قارىزى بار ازاماتتاردىڭ جۇكتەمەسىن ازايتۋعا ارنالعان قاۋلىنىڭ جوباسى بەكىتىلدى دەپ حابارلايدى Qamshy.kz اقپارات اگەنتتىگى.
تۇرمىسى تومەن ازاماتتاردىڭ نەسيەسى مەملەكەت ەسەبىنەن 1 قىركۇيەككە دەيىن وتەلەدى.
وندا تۇرمىسى ناشار جانە كوپبالالى وتباسىلار مەن مۇمكىندىگى شەكتەۋلى جانداردىڭ نەسيەسىنىڭ 300 مىڭ تەڭگەسى 1 قىركۇيەككە دەيىن وتەلۋى ءتيىس دەپ جازىلعان.
سول سەبەپتى ەڭبەك جانە حالىقتى الەۋمەتتىك قورعاۋ مينيسترلىگى 15 شىلدەگە دەيىن قارىزى بار ازاماتتاردىڭ ءتىزىمىن جاساپ، جالپى بەرەشەگىن ەسەپتەۋى كەرەك. كەيىن مالىمەتتەردى ۇلتتىق بانك تەكسەرەدى. سونىڭ ناتيجەسىندە قارجى مينيسترلىگى پروبلەمالىق نەسيەلەر قورىنا اقشا اۋدارادى.
ەستەرىڭىزگە سالا كەتسەك، مەملەكەت باسشىسى قاسىم-جومارت توقايەۆ 26 ماۋسىم كۇنى قازاقستان ازاماتتارىنىڭ بورىش جۇكتەمەسىن ازايتۋ شارالارى تۋرالى جارلىققا قول قويدى.مۇنداي جەڭىلدىك كوپبالالى وتباسىلار، اسىراۋشىسىنان ايرىلۋ جاعدايىنا بايلانىستى تولەم الاتىن وتباسىلار، مۇگەدەك بالالارى بار، 18 جاستان اسقان، بالا جاسىنان مۇگەدەكتەر بار وتباسىلار، اتاۋلى مەملەكەتتىك الەۋمەتتىك كومەك الاتىندار، جەتىم بالالار، اتا-اناسىنان كامەلەتتىك جاسقا دەيىن ايىرىلعان، جيىرما توعىز جاسقا تولماعان، اتا-انانىڭ قامقورلىعىنسىز قالعان بالالارعا بەرىلەدى.
بۇدان بولەك، ولاردىڭ بيىلعى 1 ماۋسىمعا دەيىنگى قارىزدارىنىڭ جالپى كولەمى 3 ميلليون تەڭگەدەن اسپاۋى ءتيىس.
