بۇگىن قوس كورەيانىڭ ورتاسىنداعى شەكارالىق ايماقتا جولعىپى، قول الىسقان قوس پرەزيدەنت ءبىر ساعاتقا جۋىق اڭگىمە-دۇكەن قۇردى. ناتيجەسىندە قانداي حالىقارالىق ءھام قوس ەل مۇددەسىنە جۇمىس جاسايتىن شەشىمدەر قابىلدانعانى تۋرالى Qamshy.kz اقپارات اگەنتتىگى ايتادى. 

قوس كوشباسشى ساعات بويى قاۋقىلداسسا دا، ورتاق مامىلەگە كەلە قويماعان سىڭايلى. بۇلاي دەپ تون پىشۋىمىزگە سەبەپ - الداعى ۋاقىتتا قوس تاراپتان دا كەلىسسوز جۇرگىزەتىن ارنايى توپ قۇرىلىپ، جوسپاردى سولار جۇزەگە اسىراتىنى. ولاردىڭ تالقىعا سالاتىن تاڭداۋلى تاقىرىبى - ءبولىنىپ كەتكەن كورەيا جارتىقۇرلىعىنداعى ىنتىماقتاستىق. 

"ءبىز ءاربىرىمىز كەلىسسوز جۇرگىزەتىن توپ قۇرىپ، اتقارىلاتىن جۇمىستى سولارعا تاپسىرۋعا كەلىستىك. كوماندالار ءبىرقاتار ماسەلەلەر بويىنشا جۇمىس جاسايدى"، - دەدى ترامپ. 

اقش تاراپىنىڭ كەلىسسوز جۇرگىزەتىن ارنايى "جاساعىن" ءقازىر سولتۇستىك كورەياداعى ارنايى وكىل قىزمەتىن اتقارىپ وتىرعان ستيۆەن بيگۋن اتقارماق. 

كەلىسسوز قورىتىندىسىندا ترامپ قحدر تاراپىنا سالىنعان سانكسيالاردى ءازىر قايتارۋعا قۇلىقسىز ەكەنىن، ءبىراق ۋاقىت وتە كەلە قايتارۋى مۇمكىن ەكەنىن جەتكىزدى. سونداي-اق، كيم چەن ىندى ۆاشينگتونعا شاقىرىپ، بۇل كەزدەسۋدىڭ دە جۇزەگە اساتىنىن مالىمدەدى. 

دونالد ترامپ پەن كيم چەن ىن اراسىنداعى اڭگىمە ساعاتقا جۋىق ۋاقىتقا سوزىلدى. كەزدەسۋگە وڭتۇستىك كورەيا باسشىسى مۋن چجە ءيننىڭ قاتىسىپ-قاتىسپاعانى بەيمالىم. 

دەگەنمەن، وڭتۇستىك كورەيا كوشباسشىسى جارتىقۇرلىقتى ءبولۋ ماسەلەسىندە جانە ىنتىماقتاستىقتى نىعايتۋعا قوس پرەزيدەنتتىڭ كەلىسسوزى كوپ كۇش سالعانىن اتاپ ءوتتى.