ايەلدىڭ ۇستىنە بازاردىڭ قابىرعاسى قۇلاپ، قازا تاپتى

/image/2019/06/24/dea2420cf576be36c8afb5b31d018a07_xl.jpg

تارازداعى جامبىل الاڭىندا بۇرىنعى «شاحريستان» بازارىنىڭ قابىرعاسى قۇلاپ، سول جەردەن ءوتىپ بارا جاتقان ايەلدى باسىپ قالدى دەپ حابارلايدى Qamshy.kz اقپارات اگەنتتىگى قازاقپارات سايتىنا سىلتەمە جاساپ.

ايتا كەتەيىك، «كونە تاراز» تاريحي-ارحەولوگيالىق پاركىنىڭ جانىندا ورنالاسقان «شاحريستان» بازارى قايتا جاڭعىرتۋعا بايلانىستى جابىلعان بولاتىن. جوسپار بويىنشا، بۇرىنعى بازار «شاحريستان» اتتى تاريحي-مۋزەي كەشەنىنە اينالۋى ءتيىس. بيىل بازاردىڭ عيماراتىن ءسۇرۋ جانە كەشەندى سالۋ جۇمىسى باستالعان بولاتىن.

قايعىلى وقيعا بۇگىن بازار اۋماعىنا كىرەتىن ماڭدا قوقىس تازالاۋ كەزىندە بولعان. سول جەردەن جولاي ءوتىپ بارا جاتقان ايەل قۇلاعان قابىرعانىڭ استىندا قالىپ قويعان. بۇل جاعدايدىڭ ۆيدەوسى الەۋمەتتىك جەلىدە جاريالانىپ، قالا تۇرعىندارى اراسىندا قوعامدىق رەزونانس تۋعىزدى.

«قوقىستى تيەپ جاتقاندا ينەرتتى ماتەريالدىڭ سالماعىنا شىداي الماي، قابىرعا قيراعان. ايتا كەتەيىك، بۇرىنعى بازاردىڭ قورشاۋ قابىرعالارى ساپالى كىرپىشتەن جاسالعان، سوندىقتان بۇزىلماي، قۇرىلىس ءجۇرىپ جاتقاندا اۋماقتى كوزدەن تاسالاپ تۇراتىن قورشاۋ رەتىندە قالدىرىلعان ەدى. قۇرىلىس اياقتالعان سوڭ ونى ءسۇرىپ تاستاۋ جوسپارلانعان. قازىرگى تاڭدا مارقۇمنىڭ تۋىستارىنا قاجەتتى كومەك كورسەتىلدى. قۇقىق قورعاۋ ورگاندارى اتالمىش جايت نەگىزىندە قىلمىستىق ءىس قوزعادى، تەرگەۋ ءجۇرىپ جاتىر. تەرگەۋ ناتيجەسى شىققان سوڭ كىنالى ازاماتتارعا ءتيىستى شارا قولدانىلادى»، - دەپ ءمالىم ەتتى قالا اكىمدىگى.

قاتىستى ماقالالار