Qamshy.kz اقپارات اگەنتتىگىنىڭ تىلشىلەرى ارىس قالاسىنا بارىپ، وقيعا ورنىنان اقپارات تاراتىپ جاتىر.

قازىرگى ۋاقىتتا جۋرناليستەر ارىس قالاسىندا وقيعا ورىنىن ارالاپ ءجۇر. ولار ارنايى جيلەتتەرمەن ساقتىق شارالارىن ساقتاي وتىرىپ، جۋرناليست ەكەندىكتەرىن راستايتىن ارنايى قۇجاتتارىمەن كىردى. ولارعا جارىلىس بولعان ايماقتاردى ەمەس، قالانىڭ ءىشىن عانا ارالاۋعا رۇقسات ەتىلدى.

تۇركىستان وبلىسى ارىس قالاسىندا العاشقى سنارياد بازارعا تۇسكەن. ساۋداگەرلەر بازارداعى ورىندارىن تاستاپ قاشقان. ساۋداگەرلەر ءتىپتى ساتىپ وتىرعان زاتتارىن دا جيناپ ۇلگەرمەگەن. 

ارىسقا كىرە بەرىستە اقدالا اۋىلىنىڭ قاقپاسىن پوليسەيلەر مەن اسكەريلەر كۇزەتىپ تۇر. ولار قالاعا قايتىپ جاتقان تۇرعىنداردى كىرگىزبەيدى.

"ادامدار بولعان سوڭ بۇل جەردە تىڭداماي كىرىپ جاتقان ادامدار بار. ولارعا تۇسىندىرمە جۇمىستارىن جۇرگىزىپ جاتىرمىز. حالىق پاسپورتىم قالىپ قويدى، قۇجاتىم بار ەدى دەپ جاتىر. كەيبىرەۋلەرى ءوز كوزىمەن كورگىسى كەلىپ جاتقان بولار. بارىنشا ءتۇسىندىرىپ جاتىرمىز. تۇسىنگەندەرى بلوك باسىنان قايتىپ جاتىر. قالعاندارىنا ءقازىر رەيد شارالارى جۇرگىزىلەتىن بولادى. جولدا وزدەرىڭىز بايقادىڭىزدار ءبىر ستولبى قۇلاپ، كولىكتى باسىپ قالعان. قالانىڭ ىشىندە دە سول جاعداي. سونىڭ بارلىعى رەتكە كەلتىرىلسە سۆەت، گاز بەرىلەدى"، - دەدى تۇركىستان وبلىسى توتەنشە جاعدايلار دەپارتامەنتىنىڭ باسشىسى نۇرعالي ءجۇنىسوۆ.

ارىس قالاسىندا 45 مىڭ تۇرعىن بار. «بوگەن» سۋقويماسى قاتاڭ باقىلاۋدا تۇر جانە ودان كەلەر ءقاۋىپ جوق.

قالا اۋماعىن ءتۇن بويى ۇلتتىق گۆارديانىڭ 580 ساربازى مەن 345 پوليسيا قىزمەتكەرى كۇزەتتى. ولار ۇرلىق-قارلىقپەن اينالىسىپ جۇرگەن 3 ادامدى ۇستادى.

توتەنشە جاعدايعا بايلانىستى 22 قونىستاندىرۋ ورنى اشىلدى. بۇل ورىنداردا 3566 ادام بار. ونىڭ 623ء-ى – بالالار. كوشىرىلگەن تۇرعىندار ازىق-تۇلىكپەن قامتاماسىز ەتىلگەن. اۋدان، قالا اكىمدىكتەرى جۇكتەلگەن مىندەتكە ساي جۇمىس اتقارۋدا. تۇرعىنداردى ەۆاكۋاسيالىق ورىندارعا جەتكىزۋىن قاداعالاۋدا.

قونىستاندىرۋ ورتالىقتارىنىڭ جۇمىسى توتەنشە جاعداي تولىق شەشىمىن تاپقانشا جالعاسادى. قازىرگى تاڭدا ارىس قالاسىنا كىرۋ ءقاۋىپتى. جان-جاعى قورشالعان. بۇل ماقساتتا ق ر ىشكى اسكەرىنىڭ 1800 اسكەري قىزمەتكەرى جانە 50 تەحنيكا جۇمىلدىرىلعان.

وقيعا ورنىنان ارنايى تىلشىلەر: ميات كاشىباي، بەك بايتاس