ارىستاعى جارىلىس قازاق حالقى ءۇشىن ورتاق اپات. جەلىدە جارىلىس زارداپتارىن كورگەن اقىندار، جان تەبىرەنتەر ولەڭدەرىن ارناپ جازىپ جاتىر دەپ حابارلايدى Qamshy.kz اقپارات اگەنتتىگى.
كوردىم
وقتى كوردىم تەرەزەمدە جارىلعان،
وتتى كوردىم كەرەگەمدە جاعىلعان.
كوكتى كوردىم نايزاعايى شاعىلعان،
كوپتى كوردىم جالاڭاياق سابىلعان.
انا كوردىم سابيىنەن ايرىلعان،
بالا كوردىم قۇسالىقتان قايعىرعان.
ەردى كوردىم ەڭكەيگەنگە قاراسقان،
ەلدى كوردىم ىنتىماعى جاراسقان.
كورگەن كوزىم جاسقا تولدى،
بۇلادىم!
جىلاپ تۇرىپ جۇرتقا اماندىق سۇرادىم!
سەرىك سەيىتمان
24.06.2019 جىل
باتىردىڭ ۇيقىسى
ەر ازامات ەلدىك ءۇشىن شىنىقسىن،
ەل ءقادىرىن ەر بىلمەسە، كىم ۇقسىن؟
وتانىم دەپ وتتى كەشكەن باتىرلار
جاۋ قايتقاندا تىنىم تاۋىپ، تىنىقسىن!
سەرىك سەيىتمان
25.06.2019 جىل.
ارىس كوشىپ بارادى...
جاۋ جاقسى ەدى اتىساتىن بەتپە-بەت،
ساقىرلاعان، مۇز قۇرسانعان كوكپەڭبەك.
جاستىعىمدى الا جاتار ەدىم عوي،
كەلە جاتسا تۋعان جەرگە وكتەمدەپ.
ەلىم امان، جۇرتىم تىنىش جاتقاندا،
"ارىس" كوشىپ بارا جاتىر كەمسەڭدەپ .
كەڭەس كومىپ كەتكەن دۇلەي اجالدان،
ۇركىپ-شوشىپ، ەلگە قاشان كەلەم دەپ.
جانىپ ارىس جاتىر بەينە ەبەلەك،
ءوز وتىنا ءوز ورتەنەر كوبەلەك.
جاۋ جاعادان الماي تۇرعان زاماندا،
ءوز وعىمىز جاۋىپ جاتىر سەبەلەپ.
ەلدىڭ ءىشىن ويرانداسا "ەسكىلىك"،
ءدىنىم، ءتىلىم تىلىمدەلدى ەگىلىپ.
بىزگە جاۋدىڭ كەرەگى جوق، بىلگەنىم،
ءوز مۇڭىمنان ءوزىم ولەم كومىلىپ.
ءتىرى قالا اينالسا ەگەر ولىگە،
جۇرگەن كەزدە تىرلىك-قامىت جەگىلىپ.
ۇرانى كوپ بۇل جالعاننان نە پايدا؟
جۇرگەن كەزدە قازاق جاسى توگىلىپ!!!
(س) ەرلان ءىبىتانوۆ
ءبىزدى بىرەۋ وياتا الماي جاتقانداي،
بەيبىت كۇندە اتىلاتىن وق قانداي؟
بەس پەرىشتە ۇشىپ كەتتى ەمەس پە،
اق ماتادا جارقىراعان اق ماڭداي.
ءبىزدى بىرەۋ وياتا الماي جاتقانداي،
بەيبىت كۇندە جاۋ ىرگەدەن شاپقانداي.
بۇ حالىقتىڭ باسى كورگەن تالايدى،
شوقپاردى دا، جۇدىرىقتى باتپانداي...
ءبىزدى بىرەۋ وياتا الماي جاتقانداي،
سۋ ىشىندە جانىپ تۇرعان وت قانداي؟
جازا المايدى، سىزا المايدى شىندىعىن،
ءتىل تۇگىلى تاقىلداعان جوق تاڭداي...
ءبىزدى بىرەۋ وياتا الماي جاتقانداي،
جارق ەتەدى جۇلدىز كوكتەن اققانداي...
جەتى تۇندە اداسپاعان حالىقتى،
جارىق كۇندە اداستىرعان شوق قانداي!
اللا سابىر بەرسىن! انا مەن بالا اداسپاسىن تىنىش كۇندە...
(س) مارعۇلان اقان
پىكىر قالدىرۋ