بۇگىن «Nur Otan» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ تۇركىستان وبلىسىنىڭ ارىس قالاسىندا بولعان توتەنشە جاعدايعا بايلانىستى ايماققا ارنايى كەلدى. ساپار بارىسىندا ول ءقاۋىپسىز جەرگە كوشىرىلگەن تۇرعىندارمەن كەزدەستى.

الدىمەن ول ورداباسى اۋدانى تورەارىق اۋىلىنداعى تاۋكە حان مەكتەبىنە ات باسىن بۇردى. بۇل جەردە توتەنشە جاعدايدان زارداپ شەككەن ارىس تۇرعىندارىنىڭ ءبىر توبى ۋاقىتشا ورنالاستىرىلعان.

– اپات ايتىپ كەلمەيدى. سوندىقتان ءبىز ءقازىر جۇدىرىقتاي جۇمىلۋىمىز كەرەك. ءقازىر بارشا قازاقستاندىقتار سىزدەرمەن بىرگە الاڭداپ، كومەك قولدارىن سوزۋدا. حالىق ارىستىقتارمەن بىرگە. بۇل توتەنشە جاعداي قازاقستاندىقتاردى ودان ءارى بىرىكتىرىپ، ۇيىستىرا تۇسكەنىن كورىپ وتىرمىز، – دەدى ماۋلەن اشىمبايەۆ.

قازىرگى تاڭدا ەلىمىزدىڭ بارلىق وڭىرىنەن ارىسقا قاراي گۋمانيتارلىق كومەكتەر اعىلىپ كەلىپ جاتقانى بەلگىلى. وسى ىستە «Nur Otan» پارتياسى دا بەلسەندى ارەكەت ەتۋدە. وقيعا بولعان كۇنى پارتيانىڭ بارلىق وبلىستىق فيليالىندا گۋمانيتارلىق كومەك قابىلداۋ ورىندارى اشىلىپ، ولار تاۋلىك بويى جۇمىس ىستەپ تۇر.

– ءقازىردىڭ وزىندە ەلىمىزدىڭ 9 وبلىسىنان كومەك كەلىپ جەتتى. گۋمانيتارلىق كومەكتەن بولەك، پارتيا تاراپىنان زارداپ شەككەن اتا-انالار مەن بالالارعا پسيحولوگيالىق قولداۋ كورسەتىلىپ جاتىر. جاسوتاندىقتاردىڭ بەلسەندىلىگىن دە ەرەكشە اتاپ وتكەن ءجون. مەملەكەت باسشىسى قاسىم-جومارت كەمەل ۇلى توقايەۆتىڭ ءوزى ارنايى كەلىپ، جاعدايمەن تانىسىپ شىقتى. ءقازىر جاعداي تولىعىمەن باقىلاۋدا. قالانى قالپىنا كەلتىرۋ جۇمىستارىنا ءبىزدىڭ پارتيا دا تىكەلەي قاتىسىپ، جۇمىستىڭ جۇيەلى تۇردە جۇرگىزىلۋىن باقىلاۋدا ۇستايدى، – دەدى ماۋلەن اشىمبايەۆ.

پارتيا تاراپىنان ۇيىمداستىرىلعان گۋمانيتارلىق كومەكتىڭ جالپى كولەمى 341 توننانى قۇرايدى. وسى اپتانىڭ سوڭىنا دەيىن قالعان ايماقتاردان دا اۆتوكەرۋەندەر شىعادى. سونداي كومەكتىڭ ءبىر توبىن قارسىلاپ العان ماۋلەن اشىمبايەۆ «Nur Otan» پارتياسىنىڭ بۇل باعىتتاعى جۇمىستارى ءارى قاراي دا جالعاساتىنىن ايتتى.

سونداي-اق ماۋلەن اشىمبايەۆ توتەنشە جاعدايعا بايلانىستى قۇرىلعان جەدەل شتابقا ارنايى كەلىپ، اتقارىلىپ جاتقان جۇمىس بارىسىمەن تانىستى. ودان بولەك زارداپ شەككەن بالالارمەن جۇمىس ىستەپ جاتقان پسيحولوگ ماماندارمەن كەزدەستى.