شىعىس قازاقستان وبلىسىنىڭ التاي اۋدانىنا قاراستى «كوگىلدىر بۇعاز» دەمالىس بازاسىندا «جاستار – قازاقستان دامۋىنىڭ فلاگمانى» اتتى رەسپۋبليكالىق فورۋم ءوتتى دەپ جازادى Qamshy.kz اقپارات اگەنتتىگى.
بۇل ءىس-شارا «رۋحاني جاڭعىرۋ» باعدارلاماسى اياسىندا حالىقارالىق ەڭبەك ۇيىمىنىڭ 100 جىلدىق مەرەيتويىنا جانە ەلىمىزدەگى جاستار جىلىنا ارنالدى.
– فورۋم «جاستار – قازاقستان دامۋىنىڭ فلاگمانى» دەپ تەكتەن-تەك اتالعان جوق. ويتكەنى ەلباسى نۇرسۇلتان نازاربايەۆ ءاردايىم ەلىمىزدىڭ بولاشاعى جاستاردىڭ قولىندا ەكەنىن ءجيى ايتادى. فورۋمدا پىكىرلەرىڭىزدى اشىق ايتىپ، وزەكتى ماسەلەلەردى تالقىلاڭىزدار، كاسىپوداق جۇمىسىن جەتىلدىرۋگە قاتىستى ۇسىنىس-تىلەكتەرىڭىزدى بىلدىرىڭىزدەر، – دەدى فورۋمنىڭ اشىلۋىندا ءسوز سويلەگەن وبلىستىق ىشكى ساياسات باسقارماسىنىڭ باسشىسى يرينا سميت.
ايتا كەتەيىك، فورۋمنىڭ ماقساتى – جاستاردىڭ كاسىبي جانە تۇلعا رەتىندە قالىپتاسۋىنا جاعداي جاساپ، ولاردىڭ الەۋەتىن الەۋمەتتىك پروبلەمالاردى انىقتاۋعا، شەشۋگە قولدانۋ، سالالىق كاسىپوداق مۇشەلەرىن جان-جاقتى قولداۋ، ولاردىڭ مۇددەلەرىن قورعاۋ.
فورۋم اياسىندا وتكەن دوڭگەلەك ۇستەلدە جاستار كاسىپوداق قوزعالىسىن دامىتۋ تۋرالى ويلارىن ورتاعا سالدى. ودان باسقا تاقىرىپقا وراي سەمينار-ترەنينگ ءوتتى. سپورتتىق سايىستار، ۆيكتورينالىق ويىندار، فلەشموب سىندى كوپتەگەن كوڭىل كوتەرۋ شاراسى ۇيىمداستىرىلدى.
«كوگىلدىر بۇعازداعى» باسقوسۋعا ەلىمىزدىڭ تۇكپىر-تۇكپىرىنەن 150-گە تارتا قاتىسۋشى جينالدى. ولاردىڭ ىشىندە سالالىق كاسىپوداقتاردىڭ وبلىستىق فيليالدارىنىڭ وكىلدەرى مەن ەلىمىزدىڭ بارلىق وڭىرىنەن كاسىپوداق كوشباسشىلارى بار. فورۋم اياسىندا مادەنيەت، سپورت، تۋريزم جانە اقپارات قىزمەتكەرلەرىنىڭ سالالىق كاسىپوداعى مەن مادەنيەت جانە سپورت مينيسترلىگىنىڭ تۋريزم يندۋسترياسى كوميتەتى اراسىندا ىنتىماقتاستىق مەموراندۋمىنا قول قويىلدى.
پىكىر قالدىرۋ