ارىس قالاسىنداعى توتەنشە جاعدايدى پايدالانىپ، ءبىر ءۇي مەن دۇكەندى توناعان ءۇش ادام ۇستالدى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.
"وقيعا ورنىندا وبلىستىق جەدەل شتاب قۇرىلدى. جەدەل جەلى ىسكە قوسىلىپ، وعان وسى ۋاقىتقا دەيىن 11 مىڭعا جۋىق قوڭىراۋ كەلىپ ءتۇستى. قازىرگى ۋاقىتتا ۇرلىق-قارلىقتىڭ الدىن الۋ ءۇشىن پوليسيانىڭ 75 ناريادى وقيعا ورنىندا جۇمىس جۇرگىزۋدە. سونىمەن قاتار، ەكى قىلمىستى جاساعان ءۇش ادام ۇستالدى. اتاپ ايتقاندا، ءبىر دۇكەن مەن ءبىر ءۇي تونالعان"، - دەدى ىشكى ىستەر ءمينيسترى ەرلان تۇرعىمبايەۆ ۇكىمەت وتىرىسىندا.
ءمينيستردىڭ ايتۋىنا قاراعاندا، ارىس قالاسىنا كىرگەن جانە شىققان كولىكتەردىڭ بارلىعى تەكسەرىلىپ جاتىر.
"توتەنشە جاعدايدىڭ سالدارىنان ەكى ادام كوز جۇمدى. ءبىرى ارىس قالاسىنىڭ اسكەري ءبولىمىنىڭ اسكەري قىزمەتشىسى، ەكىنشىسى ارىس قالاسىنىڭ تۇرعىنى. ەكى ادام جانساقتاۋ بولىمىندە جاتىر. 34 ادام اۋرۋحاناعا جاتقىزىلدى. جەڭىل جاراقات العان 12 ادامعا مەديسينالىق كومەك كورسەتىلدى"، - دەدى ول.
ەسكە سالا كەتسەك، ارىس قالاسىنداعى اسكەري ءبولىمنىڭ قويماسىندا كەشە تاڭەرتەڭ جارىلىس بولعاندىعى تۋرالى حابارلاعان بولاتىنبىز. اپات سالدارىنان ەكى ادام مەرت بولدى. تۇركىستان وبلىسىنا ارنايى بارعان قازاقستان پرەزيدەنتى قاسىم-جومارت توقايەۆ ارىستاعى اسكەري بولىمشەدەگى ءوق-دارى قويماسىنداعى جارىلىستان زارداپ شەككەن قالا تۇرعىندارىمەن كەزدەسىپ، قالانىڭ قالپىنا كەلتىرىلەتىنىنە ۋادە بەردى.
پىكىر قالدىرۋ