نۇر-سۇلتان قالاسىندا وتكەن «Nur Otan» پارتياسىنىڭ بەيبىت شەرۋىندە ءماجىلىس دەپۋتاتى باقىتبەك سماعۇل وسىلاي دەدى.
«جانىمىز قينالىپ وتىرعاندا، قوي تەرىسىن جامىلعان ءابىلازوۆ سياقتىلار حالىقتى ارانداتىپ، ورتاعا وت سالعىسى كەلەدى. ءسويتىپ حالىقتىڭ اراسىنا ىرىتكى سالۋدا. ەگەر شىن جانى اشىعان بولسا، كەشەگى ارىس اپاتى كەزىندە قايدا بولدى؟ حالىقتىڭ، ەلدىڭ تۇراقتىلىعىن، بەرەكەسىن العىسى كەلىپ، سۋداي شاشقان اقشاسىنان زارداپ شەككەندەرگە ءبىر تيىن كومەك بەردى مە؟ وسى تۇرعان بارشا حالىقتىڭ بىرەۋىنە بولسىن ءبىر ءۇزىم نان بەردى مە؟ بەرگەن جوق، ارينە! سوندىقتان، الەۋمەتتىك پروبلەمالاردى جەلەۋ ەتىپ، ەلدىڭ ىشىنە ىلاڭ سالىپ، حالىقتىڭ شىرقىن بۇزۋعا ەشقاشان جول بەرمەيمىز»، – دەدى باقىتبەك سماعۇل. 
بەيبىت شەرۋگە قاتىسقان بەلگىلى قوعام قايراتكەرى ورازگۇل اسانعازى ايەلدەرىن ەرەۋىل ءۇشىن كوشەگە جىبەرىپ، وزدەرى ۇيدە وتىراتىن ەركەكتەرگە وكپەسىن ايتتى.
«قازاق «جەتىمىن جىلاتپاعان، جەسىرىن قاڭعىتپاعان» حالىق. ال ءقازىر ايەلدەرىن كوشەگە جىبەرىپ، وزدەرى ۇيدە وتىرعان ەركەكتەردىڭ تىرلىگى نە دەگەن سۇمدىق؟ بۇل نە دەگەن ماسقارا! سوندىقتان ەر-ازامات دەگەن اتقا ساي ارەكەت ەتىپ، ايەلدەرىنە يە بولۋ كەرەك. جاقسى كۇنىمىزدى جامان دەپ ەرتەڭ كوشەدە تەنتىرەپ قالمايىق»، – دەدى ورازگۇل اسانعازى. 
سونىمەن قاتار ول اكەلەرى ەرتە ومىردەن ءوتىپ، بەس بالانى انالارى ءوسىرىپ، جەتىلدىرگەنىن ايتتى.
«ءبىز اكەدەن ەرتە قالدىق. سول كەزدە انام بەس بالاسىن ءوزى ءوسىردى. ەل بار، اعايىن بار. سولارعا ارقا سۇيەدى. ەشقاشان سول كەزدەگى اۋداندىق پارتيا كوميتەتىنە بارىپ، بايىم ءولدى دەپ قول جايعان ەمەس»، – دەدى ورازگۇل اسانعازى. 
ايتا كەتەيىك، بۇگىن نۇر-سۇلتان قالاسىندا ەلدىڭ اراسىنا ىرىتكى سالىپ جۇرگەن ارانداتۋشىلاردىڭ قيتۇرقى ارەكەتتەرىنە قارسى حالىق بەيبىت شەرۋگە شىقتى. قالاداعى «جەرۇيىق» ساياباعىنا جينالعان 1500-دەن استام ازامات تاۋەلسىزدىگىمىزدىڭ تامىرىنا بالتا شاباتىن جالعان ۇراندارىمەن ەلدىڭ ىرگەسىنە سىزات ءتۇسىرۋدى كوزدەيتىن ارام پيعىلدى ءابىلازوۆ سياقتى كەرىتارتپالاردىڭ ارەكەتتەرىنە قارسى ءوز ويلارى مەن پىكىرلەرىن اشىق ايتتى. 
پىكىر قالدىرۋ