگە اسىرىپ جاتقانىن اتاپ ءوتتى.
-مەملەكەتتىك قىزمەتكە قىزىعۋشىلىق تانىتاتىن جاستاردىڭ قاتارى كوبەيىپ كەلەدى. اتىراۋ وبلىسىندا مەملەكەتتىك قىزمەتشىلەردىڭ 30%-ى جاس، جىگەرلى، كاسىبي ماماندار. مەملەكەتتىك قىزمەتتەگى جۇمىس ادامنىڭ تانىم كوكجيەگى كەڭ بولۋىن، جاۋاپكەرشىلىگى جوعارى، ءتوزىمدى بولۋىن تالاپ ەتەدى. مەملەكەتتىك قىزمەتشى جۇمىسىنىڭ ساپاسى ادامداردىڭ ءومىر ءسۇرۋ دەڭگەيلەرىنە، جالپىحالىقتىق باعدارلامالاردىڭ جۇزەگە اسۋىنا ىقپال ەتەدى،-دەدى توقتامىس جۇماعۇلوۆ.
كاسىبي مەرەكە قۇرمەتىنە وبلىس بويىنشا 30 مەملەكەتتىك قىزمەتشى وبلىس اكىمىنىڭ، مەملەكەتتىك قىزمەت ىستەرى دەپارتامەنتىنىڭ، وبلىستىق ءماسليحاتتىڭ العىس حاتتارىمەن ماراپاتتالدى. سالتاناتتى شارا ايماقتاعى بەلگىلى ارتىستەر مەن شىعارماشىلىق ۇجىمدار ونەر كورسەتكەن مەرەكەلىك كونسەرتپەن اياقتالدى.