شىمكەنت قالاسى اكىمىنىڭ ورىنباسارى دانات جۋمين رۇقسات ەتىلمەگەن ميتينگتەن كەيىنگى قالاداعى جاعداي تۋرالى پىكىر ءبىلدىردى دەپ جازادى Qamshy.kz اقپارات اگەنتتىگى.

–بۇگىن قالادا ارىس قالاسىنان ەۆاكۋاسيالانعان تۇرعىندار رۇقسات ەتىلمەگەن شەرۋ باستاپ، شاھارداعى جول-كولىك قوزعالىسىنا، جەرگىلىكتى تۇرعىنداردىڭ تىنىشتىعىنا كەدەرگى كەلتىردى. شەرۋگە شىققانداردىڭ اگرەسسيۆتى ارەكەتتەرى الداعى ۋاقىتتا تولعىنان تالقىلاناتىن بولادى، - دەدى جۋمين ءوزىنىڭ الەۋمەتتىك جەلىدەگى پاراقشاسىندا.

ونىڭ ايتۋىنشا، قالادا ورىن العان كەلەڭسىز وقيعا قۇقىق قورعاۋ ورگانى قىزمەتكەرلەرىنىڭ قاتاڭ باقىلاۋىندا.

–قالا اكىمى عابيدوللا ءابدىراحىموۆ شەرۋگە شىققانداردىڭ تالاپ-تىلەگىن تىڭداۋ ءۇشىن ولارمەن ەكى رەت كەزدەستى. ءبىرىنشىسى – ورتالىق مەشىتتە، ەكىنشىسى – ورتالىق الاڭدا. قازىرگى ۋاقىتتا شەرۋگە شىققانداردىڭ 90 پايىزى تارقادى. ورتالىق الاڭدا عانا كىشىگىرىم توپ قالىپ وتىر، - دەدى قالا اكىمىنىڭ ورىنباسارى.

سونداي-اق، ول ارىس قالاسىنىڭ تۇرعىندارىنىڭ ەرتەڭنەن باستاپ ۇيلەرىنە ورالۋ مۇمكىندىگى تۋعانىن، ەشقانداي قاۋىپ-قاتەر جوقتىعىن مالىمدەدى.

ەسكە سالا كەتەيىك، بۇگىن ءتۇس شاماسىندا شىمكەنت قالاسىنا ەۆاكۋاسيالانعان ارىستىقتار جاڭا ءۇي مەن جارىلىستان كەيىنگى وتەماقىنى تولەۋدى تالاپ ەتىپ، رۇقسات ەتىلمەگەن شەرۋگە شىققان بولاتىن.