قازاقستاندىق ءانشى ديماش قۇدايبەرگەنوۆ نۇر-سۇلتاندا "استانا ارەنا" ستاديونىندا وتكەن كونسەرتتە بيلەتتەر ساتىلىمىنان تۇسكەن قاراجاتتىڭ ءبىر بولىگىن ارىستا زارداپ شەككەندەرگە كومەكتەسۋ ماقساتىندا قۇرىلعان قورعا اۋداراتىنىن ايتتى دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ.
"ءبىزدىڭ باۋىرلارىمىز - ارىس تۇرعىندارى قانداي جاعدايعا تاپ بولعانىن بىلەسىزدەر... سول سەبەپتى مەن كونسەرتتەن تۇسكەن قاراجاتتىڭ ءبىرشاما بولىگىن ارىستا زارداپ شەككەندەرگە اۋدارۋدى ۇيعاردىم"، - دەدى ءانشى.
ديماش قۇدايبەرگەننىڭ جەكە "ارناۋ" اتتى كونسەرتى ەلوردا كۇنىنە وراي وتكىزىلدى. باعدارلامادا قازاقتىڭ ۇلتتىق اندەرى، قازاقستاندىق جانە شەتەلدىك كومپوزيتورلاردىڭ تۋىندىلارى ورىندالدى، سونداي-اق ديماشتىڭ اۆتورلىق اندەرى دە شىرقالدى. ۇيىمداستىرۋشىلاردىڭ مالىمەتىنشە، ءانشىنىڭ فاناتتارى 64 ەلدەن 10 مىڭعا جۋىق ادام بيلەت ساتىپ العان.
سونىمەن قاتار، ديماش مانەرلەپ سىرعاناۋشى دەنيس تەنگە ءنومىر ارنادى. دەنيس تەننىڭ قازاسى ديماشقا دا اۋىر سوقتى. ونى ەسكە ءتۇسىرۋ ءۇشىن ءانشى SOS d'un terrien en détresse كومپوزيسياسىن ورىندادى، كەزىندە دەنيس وسى ءاننىڭ سۇيەمەلدەۋىمەن سىرعاناعان بولاتىن.
"دەنيس ەكەۋمىز مەنىڭ كەلەسى قازاقستانداعى كونسەرتىمدە دۋەت ايتامىز دەپ جوسپارلاپ ەدىك، ءبىراق... امال قانشا... دەنيس تالانتتى، وتە ەڭبەكقور بولدى. ول ونەر، ادامگەرشىلىك تۋىن بيىك ۇستادى"، - دەپ پىكىر ءبىلدىردى ديماش.
پىكىر قالدىرۋ