ستامبۋل مەرىن قايتا سايلاۋ كەزىندە وپپوزيسيا كانديداتى ەكرەم يماموگلۋ جەڭدى دەپ حابارلايدى Qamshy.kz اقپارات اگەنتتىگى ازاتتىق راديوسىنا سىلتەمە جاساپ.

يماموگلۋ تۇركيا پرەزيدەنتى رەجەپ ەردوعان جەتەكشىلىك ەتەتىن "ادىلدىك جانە دامۋ" پارتياسىنىڭ ۇمىتكەرى بينالي يىلدىرىمنان العاشقى سايلاۋدان دا باسىم ايىرمامەن - 9 پايىزبەن العا شىقتى. وپپوزيسيا ليدەرىنە سايلاۋشىلاردىڭ - 54 پايىزى، بيلىك پارتياسىنىڭ وكىلىنە 45 پايىزى داۋىس بەرگەن. "انادولۋ" اگەنتتىگىنىڭ اقپاراتىنا قاراعاندا، بيۋللەتەندەردىڭ 99،37 پايىزى سانالعان.

23 ماۋسىمدا ستامبۋلدا قالا اكىمىن قايتا سايلاۋ وتكەن. اكىمدىككە 20 شاقتى ۇمىتكەر بار بولعانىمەن نەگىزگى تارتىس پرەزيدەنت ەردوعان جەتەكشىلىك ەتەتىن پارتيا ۇمىتكەرى بينالي يىلدىرىم مەن وپپوزيسيالىق حالىقتىق-رەسپۋبليكالىق پارتياسىنىڭ كانديداتى ەكرەم يماموگلۋ اراسىندا جۇرگەن.

بيىل ناۋرىزدا وتكەن سايلاۋ قورىتىندىسى ەردوعان جاقتاستارىنىڭ شاعىمىنان سوڭ "زاڭبۇزۋشىلىقتار مەن بۇرمالاۋ بولدى" دەگەن سەبەپپەن جارامسىز دەپ تانىلعان ەدى. تۇركيا ورتالىق سايلاۋ كوميسسياسى اۋەلدە وپپوزيسيا كانديداتى يماموگلۋنىڭ جەڭىسى زاڭدى بولدى دەپ مالىمدەگەن. الايدا ارتىنشا ناتيجە جويىلعان سوڭ قالادا نارازىلىق اكسيالارى ءوتتى.

ەردوعان دا، يىلدىرىم دا جەڭىلىستى مويىنداپ، وپپوزيسيا كانديداتىن قۇتتىقتادى.